വമ്പൻ ബാറ്ററിയും 120Hz ഡിസ്‌പ്ലേയും; ബോൾട്ട് ഏസ് 5G, ഇവോ 4G ഓഗസ്റ്റ് 25-ന് ഇന്ത്യയിലെത്തുന്നു!

ബോൾട്ട് ഏസ് 5ജി, ബോൾട്ട് ഇവോ 4ജി എന്നീ പുതിയ സ്‍മാർട്ട്ഫോണുകൾ ഇന്ത്യൻ വിപണിയിൽ അവതരിപ്പിക്കാൻ ഒരുങ്ങി പ്രമുഖ ബ്രാൻഡ്. ഓഗസ്റ്റ് 25-ന് ഉച്ചയ്ക്ക് 12 മണിക്ക് ഔദ്യോഗികമായി ലോഞ്ച് ചെയ്യുന്ന ഈ ഫോണുകൾ പ്രമുഖ ഇ-കൊമേഴ്സ് പ്ലാറ്റ്‌ഫോമായ ഫ്ലിപ്‍കാർട്ട് വഴിയാണ് വിൽപ്പനയ്‌ക്കെത്തുന്നത്. ലോഞ്ചിന് മുന്നോടിയായി സ്മാർട്ട്ഫോണുകളുടെ പ്രധാന ഡിസ്‌പ്ലേ, ബാറ്ററി സവിശേഷതകൾ കമ്പനി ഇതിനോടകം തന്നെ പുറത്തുവിട്ടിട്ടുണ്ട്.

രണ്ട് ഫോണുകളിലും 6000 mAh ശേഷിയുള്ള വമ്പൻ ബാറ്ററിയാണ് ഉൾപ്പെടുത്തിയിരിക്കുന്നത്. ഇതിൽ ബോൾട്ട് ഏസ് 5ജിയിൽ 18 വാട്ട് അതിവേഗ ചാർജിങ് പിന്തുണയും ബോക്സിനൊപ്പം ചാർജറും ലഭിക്കും. 500-ലധികം ചാർജിങ് സൈക്കിളുകൾ ശേഷവും ബാറ്ററിയുടെ ആരോഗ്യം 80 ശതമാനത്തിന് മുകളിൽ നിലനിൽക്കുമെന്നും, അമിത ചാർജിങ്, വോൾട്ടേജ് വ്യതിയാനം തുടങ്ങിയവയിൽ നിന്ന് സുരക്ഷ ഉറപ്പാക്കുന്ന സംവിധാനങ്ങൾ ഇതിലുണ്ടെന്നും കമ്പനി അവകാശപ്പെടുന്നു. ഡിസ്‌പ്ലേയുടെ കാര്യത്തിൽ ഏസ് 5ജിയിൽ 6.79 ഇഞ്ചും ഇവോയിൽ 6.78 ഇഞ്ചുമുള്ള എച്ച്ഡി പ്ലസ് ഡിസ്‌പ്ലേയാണുള്ളത്. രണ്ടിനും 120 ഹെർട്സ് റിഫ്രഷ് നിരക്കും 600 നിറ്റ്സ് പരമാവധി തെളിച്ചവുമുണ്ട്.

Also Read: അരമണിക്കൂർ പറക്കാൻ 500 രൂപയുടെ വൈദ്യുതി മാത്രം! ഇലക്ട്രിക് വിമാനവുമായി അമേരിക്കൻ കമ്പനി; വിമാനയാത്ര ഇനി എളുപ്പമാകുമോ?

ക്യാമറ വിഭാഗത്തിൽ ബോൾട്ട് ഏസ് 5ജിയിൽ f/1.8 അപ്പർച്ചറുള്ള 64 മെഗാപിക്സൽ എഐ പ്രധാന ക്യാമറയും, ഇവോ 4ജിയിൽ 50 മെഗാപിക്സൽ പ്രധാന ക്യാമറയുമാണുള്ളത്. രണ്ടിലും 8 മെഗാപിക്സൽ മുൻ ക്യാമറയാണ് നൽകിയിട്ടുള്ളത്. മികച്ച ഫോട്ടോഗ്രഫിക്കായി ഫേസ് അൺബ്ലർ, നൈറ്റ് മോഡ് തുടങ്ങിയ ഗൂഗിളിന്റെ എഐ ഇമേജിങ് ഫീച്ചറുകൾക്ക് പുറമെ സർക്കിൾ ടു സെർച്ച്, ഗൂഗിൾ ലെൻസ് സൗകര്യങ്ങളും ഫോണുകളിൽ ലഭ്യമാകും. ഫോണുകളുടെ വില ഉൾപ്പെടെയുള്ള കൂടുതൽ വിവരങ്ങൾ ഓഗസ്റ്റ് 25-ലെ ഔദ്യോഗിക ലോഞ്ചോടെ അറിയാൻ സാധിക്കും.

The post വമ്പൻ ബാറ്ററിയും 120Hz ഡിസ്‌പ്ലേയും; ബോൾട്ട് ഏസ് 5G, ഇവോ 4G ഓഗസ്റ്റ് 25-ന് ഇന്ത്യയിലെത്തുന്നു! appeared first on Express Kerala.