യുഎഇയിൽ വൻ ഹിറ്റായി റോബോടാക്‌സികൾ; വരുന്നത് വൻ വിപ്ലവം?

ദുബായിൽ ഡ്രൈവർമാരില്ലാത്ത റോബോടാക്‌സി സർവീസുകൾ വൻ വിജയത്തിലേക്ക്. ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി ആരംഭിച്ച ഈ ആധുനിക യാത്രാസംവിധാനം ഇതിനോടകം 40 ലക്ഷത്തിലധികം കിലോമീറ്ററുകളാണ് വിജയകരമായി പൂർത്തിയാക്കിയത്. ഇതുവരെ 7,613-ലധികം യാത്രക്കാർ റോബോടാക്‌സികളുടെ സേവനം പ്രയോജനപ്പെടുത്തിക്കഴിഞ്ഞു. നിലവിൽ 144 വാഹനങ്ങളുള്ള ഈ പദ്ധതിയിൽ 48 എണ്ണം സജീവമായി നിരത്തിലുണ്ട്. പ്രതിദിനം ശരാശരി 50 യാത്രകൾ നടത്തുന്ന സർവീസിന് 97 ശതമാനം ഉപഭോക്തൃ സംതൃപ്തി നേടാനായതും വലിയ നേട്ടമായി വിലയിരുത്തപ്പെടുന്നു.

ദുബായിലെ ജനസംഖ്യ 40 ലക്ഷം പിന്നിട്ടതോടെ പൊതുഗതാഗത സംവിധാനങ്ങൾ ഉപയോഗിക്കുന്നവരുടെ എണ്ണത്തിലും വലിയ വർധനവുണ്ടായിട്ടുണ്ട്. 2026-ന്റെ ആദ്യ പകുതിയിൽ മാത്രം 34.8 കോടി ആളുകളാണ് നഗരത്തിലെ പൊതുഗതാഗതത്തെ ആശ്രയിച്ചത്. ചൈനീസ് ടെക് കമ്പനികളായ ബൈഡുവിന്റെ അപ്പോളോ ഗോ, വീറൈഡ്, പോണി.എഐ എന്നിവരുമായും പ്രമുഖ റൈഡ് ഹെയ്‌ലിങ് പ്ലാറ്റ്‌ഫോമായ ഊബറുമായും സഹകരിച്ചാണ് ആർടിഎ പദ്ധതി മുന്നോട്ട് കൊണ്ടുപോകുന്നത്. തെരഞ്ഞെടുത്ത മേഖലകളിൽ ഊബർ ആപ്പ് വഴി റോബോടാക്‌സികൾ ബുക്ക് ചെയ്യാനുള്ള സൗകര്യവും ലഭ്യമാണ്.

Also Read: ചുട്ടുപഴുത്ത് ദുബൈ; കൊടുംചൂടിന്റെ കാലം കഴിഞ്ഞോ, ഇനി തണുപ്പുകാലം എത്തും?

കൃത്യമായ റോഡ് സുരക്ഷയും സാങ്കേതിക കൃത്യതയും ഉറപ്പുവരുത്തിയാണ് നിശ്ചിത മേഖലകളിൽ നിലവിൽ സർവീസ് നടത്തുന്നത്. 2030-ഓടെ ദുബായിലെ ആകെ യാത്രകളുടെ 25 ശതമാനവും സ്വയം നിയന്ത്രിത വാഹനങ്ങളിലാക്കുക എന്ന ലക്ഷ്യത്തിലേക്കുള്ള നിർണായക ചുവടുവെപ്പാണ് ഈ വിജയമെന്ന് അധികൃതർ വ്യക്തമാക്കി. ഘട്ടം ഘട്ടമായി കൂടുതൽ മേഖലകളിലേക്ക് സർവീസ് വ്യാപിപ്പിക്കാനാണ് ആർടിഎ ലക്ഷ്യമിടുന്നത്.

The post യുഎഇയിൽ വൻ ഹിറ്റായി റോബോടാക്‌സികൾ; വരുന്നത് വൻ വിപ്ലവം? appeared first on Express Kerala.