നിത്യജീവിതത്തിലെ മധുരമുള്ള വില്ലനായ പഞ്ചസാര കേവലം രണ്ടാഴ്ചത്തേക്ക് ഭക്ഷണത്തിൽ നിന്ന് പൂർണ്ണമായും ഒഴിവാക്കിയാൽ ശരീരത്തിൽ വിസ്മയിപ്പിക്കുന്ന മാറ്റങ്ങൾ സംഭവിക്കുമെന്ന് ആരോഗ്യവിദഗ്ധർ. ഹാർവാർഡ് സർവകലാശാലയിൽ നിന്ന് പരിശീലനം നേടിയ പ്രശസ്ത ഗ്യാസ്ട്രോ എൻട്രോളജിസ്റ്റ് ഡോ. സൗരഭ് സേത്തിയാണ് സോഷ്യൽ മീഡിയയിലൂടെ ഈ കണ്ടെത്തലുകൾ പങ്കുവെച്ചത്. കഠിനമായ പട്ടിണിയോ വ്യായാമമോ ഇല്ലാതെ തന്നെ ശരീരത്തിന്റെ ഉപാപചയ പ്രവർത്തനങ്ങളെ മികച്ച രീതിയിൽ പുനക്രമീകരിക്കാൻ ഈ ’14 ദിവസത്തെ ചലഞ്ച്’ സഹായിക്കും.
തുടക്കം പ്രയാസകരം; പക്ഷേ അത് മാറ്റത്തിന്റെ സൂചന
പഞ്ചസാര ഒഴിവാക്കുന്ന ആദ്യ ദിവസങ്ങളിൽ തലവേദന, അമിതമായ ക്ഷീണം, ദേഷ്യം, ഏകാഗ്രതക്കുറവ് തുടങ്ങിയ അസ്വസ്ഥതകൾ അനുഭവപ്പെട്ടേക്കാം. ഇത് ശരീരത്തിന്റെ ‘വിത്ത്ഡ്രോവൽ സിംപ്റ്റംസ്’ അല്ലെന്ന് ഡോക്ടർ വ്യക്തമാക്കുന്നു. മറിച്ച്, പഞ്ചസാരയോട് ശീലിച്ച തലച്ചോറിലെ റിവാർഡ് സിസ്റ്റം സ്വയം മാറാൻ ശ്രമിക്കുന്നതിന്റെ ലക്ഷണമാണിത്. ഈ ഘട്ടം പിന്നിടുന്നതോടെ ശരീരത്തിൽ പോസിറ്റീവായ മാറ്റങ്ങൾ പ്രകടമാകും.
Also Read: ശരീരഭാരം കുറയ്ക്കണോ? പുതുവർഷ തീരുമാനങ്ങൾ പാഴാവാതിരിക്കാൻ ഇവ ശ്രദ്ധിക്കാം
രണ്ടാഴ്ച കൊണ്ട് സംഭവിക്കുന്ന പ്രധാന മാറ്റങ്ങൾ
സുസ്ഥിരമായ ഊർജ്ജം: മധുരം കഴിക്കുമ്പോൾ പെട്ടെന്നുണ്ടാകുന്ന എനർജി ബൂസ്റ്റും പിന്നീട് അനുഭവപ്പെടുന്ന തളർച്ചയും ഇല്ലാതാകുന്നു. ദിവസം മുഴുവൻ ഒരേപോലെയുള്ള ഊർജ്ജസ്വലത നിലനിർത്താൻ ഇതിലൂടെ സാധിക്കും.
കരളിന്റെ ആരോഗ്യം: കരളിൽ കൊഴുപ്പ് അടിയുന്നത് കുറയ്ക്കാനും ഇൻസുലിൻ പ്രതിരോധം മെച്ചപ്പെടുത്താനും ഇത് സഹായിക്കുന്നു.
വയറിലെ അസ്വസ്ഥതകൾ: വയർ വീർക്കുന്ന അവസ്ഥ (Bloating) കുറയ്ക്കുകയും ദഹനപ്രക്രിയ സുഗമമാക്കുകയും ചെയ്യുന്നു.
മികച്ച ഉറക്കവും ചർമ്മവും: ഉറക്കത്തിന്റെ ഗുണനിലവാരം വർദ്ധിക്കുന്നതിനൊപ്പം ചർമ്മത്തിലെ അനാവശ്യ പാടുകൾ കുറഞ്ഞ് തിളക്കം വർദ്ധിക്കാനും ഇത് കാരണമാകുന്നു.
രുചി മുകുളങ്ങളുടെ മാറ്റം: രണ്ടാഴ്ച കഴിയുന്നതോടെ നാക്കിലെ രുചി മുകുളങ്ങൾ പുനക്രമീകരിക്കപ്പെടും. ഇതോടെ പച്ചക്കറികളിലെയും പഴങ്ങളിലെയും സ്വാഭാവിക മധുരം തിരിച്ചറിയാൻ സാധിക്കും.
ഒഴിവാക്കേണ്ടത് എന്ത്?
ഇത് കാർബോഹൈഡ്രേറ്റ് പൂർണ്ണമായും ഒഴിവാക്കുന്ന കീറ്റോ ഡയറ്റോ അല്ലെങ്കിൽ പഴങ്ങൾ ഉപേക്ഷിക്കുന്ന രീതിയോ അല്ല. ചായയിലെ പഞ്ചസാര, ശീതളപാനീയങ്ങൾ, പാക്കറ്റ് ഭക്ഷണങ്ങൾ, സോസുകൾ എന്നിവയിലുള്ള ‘അധിക പഞ്ചസാര’ ഒഴിവാക്കുക എന്നതാണ് ഈ രീതിയുടെ ലക്ഷ്യം.
ശരീരഭാരം കുറയുന്നതിനേക്കാൾ ഉപരിയായി, ആന്തരിക അവയവങ്ങളുടെ ആരോഗ്യം വീണ്ടെടുക്കാനാണ് ഈ 14 ദിവസത്തെ പരീക്ഷണം സഹായിക്കുകയെന്നും ഡോ. സൗരഭ് സേത്തി കൂട്ടിച്ചേർത്തു.
The post ക്ഷീണവും ദേഷ്യവും മാറും, ലിവർ ഹാപ്പിയാകും! 14 ദിവസത്തെ പഞ്ചസാര വിരുദ്ധ പരീക്ഷണം appeared first on Express Kerala.
