ബെംഗളൂരു: പുതുവർഷാഘോഷത്തിനിടെ അമിതമായി മദ്യപിച്ച് ബോധം മറയുന്നവരെ സുരക്ഷിതമായി വീട്ടിലെത്തിക്കാൻ പ്രത്യേക പദ്ധതിയുമായി കർണാടക പോലീസ്. ആഘോഷങ്ങൾക്കിടയിൽ അപകടങ്ങൾ ഒഴിവാക്കാനും പൊതുജന സുരക്ഷ ഉറപ്പാക്കാനുമായി അമിതമായി മദ്യപിച്ചവരെ വീടുകളിലെത്തിക്കാൻ ക്രമീകരണങ്ങൾ ചെയ്യുമെന്ന് ആഭ്യന്തരമന്ത്രി ജി. പരമേശ്വര അറിയിച്ചു. ലഹരി ശമിക്കുന്നതുവരെ ഇത്തരക്കാർക്ക് വിശ്രമിക്കാനായി നഗരത്തിൽ 15 പ്രത്യേക കേന്ദ്രങ്ങളും സർക്കാർ ഒരുക്കിയിട്ടുണ്ട്. മദ്യപിക്കുന്ന എല്ലാവരെയും പോലീസ് കൊണ്ടുവിടുമെന്ന് ഇതിനർത്ഥമില്ലെന്നും, നടക്കാൻ കഴിയാത്ത വിധം ബോധം നഷ്ടപ്പെട്ടവർക്കും സ്ത്രീകൾക്കുമായിരിക്കും മുൻഗണനയെന്നും മന്ത്രി വ്യക്തമാക്കി.
Also Read: ഇൻഡോറിൽ മലിനജലം കുടിച്ച് 8 മരണപ്പെട്ട സംഭവം; ഉദ്യോഗസ്ഥർക്ക് വീഴ്ച പറ്റിയെന്ന് ബിജെപി മന്ത്രി, ശക്തമായ നടപടിക്ക് നിർദ്ദേശം
ബെംഗളൂരു, മൈസൂരു, മംഗളൂരു തുടങ്ങിയ പ്രധാന നഗരങ്ങളിൽ വലിയ ജനക്കൂട്ടം ഒത്തുകൂടാൻ സാധ്യതയുള്ളതിനാൽ കർശന നിയന്ത്രണങ്ങളാണ് ഏർപ്പെടുത്തിയിരിക്കുന്നത്. ബാറുകൾക്കും പബ്ബുകൾക്കും കൃത്യമായ നിർദ്ദേശങ്ങൾ നൽകിക്കഴിഞ്ഞു. മദ്യപിച്ച് വാഹനമോടിക്കുന്നവരെ പിടികൂടാൻ നഗരത്തിലുടനീളം 160 ചെക്കിംഗ് പോയിന്റുകൾ സ്ഥാപിക്കും. കുറ്റവാളികൾക്കെതിരെ കർശന നടപടിയുണ്ടാകുമെന്നും മന്ത്രി മുന്നറിയിപ്പ് നൽകി. ഡ്യൂട്ടിയിലുള്ള പോലീസ് ഉദ്യോഗസ്ഥർ കമാൻഡ് സെന്ററുമായി ബന്ധിപ്പിച്ച ബോഡി ക്യാമറകൾ ധരിക്കണമെന്നും നിർദ്ദേശമുണ്ട്.
തിരക്കേറിയ സ്ഥലങ്ങളിൽ തിക്കും തിരക്കും ഒഴിവാക്കാൻ ജനക്കൂട്ടത്തെ നിയന്ത്രിക്കുന്നതിലാണ് സർക്കാർ കൂടുതൽ ശ്രദ്ധ കേന്ദ്രീകരിക്കുന്നത്. നഗരത്തിന് പുറത്തുനിന്നുള്ളവർ ധാരാളമായി എത്തുന്ന സാഹചര്യത്തിൽ ക്രമസമാധാന പ്രശ്നങ്ങൾ ഉണ്ടാകാതിരിക്കാൻ പോലീസ് ജാഗ്രത പാലിക്കും. ആഘോഷങ്ങൾ അതിരുവിടാതെ നോക്കാനും ജനങ്ങളുടെ സുരക്ഷ ഉറപ്പാക്കാനുമാണ് ലഹരി മാറുന്നതുവരെ വിശ്രമിക്കാനുള്ള സൗകര്യവും പോലീസ് വാഹനത്തിൽ വീട്ടിലെത്തിക്കുന്ന സേവനവും ഒരുക്കിയിരിക്കുന്നത്.
The post ന്യൂ ഇയറിൽ ‘അടിച്ചത്’ കൂടിയോ? പേടിക്കണ്ട, സുരക്ഷിതമായി വീട്ടിലെത്തിക്കാൻ ബെംഗളൂരു പോലീസ് കൂടെയുണ്ട്! appeared first on Express Kerala.
