ചർച്ചയ്ക്ക് ഞങ്ങൾ തയ്യാറാണെന്ന് സർക്കാർ, കാണേണ്ടത് അമിത് ഷായുടെ രാജിയെന്ന് പ്രതിപക്ഷം; പാർലമെന്റിൽ കയ്യാങ്കളി!

പാർലമെന്റിൽ സർക്കാരും പ്രതിപക്ഷവും തമ്മിലുള്ള പോര് പുതിയൊരു തലത്തിലേക്ക് എത്തിയിരിക്കുന്നു. ചർച്ചയ്ക്ക് സർക്കാർ സന്നദ്ധരായിട്ടും പ്രതിപക്ഷം ബോധപൂർവ്വം ഒളിച്ചോടുകയാണെന്ന ഗുരുതര ആരോപണവുമായി കേന്ദ്ര പാർലമെന്ററി കാര്യ മന്ത്രി കിരൺ റിജിജു രംഗത്ത് വന്നത് വലിയ രാഷ്ട്രീയ ചർച്ചയ്ക്കാണ് വഴിതുറന്നിരിക്കുന്നത്. പാർലമെന്ററി ജനാധിപത്യ ചരിത്രത്തിൽ ഇത്തരമൊരു സാഹചര്യം താൻ ആദ്യമായി കാണുകയാണെന്നും, ചർച്ചകളില്ലാതെ പാർലമെന്റിന് എങ്ങനെ പ്രവർത്തിക്കാനാകുമെന്നും അദ്ദേഹം ചോദിക്കുന്നു. ഡൽഹിയിലെ വിദ്യാർഥി പ്രക്ഷോഭവും പോലീസ് അതിക്രമങ്ങളും അടക്കമുള്ള വിഷയങ്ങൾ കത്തിനിൽക്കുന്നതിനിടയിലാണ് പാർലമെന്റിൽ ഈ നാടകീയ സംഭവങ്ങൾ അരങ്ങേറിയിരിക്കുന്നത്.

ഡൽഹിയിൽ നടന്ന വിദ്യാർഥി പ്രക്ഷോഭത്തെക്കുറിച്ചും പോലീസ് അതിക്രമങ്ങളെക്കുറിച്ചും ചർച്ച ചെയ്യാൻ സർക്കാർ പൂർണ്ണ സജ്ജമാണെന്ന് കിരൺ റിജിജു വ്യക്തമാക്കിയിരുന്നു. പ്രതിപക്ഷത്തിന്റെ എല്ലാ ആശങ്കകളും കേൾക്കാനും എല്ലാ ചോദ്യങ്ങൾക്കും മറുപടി നൽകാനുമായി ആഭ്യന്തര മന്ത്രി അമിത് ഷാ വൈകുന്നേരം മൂന്ന് മണി മുതൽ അടുത്ത ദിവസം മൂന്ന് മണി വരെ സഭയിലിരിക്കാൻ തയ്യാറാണെന്ന് അറിയിക്കുകയും ചെയ്തു. എന്നാൽ അമിത് ഷായുടെ പ്രഭാഷണം കേട്ടിരിക്കാൻ താൽപ്പര്യമില്ലെന്ന് വ്യക്തമാക്കി പ്രതിപക്ഷം ഈ വാഗ്ദാനം തള്ളിക്കളയുകയായിരുന്നു. സർക്കാരിന്റെ ഭാഗത്തുനിന്നും വെടിവെയ്പിനും അതിക്രമങ്ങൾക്കുമുള്ള ഉത്തരവ് നൽകിയത് ആരാണെന്ന വ്യക്തമായ മറുപടി മാത്രമാണ് തങ്ങൾക്ക് വേണ്ടതെന്നാണ് പ്രതിപക്ഷം നിലപാടെടുത്തത്.

ALSO READ;രാജാവിനും ഭയമോ..! ഇറാന്റെ വധഭീഷണി; എയർഫോഴ്സ് വൺ ഒഴിവാക്കി ട്രംപ്, പറന്നത് സൈനിക വിമാനത്തിൽ

ആഭ്യന്തര മന്ത്രി അമിത് ഷായ്ക്ക് സഭയിലേക്ക് വരാൻ ധൈര്യമില്ലെന്നും കഴിഞ്ഞ 20 ദിവസമായി അദ്ദേഹത്തെ കാണാനില്ലെന്നും കോൺഗ്രസ് നേതാവ് രാഹുൽ ഗാന്ധി തുറന്നടിച്ചു. വിദ്യാർഥികൾക്ക് നേരെ വെടിയുതിർക്കാനും ആണികളുള്ള ലാത്തികൾ ഉപയോഗിച്ച് തല്ലാനും ഉത്തരവിട്ടത് അമിത് ഷായാണോ എന്നും, എങ്കിൽ അദ്ദേഹം ഉടൻ രാജിവെക്കണമെന്നും രാഹുൽ ആവശ്യപ്പെട്ടു. അമിത് ഷായുടെ മൗനം അദ്ദേഹത്തിന്റെ കുറ്റസമ്മതമാണെന്നും പ്രതിപക്ഷം ഒറ്റക്കെട്ടായി കുറ്റപ്പെടുത്തുന്നു. സഭയിൽ പ്ലക്കാർഡുകൾ ഉയർത്തുന്നതും മുദ്രാവാക്യം വിളിക്കുന്നതും മാത്രമാണ് കോൺഗ്രസ് എംപിമാരുടെ ജോലിയെന്ന് കുറ്റപ്പെടുത്തിയ കിരൺ റിജിജു, മുദ്രാവാക്യങ്ങളും അസഭ്യവർഷവും പാർലമെന്റിന്റെ അന്തസിന് ചേർന്നതല്ലെന്നും ഓർമ്മിപ്പിച്ചു.

ചർച്ചകൾക്ക് സർക്കാർ വാതിലുകൾ തുറന്നിട്ടിട്ടും പ്രതിപക്ഷം ബഹളം വെച്ച് സഭ സ്തംഭിപ്പിക്കുന്ന രീതി ജനാധിപത്യത്തിന് ഭൂഷണമല്ലെന്നാണ് ഭരണപക്ഷത്തിന്റെ വാദം. എന്നാൽ സുപ്രധാന വിഷയങ്ങളിൽ കൃത്യമായ മറുപടി നൽകാതെ ഒളിച്ചുകളി തുടരുന്ന സർക്കാരിനെതിരെ ശക്തമായ നിലപാടുമായി മുന്നോട്ട് പോകാൻ തന്നെയാണ് പ്രതിപക്ഷത്തിന്റെ തീരുമാനം.

LATEST VIDEO…

The post ചർച്ചയ്ക്ക് ഞങ്ങൾ തയ്യാറാണെന്ന് സർക്കാർ, കാണേണ്ടത് അമിത് ഷായുടെ രാജിയെന്ന് പ്രതിപക്ഷം; പാർലമെന്റിൽ കയ്യാങ്കളി! appeared first on Express Kerala.