ഗാസയിൽ ഇസ്രയേൽ ആക്രമണം; നാല് വയസുകാരനടക്കം മൂന്ന് പേർ കൊല്ലപ്പെട്ടു, കൂടുതൽ ആക്രമണത്തിന് നെതന്യാഹുവിന്റെ മുന്നറിയിപ്പ്

ഗാസയിൽ ഇസ്രയേൽ നടത്തിയ വ്യോമാക്രമണങ്ങളിൽ നാല് വയസുകാരനടക്കം മൂന്ന് പലസ്തീനികൾ കൊല്ലപ്പെട്ടു. ഗാസയിൽ നിന്ന് പട്ടങ്ങൾ, ഡ്രോണുകൾ, ബലൂണുകൾ എന്നിവ വിക്ഷേപിക്കുന്നുവെന്നാരോപിച്ച് ആക്രമണം ശക്തമാക്കുമെന്നും ചില പ്രദേശങ്ങളിൽ നിന്ന് ജനങ്ങളെ ഒഴിപ്പിക്കുമെന്നും ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു മുന്നറിയിപ്പ് നൽകി. (Israel Gaza attack)

ഞായറാഴ്ച മധ്യ ഗാസയിലെ അസ്-സവൈദയിൽ ഒരു ഗോഡൗണിന് നേരെയും സലാഹ് അൽ-ദിൻ സ്ട്രീറ്റിലെ രണ്ട് പ്രദേശങ്ങളിലേക്കുമാണ് ഇസ്രയേൽ ആക്രമണം നടത്തിയത്. അസ്-സവൈദയിലെ ആക്രമണത്തിൽ നാല് വയസുകാരനായ മുഹമ്മദ് അബ്ദുൽ സലാം താഹ കൊല്ലപ്പെടുകയും ആറ് പേർക്ക് പരുക്കേൽക്കുകയും ചെയ്തു. സലാഹ് അൽ-ദിൻ സ്ട്രീറ്റിലുണ്ടായ രണ്ട് വ്യത്യസ്ത ആക്രമണങ്ങളിൽ രണ്ടുപേരും കൊല്ലപ്പെട്ടു.
ഗാസ സിറ്റിയുടെ കിഴക്കൻ മേഖലയായ അൽ-ഷുജായ്യയിലും ഇസ്രയേൽ ക്വാഡ്‌കോപ്റ്ററുകൾ ആക്രമണം നടത്തി. ആക്രമണത്തിൽ മാധ്യമപ്രവർത്തകനായ 33കാരൻ ഇസ് എൽ-ദിൻ അൽ-ബത്ഷ് ഉൾപ്പെടെ നിരവധി പേർക്ക് പരുക്കേറ്റു. തെക്കൻ ഖാൻ യൂനിസിലുണ്ടായ ഡ്രോൺ ആക്രമണങ്ങളിൽ കുറഞ്ഞത് 10 പേർക്ക് പരുക്കേറ്റതായും റിപ്പോർട്ടുണ്ട്.

അതിനിടെ, ഗാസയിൽ നിന്ന് ഇസ്രയേലിലേക്ക് പട്ടങ്ങൾ വിക്ഷേപിച്ചെന്ന റിപ്പോർട്ടുകൾക്ക് പിന്നാലെയാണ് നെതന്യാഹുവും പ്രതിരോധ മന്ത്രി ഇസ്രയേൽ കാറ്റ്സും സംയുക്ത മുന്നറിയിപ്പ് നൽകിയത്. വിക്ഷേപണങ്ങൾ ഉടൻ അവസാനിപ്പിച്ചില്ലെങ്കിൽ ഉത്തരവാദികളെന്ന് കരുതുന്നവർക്കെതിരായ ആക്രമണം ശക്തമാക്കുമെന്നും പട്ടങ്ങളോ ഡ്രോണുകളോ ബലൂണുകളോ വിക്ഷേപിക്കുന്ന പ്രദേശങ്ങളിൽ നിന്ന് ജനങ്ങളെ ഒഴിപ്പിക്കുമെന്നും ഇരുവരും അറിയിച്ചു.

ഇസ്രയേൽ ആരോപണങ്ങളെ ഹമാസ് തള്ളി. അഭയാർഥി ക്യാംപുകളിൽ നിന്ന് കുട്ടികൾ കളിപ്പാട്ടങ്ങളായി പട്ടങ്ങൾ പറത്തിയതാണെന്നും ആക്രമണം തുടരുന്നതിനുള്ള “കെട്ടിച്ചമച്ച കാരണം” മാത്രമാണ് ഇസ്രയേലിന്റെ ആരോപണമെന്നും ഹമാസ് വക്താവ് ഹസെം ഖാസിം പ്രതികരിച്ചു. വെടിനിർത്തൽ കരാർ നിലനിൽക്കുന്ന സാഹചര്യത്തിലും ആക്രമണം തുടരുന്നത് ഗാസയിലെ സമാധാനശ്രമങ്ങളെക്കുറിച്ച് കൂടുതൽ ആശങ്ക ഉയർത്തുകയാണ്.

Summary: Israeli strikes in Gaza killed at least three Palestinians, including a four-year-old child, while several others were injured. Prime Minister Benjamin Netanyahu warned of intensified attacks and possible displacement of residents over alleged launches of kites, drones and balloons from Gaza.