മഴ കുറഞ്ഞു: ഇടുക്കിയിൽ വിനോദസഞ്ചാര കേന്ദ്രങ്ങൾക്കുള്ള നിയന്ത്രണം നീക്കി | Idukki Tourism Ban

ഇടുക്കി: ഇടുക്കി ജില്ലയിൽ കനത്ത മഴയ്ക്ക് ശമനമായതോടെ വിനോദസഞ്ചാര കേന്ദ്രങ്ങളിൽ ഏർപ്പെടുത്തിയിരുന്ന താൽക്കാലിക വിലക്കുകൾ ജില്ലാ ഭരണകൂടം നീക്കി. മുൻകരുതൽ നടപടിയുടെ ഭാഗമായി അടച്ചിട്ടിരുന്ന കേന്ദ്രങ്ങളാണ് വിനോദസഞ്ചാരികൾക്കായി വീണ്ടും തുറന്നുകൊടുത്തത്.(Idukki Tourism Ban Lifted Swell Surge Alert Kerala Coast)

ജില്ലയ്ക്ക് നൽകിയിരുന്ന റെഡ്, ഓറഞ്ച്, മഞ്ഞ അലർട്ടുകൾ കാലാവസ്ഥാ വകുപ്പ് പിൻവലിച്ച സാഹചര്യത്തിലാണ് ഈ തീരുമാനം. അടുത്ത ദിവസങ്ങളിൽ പ്രത്യേക മഴ മുന്നറിയിപ്പുകൾ ഇല്ലെങ്കിലും ബംഗാൾ ഉൾക്കടലിൽ രൂപപ്പെട്ട ചക്രവാതച്ചുഴി ഓഗസ്റ്റ് 12-ഓടെ ന്യൂനമർദ്ദമായി മാറാൻ സാധ്യതയുള്ളതിനാൽ ഓഗസ്റ്റ് 14 വരെ സംസ്ഥാനത്ത് നേരിയതോ മിതമായതോ ആയ മഴയ്ക്ക് സാധ്യതയുണ്ട്.

കള്ളക്കടൽ പ്രതിഭാസത്തിന്റെ ഭാഗമായി കേരളത്തിലെയും കന്യാകുമാരിയിലെയും തീരങ്ങളിൽ ഓഗസ്റ്റ് 11 രാത്രി 11.30 വരെ 1.0 മുതൽ 1.6 മീറ്റർ വരെ ഉയർന്ന തിരമാലകൾക്കും കടലാക്രമണത്തിനും സാധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം മുന്നറിയിപ്പ് നൽകി. തിരുവനന്തപുരം (കാപ്പിൽ മുതൽ പൊഴിയൂർ വരെ), കൊല്ലം (ആലപ്പാട്ട് മുതൽ ഇടവ വരെ), ആലപ്പുഴ (ചെല്ലാനം മുതൽ അഴീക്കൽ ജെട്ടി വരെ), തൃശൂർ (ആറ്റുപുറം മുതൽ കൊടുങ്ങല്ലൂർ വരെ), എറണാകുളം (മുനമ്പം മുതൽ മുറവക്കാട് വരെ) എന്നീ ജില്ലകളിലും കന്യാകുമാരി തീരത്തുമാണ് കടലാക്രമണ സാധ്യത.

Story Summary

The Idukki district administration lifted the temporary ban on tourism activities as heavy rains subsided and weather alerts were withdrawn. Meanwhile, INCOIS issued a ‘Kallakkadal’ (swell surge) alert for coastal districts across Kerala until August 11 night, advising against beach activities and urging safety precautions for fishermen.