ഗുജറാത്തിലെ ഭാവ്നഗർ വിഷമദ്യ ദുരന്തം: മരണസംഖ്യ 7 ആയി; 21 പേർക്കെതിരെ FIR | Bhavnagar Spurious Liquor Tragedy

ഭാവ്നഗർ: ഗുജറാത്തിലെ ഭാവ്നഗർ ജില്ലയിലുണ്ടായ വിഷമദ്യ ദുരന്തത്തിൽ മരണസംഖ്യ ഏഴായി ഉയർന്നു. സംഭവത്തിൽ 21 പേർക്കെതിരെ പോലീസ് കേസ് എടുത്തു. പ്രമുഖ ബ്രാൻഡിന്റെ വ്യാജ ലേബലിൽ എത്തിച്ച വിഷമദ്യത്തിൽ 38.59 ശതമാനം മെഥനോൾ അടങ്ങിയിരുന്നതായി ഫോറൻസിക് പരിശോധനയിൽ തെളിഞ്ഞു.(Bhavnagar Spurious Liquor Tragedy Death Toll Rises To Seven FIR Against 21)

മധ്യപ്രദേശിലെ ഉജ്ജയിൻ, അഹമ്മദാബാദ് എന്നിവിടങ്ങളിൽ നിന്ന് വ്യാജ നിർമ്മാണത്തിനാവശ്യമായ മദ്യവും രാസവസ്തുക്കളും സീലുകളും എത്തിച്ചാണ് ഭാവ്നഗറിലെ വർത്തേജ് മേഖലയിൽ വെച്ച് നിർമ്മാണം നടത്തിയത്. വ്യാജ നിർമ്മാണത്തിനായി ‘ഡോക്ടർ’ എന്നറിയപ്പെടുന്ന നരേന്ദ്രസിംഗ് യാദവ് എന്ന വിദഗ്ദ്ധന്റെ സഹായം സംഘം തേടിയിരുന്നു. ഉജ്ജയിൻ, വർത്തെജ്, ഖരക്ഡി കേന്ദ്രീകരിച്ച് പ്രവർത്തിക്കുന്ന വലിയൊരു ഏജന്റ് ശൃംഖല വഴിയാണ് ഈ വിഷമദ്യം ഗ്രാമീണ മേഖലകളിൽ വിതരണം ചെയ്തത്.

ഖരക്ഡി ഗ്രാമത്തിൽ നടന്ന ആഘോഷച്ചടങ്ങിൽ പങ്കെടുത്തവർ വിഷമദ്യം കഴിച്ച് ഛർദ്ദിയും ശ്വാസതടസ്സവും അനുഭവപ്പെട്ട് ആശുപത്രിയിലായതോടെയാണ് ദുരന്തം പുറത്തറിയുന്നത്. ഭാരതീയ ന്യായ സംഹിത, ഗുജറാത്ത് മദ്യനിരോധന നിയമം എന്നിവയിലെ വിവിധ വകുപ്പുകൾ പ്രകാരമാണ് കേസെടുത്തിരിക്കുന്നത്. ഗുജറാത്ത് പോലീസിന്റെ സ്റ്റേറ്റ് മോണിറ്ററിംഗ് സെൽ കേസ് ഏറ്റെടുത്ത് സമഗ്ര അന്വേഷണം ആരംഭിച്ചു.

Story Summary

The death toll in the Bhavnagar spurious liquor tragedy in Gujarat has risen to seven, with an FIR registered against 21 accused. Forensic analysis revealed 38.59% lethal methanol in counterfeit bottles supplied through an inter-state syndicate spanning Madhya Pradesh and Gujarat.