‘രാമായണം’ ട്രെയിലറിലെ സിജിഐ പോരായ്മകൾക്ക് പിന്നിലെ സത്യം; വിമർശകർക്ക് ചുട്ട മറുപടിയുമായി രൺബീർ കപൂർ!

ബോളിവുഡിന്റെ ഏറ്റവും വലിയ ബിഗ് ബജറ്റ് ചിത്രങ്ങളിലൊന്നായ രൺബീർ കപൂറിന്റെ ‘രാമായണം’ ടീസറും ട്രെയിലറും പുറത്തുവന്നതുമുതൽ വലിയ ചർച്ചകളാണ് സമൂഹമാധ്യമങ്ങളിൽ നടക്കുന്നത്. ചിത്രത്തിന്റെ വലിയ ക്യാൻവാസും ദൃശ്യവിസ്മയങ്ങളും പലരും പ്രശംശിച്ചപ്പോൾ, മറ്റൊരു വിഭാഗം അതിലെ വിഷ്വൽ എഫക്റ്റുകളെയും (CGI) സിജിഐ ജോലികളെയും രൂക്ഷമായി വിമർശിക്കുകയുണ്ടായി. ഈ ഓൺലൈൻ വിമർശകർക്കും ‘സിജി ക്രിട്ടിക്കുകൾക്കും’ എതിരെ കൃത്യമായ മറുപടിയുമായി ഇപ്പോൾ നടൻ രൺബീർ കപൂർ തന്നെ നേരിട്ട് രംഗത്തെത്തിയിരിക്കുകയാണ്. ചിത്രത്തിന്റെ നിർമ്മാതാവ് നമീത് മൽഹോത്രയും വിമർശനങ്ങൾക്ക് കൃത്യമായ വിശദീകരണവുമായി എത്തിയിട്ടുണ്ട്.

കോളിവുഡിന് നൽകിയ അഭിമുഖത്തിലാണ് രൺബീർ കപൂർ ഓൺലൈൻ വിമർശനങ്ങളോട് പ്രതികരിച്ചത്. അടുത്ത കാലത്തായി ട്രെയിലറുകൾ കണ്ടയുടൻ അതൊന്നും പോരെന്നും ശരിയായില്ലെന്നും കുറ്റപ്പെടുത്താൻ മാത്രമായി ഒരു വിഭാഗം ആളുകൾ രംഗത്തുണ്ടെന്ന് അദ്ദേഹം പറഞ്ഞു. എഐയുടെ വരവോടെ ആളുകൾക്ക് സിജിഐയെക്കുറിച്ച് കൂടുതൽ അവബോധം വന്നിട്ടുണ്ടെങ്കിലും, ട്രെയിലർ മാത്രം കണ്ട് ഒരു സിനിമയുടെ ആത്മാർത്ഥതയെ അളക്കുന്നത് ശരിയല്ലെന്ന് രൺബീർ വ്യക്തമാക്കി. സംവിധായകൻ നിതീഷ് തിവാരിയും നിർമ്മാതാവ് നമീത്തും ആകാശത്തിന്റെ ഒരു ചെറിയ നിറം ശരിയാക്കാൻ പോലും വർഷങ്ങളോളം കഠിനാധ്വാനം ചെയ്യുന്നത് താൻ നേരിട്ട് കണ്ടിട്ടുണ്ടെന്നും, കഷ്ടപ്പെട്ട് ചെയ്യുന്ന ഇത്തരം ജോലികളെ നിസ്സാരമായി കാണുന്നത് തമാശയാണെന്നും അദ്ദേഹം കൂട്ടിച്ചേർത്തു.

ALSO READ;മനുഷ്യനെ ഞെട്ടിക്കുന്ന വിചിത്രവും ഭയാനകവുമായ ബഹിരാകാശ രഹസ്യങ്ങൾ!

ചിത്രത്തിന്റെ നിർമ്മാതാവായ നമീത് മൽഹോത്രയും ഈ വിഷയത്തിൽ തന്റെ നിലപാട് വ്യക്തമാക്കിയിട്ടുണ്ട്. ചെറിയ മൊബൈൽ സ്ക്രീനുകളിലും മോശം ഇന്റർനെറ്റ് കണക്ഷനുകളിലും വെച്ച് സിനിമയുടെ ദൃശ്യങ്ങൾ വിധി എഴുതുന്നത് ശരിയല്ലെന്നാണ് അദ്ദേഹം പറയുന്നത്. മുൻപ് ടീസർ ഇറങ്ങിയപ്പോഴും സമാനമായ വിമർശനങ്ങൾ ഉയർന്നിരുന്നുവെങ്കിലും, വലിയ ഐമാക്സ് (IMAX) സ്ക്രീനുകളിൽ 3D പതിപ്പ് കണ്ടപ്പോൾ ആളുകളുടെ അഭിപ്രായം പൂർണ്ണമായി മാറിയെന്ന് അദ്ദേഹം ഓർമ്മിപ്പിച്ചു. ക്രിസ്റ്റഫർ നോളൻ ചിത്രങ്ങളുമായി സഹകരിച്ചുള്ള അനുഭവങ്ങൾ മുൻനിർത്തി, വലിയ തിയേറ്റർ അനുഭവത്തിനായി ദീർഘകാലം കോടിക്കണക്കിന് ഡോളർ മുടക്കി തയാറാക്കുന്ന ഇത്തരം ദൃശ്യങ്ങൾ തിയേറ്ററുകളിൽ വന്ന് കണ്ടശേഷം വിലയിരുത്താൻ അദ്ദേഹം ആഹ്വാനം ചെയ്തു.

നിതീഷ് തിവാരിയുടെ സംവിധാനത്തിൽ രണ്ട് ഭാഗങ്ങളായാണ് ‘രാമായണം’ ഒരുങ്ങുന്നത്. ചിത്രത്തിൽ രാമനായി രൺബീർ കപൂറും സീതയായി സായ് പല്ലവിയും രാവണനായി യാഷും വേഷമിടുന്നു. ഒപ്പം രവി ദുബേ (ലക്ഷ്മണൻ), സണ്ണി ഡിയോൾ (ഹനുമാൻ) തുടങ്ങി വൻതാരനിരയാണ് ചിത്രത്തിലുള്ളത്. ഇതിന്റെ ആദ്യ ഭാഗം 2026 ദീപാവലി റിലീസായി തിയേറ്ററുകളിലെത്തുമെന്നാണ് പ്രതീക്ഷിക്കുന്നത്.

The post ‘രാമായണം’ ട്രെയിലറിലെ സിജിഐ പോരായ്മകൾക്ക് പിന്നിലെ സത്യം; വിമർശകർക്ക് ചുട്ട മറുപടിയുമായി രൺബീർ കപൂർ! appeared first on Express Kerala.