ഇലക്ട്രിക് വിപ്ലവത്തിൽ ചരിത്രമെഴുതി മഹീന്ദ്ര; വാണിജ്യ ഇവി വിൽപ്പന നാല് ലക്ഷം പിന്നിടുന്ന രാജ്യത്തെ ആദ്യ നിർമാതാക്കൾ!

മൊബിലിറ്റി രംഗത്ത് ചരിത്രപരമായ കുതിപ്പുമായി വാണിജ്യ വാഹന നിർമാതാക്കളായ മഹീന്ദ്ര ലാസ്റ്റ് മൈൽ മൊബിലിറ്റി ലിമിറ്റഡ്. രാജ്യത്തിന്റെ ഇലക്ട്രിക് വാണിജ്യ വാഹന വിപണിയിൽ പുതിയ നാഴികക്കല്ല് പിന്നിട്ട് കമ്പനി രാജ്യത്തെ ഒന്നാമതെത്തി. പാസഞ്ചർ, കാർഗോ ലാസ്റ്റ് മൈൽ വിഭാഗങ്ങളിലായി കമ്പനിയുടെ ഇലക്ട്രിക് വാഹനങ്ങളുടെ വിൽപ്പന നാല് ലക്ഷം പിന്നിട്ടു. ഈ നേട്ടം കൈവരിക്കുന്ന ഇന്ത്യയിലെ ആദ്യത്തെ വാണിജ്യ വാഹന നിർമ്മാതാക്കളായി മഹീന്ദ്ര ലാസ്റ്റ് മൈൽ മൊബിലിറ്റി ലിമിറ്റഡ് മാറി. തുടർച്ചയായ നാലാം സാമ്പത്തിക വർഷമാണ് കമ്പനി ഇന്ത്യയിൽ ഒന്നാം സ്ഥാനത്ത് എഴുന്നള്ളുന്നത്.

മഹീന്ദ്ര ഉഡോ, ട്രിയോ ശ്രേണി, സോർ ഗ്രാൻഡ്, സിയോ, ഇ–ആൽഫ തുടങ്ങിയ ജനപ്രിയ മോഡലുകളാണ് കമ്പനിയെ ഈ നേട്ടത്തിലേക്ക് നയിച്ചത്. വെറുമൊരു വാഹന വിൽപ്പന എന്നതിലുപരി ലക്ഷക്കണക്കിന് സാധാരണക്കാരുടെ ഉപജീവനമാർഗമാണ് ഈ ഇവി വാഹനങ്ങളിലൂടെ സാധ്യമാകുന്നത്. ഒരു ഡ്രൈവർ, കടയുടമ, ഡെലിവറി പങ്കാളി, ചെറുകിട ബിസിനസ്സ് തുടങ്ങി നിരവധിയാളുകളുടെ യാത്രകളിലാണ് മഹീന്ദ്ര സാന്നിധ്യമറിയിക്കുന്നത്.

Also Read: ഒറ്റച്ചാർജിൽ 530 കിലോമീറ്റർ പറക്കും! വമ്പൻ ഫീച്ചറുകളുമായി ജെഎസ്ഡബ്ല്യു എംജിയുടെ പുതിയ ഇലക്ട്രിക് എസ്‌യുവി വിപണിയിലേക്ക്

കണക്കുകൾ പരിശോധിച്ചാൽ, ഈ ഇലക്ട്രിക് വാഹനങ്ങൾ മൊത്തത്തിൽ 9 ബില്യണിലധികം കിലോമീറ്റർ ദൂരം സഞ്ചരിച്ചിട്ടുണ്ടെന്നാണ് കണക്കാക്കുന്നത്. ഇത് അന്തരീക്ഷത്തിലേക്ക് തള്ളുന്ന കാർബൺഡൈഓക്സൈഡിന്റെ അളവിൽ ഏകദേശം 1,85,000 മെട്രിക് ടോണിന്റെ കുറവുണ്ടാക്കാൻ സഹായിച്ചു. ഇത് ഏകദേശം 8.3 ദശലക്ഷത്തിലധികം മരങ്ങൾ നട്ടുപിടിപ്പിക്കുന്നതിന് തുല്യമായ പാരിസ്ഥിതിക നേട്ടമാണ് നൽകുന്നത്.

“4 ലക്ഷം എന്നത് ഞങ്ങൾക്ക് വെറുമൊരു സംഖ്യയല്ല, ഓരോ ദിവസവും ഞങ്ങൾ വൈദ്യുതി എത്തിച്ച 4 ലക്ഷം ഉപജീവനമാർഗമാണ്. ഈ നാഴികക്കല്ല് ഇലക്ട്രിക് തിരഞ്ഞെടുത്ത ഡ്രൈവർമാർക്കും സംരംഭകർക്കും, ഇന്ത്യയുടെ അവസാന മൈൽ സമ്പദ്‌വ്യവസ്ഥയ്ക്ക് ഇലക്ട്രിക് മൊബിലിറ്റി ഒരു പ്രായോഗിക തിരഞ്ഞെടുപ്പാക്കി മാറ്റിയ പങ്കാളികൾക്കും ടീമുകൾക്കും അവകാശപ്പെട്ടതാണ്. മികച്ച ഉൽപ്പന്നങ്ങൾ നിർമ്മിക്കുക, ആവാസവ്യവസ്ഥയെ ശക്തിപ്പെടുത്തുക, എല്ലാ അവസാന മൈൽ ഉപഭോക്താക്കൾക്കും ഇലക്ട്രിക് മൊബിലിറ്റി ആക്‌സസ് ചെയ്യാവുന്നതാക്കുക എന്നതാണ് മഹീന്ദ്രയുടെ ലക്ഷ്യം” എന്ന് മഹീന്ദ്ര ലാസ്റ്റ് മൈൽ മൊബിലിറ്റി ലിമിറ്റഡിന്റെ മാനേജിങ് ഡയറക്ടറും സിഇഒയുമായ ശ്രീമതി സുമൻ മിശ്ര വ്യക്തമാക്കി.

ഉപഭോക്തൃ കേന്ദ്രീകൃത ഉൽപ്പന്നങ്ങൾ, പങ്കാളിത്തങ്ങൾ, മികച്ച ധനസഹായം, ശക്തമായ ഉപഭോക്തൃ പിന്തുണ എന്നിവയിലൂടെ 2031 ഓടെ ഒരു ദശലക്ഷം ഇലക്ട്രിക് വാഹനങ്ങൾ നിരത്തിലിറക്കാനുള്ള ബൃഹത്തായ പദ്ധതികളിലാണ് മഹീന്ദ്ര ലാസ്റ്റ്മൈൽ മൊബിലിറ്റി ഇപ്പോൾ ശ്രദ്ധ കേന്ദ്രീകരിച്ചിരിക്കുന്നത്.

The post ഇലക്ട്രിക് വിപ്ലവത്തിൽ ചരിത്രമെഴുതി മഹീന്ദ്ര; വാണിജ്യ ഇവി വിൽപ്പന നാല് ലക്ഷം പിന്നിടുന്ന രാജ്യത്തെ ആദ്യ നിർമാതാക്കൾ! appeared first on Express Kerala.