പെറുവിൽ 6.7 തീവ്രതയുള്ള ഭൂചലനം; കെട്ടിടങ്ങൾക്ക് നാശനഷ്ടം, 9,000 വീടുകളിൽ വൈദ്യുതി മുടങ്ങി | Peru earthquake

പെറുവിൽ ശക്തമായ ഭൂചലനം. തെക്കൻ അയാക്കുചോ മേഖലയിലെ അനിസോയ്ക്ക് സമീപം വ്യാഴാഴ്ചയുണ്ടായ ഭൂചലനത്തിൽ മൂന്ന് പേർക്ക് പരുക്കേറ്റു. യുഎസ് ജിയോളജിക്കൽ സർവേയുടെ കണക്കനുസരിച്ച് റിക്ടർ സ്കെയിലിൽ 6.7 തീവ്രത രേഖപ്പെടുത്തിയ ഭൂചലനം 100 കിലോമീറ്റർ ആഴത്തിലാണ് ഉണ്ടായത് (Peru earthquake).
ഭൂചലനത്തിൽ 22 വീടുകൾക്കും ആറ് സ്കൂളുകൾക്കും കേടുപാടുകൾ സംഭവിച്ചതായി പെറുവിലെ പ്രതിരോധമന്ത്രി റാഫേൽ ബെലൗണ്ടെ അറിയിച്ചു. അയാക്കുചോ മേഖലയിൽ 10 ആരോഗ്യകേന്ദ്രങ്ങൾക്കും സമീപത്തെ കുസ്കോ മേഖലയിൽ രണ്ട് ആരോഗ്യകേന്ദ്രങ്ങൾക്കും നാശനഷ്ടമുണ്ടായെങ്കിലും ഇവയുടെ പ്രവർത്തനം തുടരുന്നുണ്ട്.

ഏകദേശം 9,000 കെട്ടിടങ്ങളിൽ വൈദ്യുതി മുടങ്ങിയതായി പെറുവിലെ നാഷണൽ ഇൻസ്റ്റിറ്റ്യൂട്ട് ഓഫ് സിവിൽ ഡിഫൻസ് അറിയിച്ചു. രാജ്യത്തിന്റെ വിവിധ ഭാഗങ്ങളിൽ ഭൂചലനത്തിന്റെ പ്രകമ്പനം അനുഭവപ്പെട്ടു. തലസ്ഥാനമായ ലിമയിലും കുലുക്കം അനുഭവപ്പെട്ടതായി റിപ്പോർട്ടുണ്ട്.

അതേസമയം, പെറുവിലെ ജിയോഫിസിക്കൽ ഇൻസ്റ്റിറ്റ്യൂട്ട് ഭൂചലനത്തിന്റെ തീവ്രത 7.2 ആണെന്നാണ് രേഖപ്പെടുത്തിയത്. ആൻഡീസ് മലനിരകളിലെ താരതമ്യേന വിദൂര പ്രദേശത്താണ് ഭൂചലനത്തിന്റെ പ്രഭവകേന്ദ്രം. നാസ്ക, തെക്കേ അമേരിക്കൻ ടെക്ടോണിക് പ്ലേറ്റുകൾ സംഗമിക്കുന്ന മേഖലയിലായതിനാൽ പെറുവിൽ ഭൂചലനങ്ങൾ പതിവാണ്. കഴിഞ്ഞ മാസങ്ങളിൽ കൊളംബിയയിലും വെനസ്വേലയിലും ശക്തമായ ഭൂചലനങ്ങൾ റിപ്പോർട്ട് ചെയ്തതിന് പിന്നാലെയാണ് പെറുവിലും ശക്തമായ പ്രകമ്പനം അനുഭവപ്പെട്ടത്.

Summary: A strong earthquake struck southern Peru, injuring at least three people and damaging homes, schools and healthcare facilities. Around 9,000 properties reportedly lost power, while tremors were felt across parts of the country, including Lima.