മുട്ടിൽ മരംമുറി: വിശ്വാസവഞ്ചനാ കേസിൽ അഗസ്റ്റിൻ സഹോദരങ്ങൾ വിചാരണക്കോടതിയിൽ കീഴടങ്ങി | Muttil tree felling scam Anto Augustin surrender

കൊച്ചി: വയനാട് മുട്ടിൽ മരംമുറിയുമായി ബന്ധപ്പെട്ട വിശ്വാസവഞ്ചനാ കേസിൽ പ്രതികളായ അഗസ്റ്റിൻ സഹോദരങ്ങൾ വിചാരണക്കോടതിയിൽ കീഴടങ്ങി (Muttil tree felling scam Anto Augustin surrender). ചോറ്റാനിക്കര കോടതി ജാമ്യമില്ലാ അറസ്റ്റ് വാറന്റ് പുറപ്പെടുവിച്ചതിന് പിന്നാലെ മണിക്കൂറുകൾക്കുള്ളിലാണ് ആന്റോ അഗസ്റ്റിനും ജോസുകുട്ടി അഗസ്റ്റിനും കോടതിയിലെത്തി കീഴടങ്ങിയത്. കേസിലെ മറ്റൊരു പ്രതിയായ റോജി അഗസ്റ്റിനോട് വരുന്ന 13-ാം തീയതി ഹാജരാകാൻ കോടതി നിർദ്ദേശം നൽകിയിട്ടുണ്ട്.

വയനാട്ടിലെ മുട്ടിൽ, മേപ്പാടി പ്രദേശങ്ങളിൽ നിന്ന് നിയമവിരുദ്ധമായി മുറിച്ചുകടത്തിയ ഈട്ടിത്തടികൾ എറണാകുളത്തെ മരക്കമ്പനി ഉടമയായ അലിയാറിന് മറിച്ചുവിറ്റതുമായി ബന്ധപ്പെട്ടാണ് കേസ്. വനംവകുപ്പിന്റെ ഔദ്യോഗിക പാസ് ഉണ്ടെന്ന് തെറ്റിദ്ധരിപ്പിച്ചായിരുന്നു വിൽപ്പന നടത്തിയത്. തുടർന്ന് കേസ് വലിയ വിവാദമാവുകയും വനംവകുപ്പ് തടികൾ കസ്റ്റഡിയിലെടുക്കുകയും ചെയ്തു. പണം നഷ്ടപ്പെട്ട കമ്പനിയുടമയുടെ പരാതിയിൽ അമ്പലമേട് പോലീസാണ് പ്രതികൾക്കെതിരെ വിശ്വാസവഞ്ചനയ്ക്ക് കേസെടുത്തത്.

കേസിന്റെ തുടർനടപടികളുടെ ഭാഗമായി കുറ്റപത്രം വായിച്ചുകേൾക്കാൻ പ്രതികളോട് കോടതിയിൽ ഹാജരാകാൻ ആവശ്യപ്പെട്ടിരുന്നെങ്കിലും ഇവർ എത്തിയിരുന്നില്ല. ഇതിനെ തുടർന്നാണ് ചോറ്റാനിക്കര കോടതി അറസ്റ്റ് വാറന്റ് പുറപ്പെടുവിച്ചത്. വാറന്റ് ഉത്തരവ് വന്നതോടെ ആന്റോയും ജോസുകുട്ടിയും നേരിട്ട് കോടതിയിൽ ഹാജരാവുകയായിരുന്നു.

Story Summary:
The Augustin brothers, Anto and Josekutty, surrendered before the Chottanikkara court in a breach of trust case linked to the Muttil tree felling scam shortly after arrest warrants were issued against them.