പല്ല് തേക്കാൻ മടിയാണോ? സൂക്ഷിക്കുക, കാത്തിരിക്കുന്നത് ഈ ഗുരുതര രോഗം!

പല്ല് തേയ്ക്കുന്നതിലെ അശ്രദ്ധ വെറുമൊരു വായനാറ്റത്തിലോ ദന്തക്ഷയത്തിലോ മാത്രം ഒതുങ്ങുന്ന ഒന്നല്ലെന്ന് പുതിയ ഗവേഷണങ്ങൾ സൂചിപ്പിക്കുന്നു. കൃത്യമായി പല്ല് തേയ്ക്കാത്ത ശീലം തലച്ചോറിനെ ബാധിക്കുന്ന പാർക്കിൻസൺസ് രോഗത്തിന് കാരണമായേക്കാമെന്നാണ് കൊറിയൻ ഗവേഷകർ കണ്ടെത്തിയിരിക്കുന്നത്. കൊറിയയിലെ പോസ്‌റ്റെക് ലൈഫ് സയൻസസ് പ്രൊഫസർ ആരാ കോ, ഡോ. ഹ്യൂഞ്ചി പാർക്ക് എന്നിവരുടെ നേതൃത്വത്തിലാണ് ഈ സുപ്രധാന പഠനം നടന്നത്.

വായയും പാർക്കിൻസൺസും തമ്മിലുള്ള ബന്ധം

വായ വൃത്തിയായി സൂക്ഷിച്ചില്ലെങ്കിൽ അവിടെ വളരുന്ന ബാക്ടീരിയകൾ കുടലിലെത്തുകയും, അവ ഉത്പാദിപ്പിക്കുന്ന രാസവസ്തുക്കൾ തലച്ചോറിലെ ന്യൂറോണുകളെ നശിപ്പിക്കുകയും ചെയ്യുന്നു.

പ്രധാന ബാക്ടീരിയ: ദന്തക്ഷയത്തിന് കാരണമാകുന്ന സ്‌ട്രെപ്‌റ്റോകോക്കസ് മ്യൂട്ടാൻസ് എന്ന ബാക്ടീരിയയാണ് ഇവിടെ വില്ലനാകുന്നത്.

പ്രവർത്തന രീതി: ഈ ബാക്ടീരിയകൾ കുടലിലെത്തിയാൽ ‘യുറോകനേറ്റ് റിഡക്റ്റേസ്’ എന്ന എൻസൈമും ‘ഇമിഡാസോൾ പ്രൊപ്പിയോണേറ്റ് (ImP)’ എന്ന പദാർത്ഥവും ഉത്പാദിപ്പിക്കുന്നു.

തലച്ചോറിലെ ആഘാതം: ഇവ രക്തത്തിലൂടെ തലച്ചോറിലെത്തുകയും ചലനങ്ങളെ നിയന്ത്രിക്കുന്ന ‘ഡോപാമൈൻ’ ഹോർമോൺ ഉത്പാദിപ്പിക്കുന്ന ന്യൂറോണുകളെ നശിപ്പിക്കുകയും ചെയ്യുന്നു. ഇതാണ് പാർക്കിൻസൺസ് രോഗത്തിലേക്ക് നയിക്കുന്നത്.

എലികളിൽ നടത്തിയ പരീക്ഷണങ്ങളിൽ, ഈ ബാക്ടീരിയയുടെ സാന്നിധ്യം മോട്ടോർ പ്രവർത്തനങ്ങളെ തകരാറിലാക്കുന്നതായും തലച്ചോറിൽ വീക്കം ഉണ്ടാക്കുന്നതായും കണ്ടെത്തിയിട്ടുണ്ട്.

Also Read: പെട്ടെന്നുള്ള തിളക്കം കണ്ട് വഞ്ചിതരാകരുത്! ചാർക്കോൾ മാസ്‌ക്കുകൾ വില്ലനായേക്കാം

എന്താണ് പാർക്കിൻസൺസ് രോഗം?

ശരീരത്തിന്റെ ചലനങ്ങളെ നിയന്ത്രിക്കുന്ന നാഡീവ്യൂഹത്തെ ബാധിക്കുന്ന ഗുരുതരമായ അവസ്ഥയാണിത്. തലച്ചോറിലെ ‘സബ്ലസ്റ്റാന്റിയ നിഗ്ര’ എന്ന ഭാഗത്തെ നാഡീകോശങ്ങൾ നശിക്കുമ്പോഴാണ് ഈ രോഗം പ്രകടമാകുന്നത്.

പ്രധാന ലക്ഷണങ്ങൾ

കൈകാലുകളിലെ വിറയൽ.

ദൈനംദിന ജോലികൾ ചെയ്യാൻ പ്രയാസം നേരിടുക (ചലന വേഗത കുറയുക).

പേശികൾക്ക് അനുഭവപ്പെടുന്ന മുറുക്കം.

മറവി, ഉറക്കക്കുറവ്, വിഷാദം.

ഗന്ധം തിരിച്ചറിയാനുള്ള കഴിവ് നഷ്ടപ്പെടുക.

The post പല്ല് തേക്കാൻ മടിയാണോ? സൂക്ഷിക്കുക, കാത്തിരിക്കുന്നത് ഈ ഗുരുതര രോഗം! appeared first on Express Kerala.