പാഠപുസ്തകങ്ങളിൽ ‘കാവിവൽക്കരണ’ ഭീതി! പൊളിറ്റിക്കൽ സയൻസ് പാഠപുസ്തക സമിതി പുനഃസംഘടിപ്പിച്ചു

തിരുവനന്തപുരം: 11, 12 ക്ലാസുകളിലെ പൊളിറ്റിക്കൽ സയൻസ് പാഠപുസ്തകങ്ങൾ തയ്യാറാക്കുന്നതിനായുള്ള എൻസിആർടി പാഠപുസ്തക സമിതി പുനഃസംഘടിപ്പിച്ചു. സമിതിയിലെ ആകെ 20 അംഗങ്ങളിൽ നാല് പേർക്ക് രാഷ്ട്രീയ സ്വയംസേവക് സംഘവുമായി (ആർഎസ്എസ്) അടുത്ത ബന്ധമുണ്ടെന്നാണ് പുറത്തുവരുന്ന റിപ്പോർട്ടുകൾ വ്യക്തമാക്കുന്നത്. ചരിത്രം വളച്ചൊടിക്കുന്നുവെന്നും പാഠപുസ്തകങ്ങളിൽ കാവിവൽക്കരണം കൊണ്ടുവരുന്നുവെന്നുമുള്ള വലിയ ആരോപണങ്ങളും വിവാദങ്ങളും നിലനിൽക്കുന്ന പശ്ചാത്തലത്തിലാണ് ഈ പുനഃസംഘടന നടന്നിരിക്കുന്നത്.

രാജ്യത്തെ പ്രമുഖ സർവ്വകലാശാലകളിലെയും സ്കൂളുകളിലെയും അധ്യാപകരും എൻസിആർടിയുടെ വിദഗ്ധരും അടങ്ങുന്നതാണ് പുതിയ ഇരുപതംഗ സമിതി. ഡൽഹി ജെഎൻയു, ഡൽഹി യൂണിവേഴ്സിറ്റി, ഇഗ്നൗ, നാഷണൽ ലോ യൂണിവേഴ്സിറ്റി, ജിൻഡാൽ ഗ്ലോബൽ ലോ സ്കൂൾ, പുതുച്ചേരി യൂണിവേഴ്സിറ്റി, ഉത്കൽ യൂണിവേഴ്സിറ്റി എന്നിവിടങ്ങളിൽ നിന്നുള്ള അധ്യാപകർ ഈ സമിതിയുടെ ഭാഗമായിട്ടുണ്ട്.

Also Read:കേന്ദ്ര സർവീസിൽ മികച്ച കരിയർ ആഗ്രഹിക്കുന്നവർക്ക് സുവർണ്ണാവസരം; യുപിഎസ്‌സി എപിഎഫ്‌സി വിജ്ഞാപനം പുറത്തിറങ്ങി

പുതുതായി സമിതിയിൽ ഉൾപ്പെട്ട ആർഎസ്എസ് ബന്ധമുള്ള നാല് പേരിൽ പ്രമുഖർ എബിവിപിയുടെ മുൻ ഭാരവാഹികളാണ്. എബിവിപി മുൻ ദേശീയ സെക്രട്ടറിയും ജെഎൻയു പ്രൊഫസറുമായ വന്ദന മിശ്ര, എബിവിപിയിൽ സംഘടനാ ചുമതലകൾ വഹിച്ചിരുന്ന ദേഷ്പാണ്ഡേ എന്നിവർ സമിതിയിലുണ്ട്. ഇവരെക്കൂടാതെ ആർഎസ്എസുമായി അടുത്ത ബന്ധം പുലർത്തുന്ന പ്രശാന്ത് ദിവേക്കർ, രവി രാമചന്ദ്ര ശുക്ല എന്നിവരും പുതിയ അംഗങ്ങളായി എത്തിയിട്ടുണ്ട്.

പുതുതായി പുനഃസംഘടിപ്പിച്ച സമിതിയോട് നിശ്ചിത സമയപരിധിക്കുള്ളിൽ പ്രവർത്തനങ്ങൾ പൂർത്തിയാക്കാൻ കേന്ദ്ര വിദ്യാഭ്യാസ മന്ത്രാലയവും എൻസിആർടിയും നിർദ്ദേശം നൽകിയിട്ടുണ്ട്. ഇതനുസരിച്ച് പതിനൊന്നാം ക്ലാസിലെ പൊളിറ്റിക്കൽ സയൻസ് പാഠപുസ്തകം ഈ വർഷം നവംബർ 30-നകം പരിഷ്കരിക്കണം. പന്ത്രണ്ടാം ക്ലാസിലെ പുസ്തകത്തിന്റെ പുനഃസംഘടന അടുത്ത വർഷം ജൂലായ് 30-നകം പൂർത്തിയാക്കാനുമാണ് നിർദ്ദേശം. അതേസമയം, സമിതിയിലേക്ക് ആർഎസ്എസ് അനുകൂലികളെ തിരുകിക്കയറ്റിയതിനെതിരെ ഇതിനോടകം വലിയ രീതിയിലുള്ള പ്രതിഷേധങ്ങളും ആശങ്കകളും ഉയർന്നുതുടങ്ങിയിട്ടുണ്ട്.

The post പാഠപുസ്തകങ്ങളിൽ ‘കാവിവൽക്കരണ’ ഭീതി! പൊളിറ്റിക്കൽ സയൻസ് പാഠപുസ്തക സമിതി പുനഃസംഘടിപ്പിച്ചു appeared first on Express Kerala.