ദുബായ്-അൽ ഐൻ റോഡിൽ പുതിയ ടണൽ തുറന്നു; ഗതാഗതക്കുരുക്കിന് വിരാമമിട്ട് ആർ.ടി.എ.യുടെ പദ്ധതി

ദുബായ്: നഗരത്തിലെ ഗതാഗത ശൃംഖല കൂടുതൽ ജനസൗഹൃദവും സുഗമവുമാക്കുന്നതിന്റെ ഭാഗമായി ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർ.ടി.എ.) പുതിയ ടണൽ യാഥാർത്ഥ്യമാക്കി. ദുബായ്-അൽ ഐൻ റോഡിനെ ഊദ് മേത്ത സർവീസ് റോഡുമായി ബന്ധിപ്പിക്കുന്നതാണ് 260 മീറ്റർ നീളമുള്ള ഈ പുതിയ ടണൽ. ഊദ് മേത്ത റോഡ്, അൽ അസയൽ സ്ട്രീറ്റ് ഡിവലപ്മെന്റ് പ്രോജക്റ്റിന്റെ ഭാഗമായാണ് ഈ നിർമ്മാണം പൂർത്തിയായിരിക്കുന്നത്.

ഒരു പാത മാത്രമുള്ള ഈ ടണലിലൂടെ മണിക്കൂറിൽ 1,200 വാഹനങ്ങൾ വരെ സുഗമമായി കടന്നുപോകാൻ സാധിക്കും. പ്രധാന പാതകളിലെ ഗതാഗതക്കുരുക്കും വാഹനങ്ങളുടെ വരിമാറലുകളും മൂലം ഉണ്ടാകുന്ന തടസ്സങ്ങൾ പൂർണ്ണമായി ഒഴിവാക്കുകയാണ് ഈ പദ്ധതിയൂടെ ലക്ഷ്യം. ഇത് യാത്രാ സമയം ഗണ്യമായി കുറയ്ക്കുമെന്നും വാഹനയാത്രക്കാർക്ക് കൂടുതൽ സൗകര്യമൊരുക്കുമെന്നും അധികൃതർ വ്യക്തമാക്കി.

Also Read: ബ്രിക്‌സ് മന്ത്രിതല യോഗത്തിൽ ഹോർമുസ് കടലിടുക്കിലെ ആശങ്ക പങ്കുവെച്ച് യു.എ.ഇ.; എണ്ണയിതര വ്യാപാരത്തിൽ വൻ കുതിപ്പ്

ഊദ് മേത്ത-അൽ അസയൽ വികസന പദ്ധതിയുടെ ഭാഗമായുള്ള മറ്റ് പ്രവൃത്തികളും ഈ ടണലിന്റെ പ്രവർത്തനം ആരംഭിച്ചതോടെ കൂടുതൽ വേഗത്തിലാകും. ദുബായിലെ റോഡ് യാത്രാനുഭവം അന്താരാഷ്ട്ര നിലവാരത്തിലേക്ക് ഉയർത്തുന്നതിനും നഗരത്തിലെ വിവിധ ഭാഗങ്ങളിലേക്കുള്ള ഗതാഗത ബന്ധം കൂടുതൽ ശക്തമാക്കുന്നതിനും ആർ.ടി.എ നടപ്പിലാക്കുന്ന സുപ്രധാന ചുവടുവെയ്പ്പുകളിൽ ഒന്നാണിത്.

The post ദുബായ്-അൽ ഐൻ റോഡിൽ പുതിയ ടണൽ തുറന്നു; ഗതാഗതക്കുരുക്കിന് വിരാമമിട്ട് ആർ.ടി.എ.യുടെ പദ്ധതി appeared first on Express Kerala.