എയർഫോഴ്സ് വൺ മാറ്റി മറ്റൊരു വിമാനത്തിൽ ട്രംപിന്റെ യാത്ര; വിമാനത്തിന് മിസൈൽ ഭീഷണി ഉണ്ടായതായി റിപ്പോർട്ട് | Donald Trump missile threat Turkey

വാഷിങ്ടൺ: അമേരിക്കൻ പ്രസിഡന്റ് ഡൊണാൾഡ് ട്രംപിനെ ലക്ഷ്യമിട്ട് തോളിൽനിന്ന് പ്രയോഗിക്കാവുന്ന മിസൈൽ ആക്രമണത്തിന് വിശ്വസനീയവും അടിയന്തരവുമായ ഭീഷണി ലഭിച്ചതിനെ തുടർന്നാണ് തുർക്കി സന്ദർശനത്തിനിടെ അദ്ദേഹത്തെ രഹസ്യമായി മറ്റൊരു വിമാനത്തിലേക്ക് മാറ്റിയതെന്ന് റിപ്പോർട്ട് (Donald Trump missile threat Turkey). അങ്കാറയിൽ നടന്ന നാറ്റോ ഉച്ചകോടിയുടെ അവസാന ദിവസമാണ് സുരക്ഷാ ഏജൻസി ഭീഷണി വിലയിരുത്തി അസാധാരണ സുരക്ഷാ നടപടി സ്വീകരിച്ചതെന്നാണ് വിവരം.

ജൂലൈ 8ന് തുർക്കിയിൽ നിന്ന് മടങ്ങുന്നതിനിടെ ട്രംപും ഏതാനും അടുത്ത സഹായികളും വലിയ നീല-വെളുപ്പ് പ്രസിഡൻഷ്യൽ വിമാനമായ എയർഫോഴ്സ് വൺ ഉപേക്ഷിച്ച് ചെറിയ C-32A വിമാനത്തിലേക്ക് മാറുകയായിരുന്നു. കാറ്ററിങ് ട്രക്കിന്റെ മറവിലാണ് വിമാനമാറ്റം നടത്തിയത്. ഭീഷണി നേരിടാൻ ഉദ്യോഗസ്ഥർക്ക് വളരെ കുറച്ച് സമയം മാത്രമേ ലഭിച്ചിരുന്നുള്ളൂവെന്നും അവസാന നിമിഷമാണ് പദ്ധതി തയ്യാറാക്കിയതെന്നും റിപ്പോർട്ടിൽ പറയുന്നു.

അതേസമയം, ട്രംപ് യാത്ര ചെയ്യുന്നതായി തോന്നിക്കുന്ന എയർഫോഴ്സ് വൺ പ്രത്യേകം പുറപ്പെട്ടു. സ്റ്റേറ്റ് സെക്രട്ടറി മാർക്കോ റൂബിയോ, ട്രഷറി സെക്രട്ടറി സ്കോട്ട് ബെസന്റ്, വൈറ്റ് ഹൗസ് ജീവനക്കാർ, 13 അംഗ മാധ്യമസംഘം എന്നിവരായിരുന്നു ഈ വിമാനത്തിലുണ്ടായിരുന്നത്. ട്രംപിന്റെ യഥാർഥ യാത്ര രഹസ്യമാക്കി സൂക്ഷിക്കുകയായിരുന്നു നീക്കത്തിന്റെ ലക്ഷ്യം. വിമാനത്തിൽ സഞ്ചരിച്ചിരുന്ന ചില ഉദ്യോഗസ്ഥർക്ക് വിമാനമാറ്റത്തെക്കുറിച്ച് അറിവുണ്ടായിരുന്നുവെന്നും റിപ്പോർട്ടുണ്ട്.
ഭീഷണിയുടെ ഉറവിടം അധികൃതർ വ്യക്തമാക്കിയിട്ടില്ല. ട്രംപിനെതിരെ ആക്രമണം നടത്താനുള്ള വ്യക്തമായ പ്രവർത്തനപദ്ധതി ശത്രുപക്ഷത്തിനുണ്ടായിരുന്നില്ലെന്നും, ആക്രമിക്കാനുള്ള ഉദ്ദേശം മാത്രമാണ് കണ്ടെത്തിയതെന്നും വിഷയത്തെക്കുറിച്ച് അറിവുള്ള മറ്റൊരു വ്യക്തി പറഞ്ഞു. അതിനാലാണ് വിമാനങ്ങൾ പറക്കാൻ അനുവദിച്ചതെന്നും അദ്ദേഹം വ്യക്തമാക്കി.

ട്രംപ് പിന്നീട് വിമാനമാറ്റം സുരക്ഷാ ഏജൻസിയുടെ നിർദേശപ്രകാരമായിരുന്നുവെന്ന് സ്ഥിരീകരിച്ചു. അങ്കാറയിൽ നിന്ന് ബ്രിട്ടനിലെ ഇന്ധനം നിറയ്ക്കാനുള്ള സ്റ്റോപ്പിലേക്ക് അദ്ദേഹം സുരക്ഷിതമായി യാത്ര ചെയ്തു. എന്നാൽ താൻ സഞ്ചരിച്ച ചെറിയ വിമാനത്തിനായിരുന്നു കൂടുതൽ അപകടസാധ്യത ഉണ്ടായിരുന്നതെന്ന് ട്രംപ് അവകാശപ്പെട്ടെങ്കിലും അതിന് തെളിവുകളൊന്നും അദ്ദേഹം നൽകിയില്ല. വിമാന എൻജിനുകളുടെ ചൂട് പിന്തുടർന്ന് ലക്ഷ്യം കണ്ടെത്തുന്ന ഹീറ്റ് സീക്കിങ് മിസൈലുകളായിരിക്കാം ഭീഷണിയുടെ സാധ്യതയെന്ന് സൈനിക വിദഗ്ധർ വിലയിരുത്തുന്നു. റഡാർ അധിഷ്ഠിത ആയുധങ്ങളിൽ നിന്ന് വ്യത്യസ്തമായി ഇത്തരം മിസൈലുകൾ റേഡിയോ തരംഗങ്ങൾ പുറപ്പെടുവിക്കാത്തതിനാൽ അവ നേരത്തെ കണ്ടെത്തുന്നത് ബുദ്ധിമുട്ടായേക്കാം. ഇറാനുമായി ബന്ധപ്പെട്ട SA-67 പോലുള്ള സംവിധാനങ്ങളും റഷ്യൻ നിർമ്മിത 9K333 Verba പോലുള്ള തോളിൽനിന്ന് പ്രയോഗിക്കാവുന്ന ആയുധങ്ങളും വിദഗ്ധർ ഉദാഹരണമായി ചൂണ്ടിക്കാട്ടി.

ഉയർന്ന സുരക്ഷാ ഭീഷണിയുള്ള മേഖലകളിൽ അമേരിക്കൻ പ്രസിഡന്റുമാർ രഹസ്യമായി യാത്ര ചെയ്തിട്ടുള്ള സംഭവങ്ങൾ മുമ്പുമുണ്ടെങ്കിലും, ഇത്തവണത്തെ നടപടി വളരെ കുറഞ്ഞ സമയത്തിനുള്ളിൽ ആസൂത്രണം ചെയ്തതാണെന്നാണ് റിപ്പോർട്ട്. ട്രംപിനെ വഹിക്കുന്നതായി കരുതപ്പെട്ട വിമാനത്തിൽ മാധ്യമപ്രവർത്തകരും മുതിർന്ന ഉദ്യോഗസ്ഥരും യാത്ര ചെയ്തതിനാൽ, അവരെ അപകടത്തിലാക്കിയോ എന്ന ചോദ്യവും പിന്നീട് ഉയർന്നു. ഇറാനുമായുള്ള സംഘർഷം ശക്തമായിരുന്ന സാഹചര്യത്തിൽ ട്രംപിന്റെ യഥാർഥ യാത്ര രഹസ്യമാക്കി സൂക്ഷിക്കേണ്ടത് അദ്ദേഹത്തിന്റെ സുരക്ഷയ്ക്ക് ഏറ്റവും ഉചിതമാണെന്ന് വിലയിരുത്തിയതായാണ് ബന്ധപ്പെട്ട വൃത്തങ്ങൾ പറയുന്നത്. സംഭവത്തിൽ തുർക്കി അധികൃതർ ഇതുവരെ ഔദ്യോഗിക പ്രതികരണം നടത്തിയിട്ടില്ല.

Summary: A credible and imminent missile threat reportedly prompted the US Secret Service to secretly move President Donald Trump from Air Force One to a smaller C-32A jet during his July visit to Turkey. Air Force One continued separately with senior officials and journalists while Trump’s actual movements were concealed amid heightened tensions with Iran.