ഭാരതത്തിന്റെ അതിർത്തികളിൽ അശാന്തി വിതയ്ക്കാൻ ശ്രമിക്കുന്നവർക്ക് കൃത്യമായ ഭാഷയിൽ മറുപടി നൽകുന്ന ഇന്ത്യയുടെ കരുത്തുറ്റ മുഖമാണ് ‘ഓപ്പറേഷൻ സിന്ദൂറിലൂടെ’ ലോകം കണ്ടത്. 2025 ഏപ്രിൽ മാസത്തിൽ ജമ്മു കശ്മീരിലെ പഹൽഗാമിൽ 26 നിരപരാധികളായ സാധാരണക്കാരെ കൊന്നൊടുക്കിയ ഭീകരാക്രമണത്തിന് ഇന്ത്യ നൽകിയ മറുപടി കേവലം ഒരു തിരിച്ചടിയായിരുന്നില്ല മറിച്ച് ശത്രുവിന്റെ സൈനിക ആസ്ഥാനങ്ങളുടെ അടിത്തറ ഇളക്കിയ കൃത്യതയാർന്ന ഒരു തന്ത്രപ്രധാന നീക്കമായിരുന്നു.
മാസങ്ങളോളം തങ്ങൾക്കേറ്റ കനത്ത ആഘാതം ലോകത്തിന് മുന്നിൽ നാണക്കേട് ഭയന്ന് മറച്ചുവെക്കാൻ ശ്രമിച്ച പാകിസ്ഥാൻ, ഒടുവിൽ വർഷാവസാന പത്രസമ്മേളനത്തിൽ ആ കയ്പ്പേറിയ സത്യങ്ങൾ ഓരോന്നായി വിറയലോടെ തുറന്നു സമ്മതിച്ചിരിക്കുകയാണ്. ഇന്ത്യയുടെ ആധുനിക ഡ്രോണുകൾക്ക് മുന്നിൽ തങ്ങളുടെ പ്രതിരോധം പാളിയെന്ന് പാകിസ്ഥാൻ തന്നെ സമ്മതിച്ചിരിക്കുകയാണ്. ഇന്ത്യൻ സൈന്യത്തിന്റെ പ്ലാനിംഗും കരുത്തും എത്രത്തോളമുണ്ടെന്ന് ലോകത്തിന് കാണിച്ചുകൊടുക്കുന്നതായിരുന്നു പാക് വിദേശകാര്യ മന്ത്രിയുടെ ഈ തുറന്നുപറച്ചിൽ
പഹൽഗാം ആക്രമണത്തിന് പ്രതികാരമായി മെയ് 7-ന് പുലർച്ചെയാണ് ഇന്ത്യൻ സായുധ സേന ഓപ്പറേഷൻ സിന്ദൂർ ആരംഭിച്ചത്. പാക് അധിനിവേശ കശ്മീരിലെ ഒമ്പത് ഭീകര ക്യാമ്പുകളെ ചുട്ടുചാമ്പലാക്കിക്കൊണ്ടായിരുന്നു തുടക്കം. എന്നാൽ ഭീകരകേന്ദ്രങ്ങൾക്കപ്പുറം അവർക്ക് താവളമൊരുക്കുന്ന പാകിസ്ഥാന്റെ പ്രധാന സൈനിക കേന്ദ്രങ്ങളെ കൂടി ലക്ഷ്യമിടാൻ ഇന്ത്യ തീരുമാനിക്കുകയായിരുന്നു. റാവൽപിണ്ടിയിലെ അതിപ്രധാനമായ നൂർ ഖാൻ വ്യോമതാവളമടക്കം 11 വ്യോമതാവളങ്ങളെയാണ് ഇന്ത്യൻ ഡ്രോണുകളും മിസൈലുകളും ഉന്നം വെച്ചത്.
വെറും 36 മണിക്കൂറിനുള്ളിൽ 80-ഓളം ഡ്രോണുകളാണ് അതിർത്തി കടന്ന് പാക് വ്യോമതാവളങ്ങളിലേക്ക് കുതിച്ചെത്തിയത്. ഇതിൽ ഭൂരിഭാഗവും തടഞ്ഞുവെന്ന് പാകിസ്ഥാൻ അവകാശപ്പെടുമ്പോഴും, നൂർ ഖാൻ ബേസിലുണ്ടായ സ്ഫോടനങ്ങളും നാശനഷ്ടങ്ങളും അവർക്ക് നിഷേധിക്കാനായില്ല.ആക്രമണത്തിന്റെ വ്യാപ്തി കുറച്ചുകാണിക്കാൻ പാക് ഭരണകൂടം ശ്രമിക്കുമ്പോഴും പുറത്തുവരുന്ന കണക്കുകൾ ഞെട്ടിക്കുന്നതാണ്. പാകിസ്ഥാൻ തന്നെ പുറത്തുവിട്ട പട്ടികയിൽ ഓപ്പറേഷൻ സിന്ദൂർ നടന്ന കാലയളവിൽ കൊല്ലപ്പെട്ട 138 സൈനികരുടെ വിവരങ്ങളുണ്ട്. നാശനഷ്ടങ്ങൾ നിസ്സാരമാണെന്ന പാക് വാദത്തെ ഇന്ത്യൻ ആർമി വെറ്ററൻ ലെഫ്റ്റനന്റ് ജനറൽ കെ.ജെ.എസ്. ധില്ലൺ ശക്തമായി തള്ളിക്കളയുന്നു.
നൂർ ഖാൻ വ്യോമതാവളത്തിന് പുറമെ സർഗോധ, റഫീഖി, ജേക്കബാബാദ് തുടങ്ങിയ കേന്ദ്രങ്ങൾക്കും കനത്ത നാശമുണ്ടായതായി ഉപഗ്രഹ ചിത്രങ്ങൾ തെളിയിക്കുന്നു. ഇന്ത്യ തൊടുത്തുവിട്ട മിസൈലുകൾ ആണവ പോർമുന വഹിക്കാൻ ശേഷിയുള്ളതാണോ എന്ന് തിരിച്ചറിയാൻ പാകിസ്ഥാന് ലഭിച്ചത് വെറും 45 സെക്കൻഡ് മാത്രമായിരുന്നുവെന്ന വെളിപ്പെടുത്തൽ ഇന്ത്യൻ ആയുധങ്ങളുടെ പ്രഹരശേഷിയെയും വേഗതയെയും ലോകത്തിന് മുന്നിൽ ഒരിക്കൽ കൂടി വിളിച്ചോതുന്നു.
ഓപ്പറേഷൻ സിന്ദൂർ പാകിസ്ഥാന് നൽകുന്ന പാഠം ലളിതമാണ് – അതിർത്തി കടന്നുള്ള ഭീകരവാദത്തിന് കനത്ത വില നൽകേണ്ടി വരും. ഇന്ത്യയുടെ ‘90% തദ്ദേശീയ സാങ്കേതികവിദ്യ’ ഉപയോഗിച്ചുള്ള ഈ ആക്രമണം ഭാവിയിലെ യുദ്ധതന്ത്രങ്ങളിൽ ഇന്ത്യയുടെ മേധാവിത്വം ഉറപ്പിക്കുന്നതാണ്. വെറുമൊരു മിന്നലാക്രമണം എന്നതിലുപരി ശത്രുവിന്റെ സൈനിക അച്ചടക്കത്തെയും പ്രതിരോധ സംവിധാനങ്ങളെയും പൂർണ്ണമായും തകർക്കാൻ കഴിഞ്ഞു എന്നതാണ് ഈ ഓപ്പറേഷന്റെ വിജയം. അന്താരാഷ്ട്ര തലത്തിൽ ഇന്ത്യയുടെ പ്രതിരോധ നയതന്ത്രം കൂടുതൽ ശക്തമായതിന്റെ സൂചനയായാണ് വിദേശ നിരീക്ഷകർ ഈ നീക്കത്തെ വിലയിരുത്തുന്നത്.
The post വെറും 45 സെക്കൻഡ്! പാകിസ്ഥാൻ വിറച്ചുപോയ ആ രാത്രി! നൂർ ഖാൻ ബേസിൽ സംഭവിച്ചതെന്ത്? ഒടുവിൽ കുറ്റസമ്മതം നടത്തി പാകിസ്ഥാൻ… appeared first on Express Kerala.