9 വർഷത്തിന് ശേഷം കാണാതായ തത്തയെ തിരികെ കിട്ടി; കണ്ടെത്തിയത് IKEA പാർക്കിംഗ് ലോട്ടിൽ | Parrot Found After 9 Years

ഒൻപത് വർഷം മുൻപ് മോഷണം പോയ വളർത്തുതത്തയെ തിരികെ ലഭിച്ചതിന്റെ സന്തോഷത്തിലാണ് ബ്രിട്ടനിലെ റോബർട്ട് മോർട്ടിമർ. 2017ൽ വെസ്റ്റ് യോർക്ക്‌ഷെയറിലെ ബ്രാഡ്ഫോർഡിലുള്ള വീട്ടിൽനിന്ന് കാണാതായ ബാർണി എന്ന തത്തയെയാണ് വർഷങ്ങൾക്കുശേഷം അപ്രതീക്ഷിതമായി കണ്ടെത്തിയത്. തത്തയെ കണ്ടെത്താനുള്ള നിരവധി ശ്രമങ്ങൾ നടത്തിയെങ്കിലും ഫലമുണ്ടായില്ല. വർഷങ്ങൾ കടന്നുപോയതോടെ ബാർണിയെ ഇനി ഒരിക്കലും കണ്ടെത്താനാകില്ലെന്ന പ്രതീക്ഷയിലായിരുന്നു 56കാരനായ മോർട്ടിമർ. എന്നാൽ അടുത്തിടെ ഒരു പൊലീസ് ഉദ്യോഗസ്ഥന്റെ ഫോൺ കോൾ അദ്ദേഹത്തിന്റെ പ്രതീക്ഷകളെല്ലാം തിരിച്ചുകൊണ്ടുവന്നു. ബാർണി ജീവനോടെ കണ്ടെത്തിയെന്നായിരുന്നു ഫോൺ സന്ദേശം. (Parrot Found After 9 Years)

ബ്രാഡ്ഫോർഡിൽ നിന്ന് ഏകദേശം 20 മൈൽ അകലെയുള്ള ഒരു IKEA പാർക്കിംഗ് ലോട്ടിൽ അലഞ്ഞുതിരിയുന്നതിനിടെയാണ് തത്തയെ മൃഗസംരക്ഷണ പ്രവർത്തകർ കണ്ടെത്തിയത്. ബാർണിയുടെ ശരീരത്തിൽ ഘടിപ്പിച്ചിരുന്ന മൈക്രോചിപ്പ് സ്കാൻ ചെയ്തതോടെ തത്തയുടെ പേര് തിരിച്ചറിയാനായി. എന്നാൽ ചിപ്പിൽ നൽകിയിരുന്ന ഫോൺ നമ്പർ പിന്നീട് പ്രവർത്തനരഹിതമായതിനാൽ ഉടമയെ ഉടൻ കണ്ടെത്താനായില്ല. തത്തയെ സ്വന്തമാണെന്ന് അവകാശപ്പെട്ട് നിരവധി പേർ സമീപിച്ചെങ്കിലും കൃത്യമായ തെളിവുകളൊന്നും നൽകാനായില്ലെന്ന് Hillary Harry and Friends Wildlife Rescue ഉടമ ജെമ്മ ഡംബിൽ പറഞ്ഞു. മൈക്രോചിപ്പിൽ നിന്ന് ലഭിച്ച വിവരങ്ങളിൽ തത്തയുടെ പേര് ബാർണിയാണെന്നും ആദ്യം ബ്രാഡ്ഫോർഡിൽ നിന്നുള്ളതാണെന്നും മാത്രമാണ് വ്യക്തമായിരുന്നത്.

ബാർണിയെ പേരെടുത്ത് വിളിച്ചപ്പോൾ തത്ത പ്രതികരിച്ചതും രക്ഷാപ്രവർത്തകർക്ക് കൂടുതൽ ആത്മവിശ്വാസം നൽകി. തുടർന്ന് നടത്തിയ ഇന്റർനെറ്റ് തിരച്ചിലിലൂടെയാണ് മോർട്ടിമറിനെ കണ്ടെത്തിയത്. ഒടുവിൽ ഒൻപത് വർഷത്തെ ഇടവേളയ്ക്ക് ശേഷം ബാർണി സ്വന്തം ഉടമയുടെ അടുത്തേക്ക് തിരിച്ചെത്തി. ഇപ്പോൾ മോർട്ടിമറിന്റെ പുതിയ വീട്ടിൽ ബാർണി വീണ്ടും ജീവിതം ആരംഭിച്ചിരിക്കുകയാണ്.

Summary: A UK man was reunited with his pet parrot Barney nine years after the bird was stolen from his home. Barney was found wandering in an IKEA parking lot, and a microchip and online search eventually helped rescuers locate his original owner.