വർഷങ്ങളായി പിഴ അടച്ചില്ലേ? എങ്കിൽ വാഹനം പൂട്ടും; റോഡിൽ കളിമാറ്റി ദുബായ് പൊലീസ്!

വർഷങ്ങളായി ട്രാഫിക് പിഴകൾ ഒടുക്കാതെയും വാഹനം റജിസ്ട്രേഷൻ പുതുക്കാതെയും റോഡിലിറക്കുന്നവർക്കെതിരെ നടപടി കടുപ്പിച്ച് ദുബായ് പൊലീസ്. ഈ വർഷത്തെ ആദ്യ പകുതിയിൽ നടത്തിയ കർശന പരിശോധനകളിൽ, വൻ തുക പിഴ കുടിശ്ശിക വരുത്തിയ 497 വാഹനങ്ങളാണ് അധികൃതർ കണ്ടുകെട്ടിയത്. ഉത്തരവാദിത്തമില്ലാത്ത ഇത്തരം പെരുമാറ്റങ്ങൾ യാതൊരു കാരണവശാലും വച്ചുപൊറുപ്പിക്കില്ലെന്നും, നിയമലംഘനങ്ങൾ ആവർത്തിക്കുന്ന ഡ്രൈവർമാർക്കെതിരെ ശക്തമായ നിയമനടപടികൾ തുടരുമെന്നും ട്രാഫിക് വിഭാഗം മുന്നറിയിപ്പ് നൽകിയിട്ടുണ്ട്.

ഫിറ്റ്നസ് പരിശോധന നടത്താത്ത വാഹനങ്ങൾ റോഡിലിറക്കുന്നത് ഡ്രൈവർമാർക്കും മറ്റ് യാത്രക്കാർക്കും ഒരുപോലെ വലിയ ജീവൻ ഭീഷണിയാണ് സൃഷ്ടിക്കുന്നത്. കൃത്യസമയത്ത് പിഴയടയ്ക്കാത്തതും രേഖകൾ പുതുക്കാത്തതും ഗുരുതരമായ വാഹനാപകടങ്ങൾക്കും ജീവഹാനിക്കും കാരണമാകുന്നുണ്ടെന്ന് ട്രാഫിക് ജനറൽ വിഭാഗം ഡയറക്ടർ ബ്രി. ജുമാ സേലം ബിൻ സുവൈദാൻ വ്യക്തമാക്കി. കുടിശ്ശികയുള്ള വാഹനങ്ങളെ കണ്ടെത്താൻ അത്യാധുനിക നിർമിതബുദ്ധി (എഐ) സാങ്കേതികവിദ്യയും സ്മാർട് നെറ്റ്‌വർക്കുകളുമാണ് റോഡുകളിൽ ഉപയോഗിക്കുന്നത്. നടപടികളിലേക്ക് കടക്കുന്നതിന് മുൻപ് ഫോൺ കോളുകൾ, എസ്എംഎസ്, ഇമെയിൽ എന്നിവയിലൂടെ ഉടമകൾക്ക് മുന്നറിയിപ്പുകൾ നൽകിയിരുന്നുവെന്നും അധികൃതർ അറിയിച്ചു.

Also Read: പ്രവാസികൾക്ക് സന്തോഷവാർത്ത; വിമാന ടിക്കറ്റുകളിൽ വൻ ഇളവുകളുമായി സൗദിയ

അതേസമയം, വലിയ തുക ഒറ്റയടിക്ക് അടയ്ക്കാൻ പ്രയാസപ്പെടുന്നവർക്കായി ദുബായ് പൊലീസ് പ്രത്യേക ഇളവുകളും സൗകര്യങ്ങളും ഒരുക്കിയിട്ടുണ്ട്. ദുബായ് പൊലീസ് ആപ്, വെബ്സൈറ്റ്, കിയോസ്കുകൾ എന്നിവ വഴി 24 മണിക്കൂറും പിഴയടയ്ക്കാൻ സാധിക്കും. കൂടാതെ, പലിശരഹിത തവണ വ്യവസ്ഥകളും ‘ടാബി’ സേവനങ്ങളും ഉപയോഗിച്ച് പിഴത്തുക ഘട്ടം ഘട്ടമായി അടച്ചുതീർക്കാനുള്ള അവസരവും ലഭ്യമാണ്. ട്രാഫിക് നിയമങ്ങൾ കർശനമായി പാലിക്കുന്നത് വഴി റോഡിലെ സുരക്ഷ ഉറപ്പാക്കാൻ മുഴുവൻ വാഹന ഉടമകളും തയ്യാറാകണമെന്ന് പൊലീസ് അഭ്യർത്ഥിച്ചു.

The post വർഷങ്ങളായി പിഴ അടച്ചില്ലേ? എങ്കിൽ വാഹനം പൂട്ടും; റോഡിൽ കളിമാറ്റി ദുബായ് പൊലീസ്! appeared first on Express Kerala.