നേപ്പാളിൽ മിന്നൽപ്രളയത്തിൽ വൻ ദുരന്തം; 16 മരണം, 105 ഇന്ത്യക്കാരടക്കം 384 പേരെ കാണാതായി | Nepal flash flood

കാഠ്മണ്ഡു: നേപ്പാളിലെ ടിബറ്റ് അതിർത്തിയോട് ചേർന്ന പ്രദേശത്തുണ്ടായ മിന്നൽപ്രളയത്തിൽ 16 പേർ മരിക്കുകയും 105 ഇന്ത്യക്കാരടക്കം 384 പേരെ കാണാതാവുകയും ചെയ്തു (Nepal flash flood). കനത്ത ജലപ്രവാഹത്തെ തുടർന്ന് നിരവധി ഗ്രാമങ്ങളിൽ വെള്ളം കയറുകയും വീടുകൾ, വാഹനങ്ങൾ, പാലങ്ങൾ എന്നിവയ്ക്ക് വ്യാപകമായ നാശനഷ്ടം സംഭവിക്കുകയും ചെയ്തു.

ബുധനാഴ്ച രാവിലെ ഒമ്പതോടെയാണ് ടിബറ്റിൽനിന്ന് ഒഴുകിയെത്തുന്ന ഭോട്ടെ കോഷി നദിയിൽ അപ്രതീക്ഷിതമായി ജലനിരപ്പ് ഉയർന്നത്. തുടർന്ന് നദി കരകവിഞ്ഞതോടെ തീരപ്രദേശങ്ങൾ അതിവേഗം വെള്ളത്തിനടിയിലാവുകയായിരുന്നു. ശക്തമായ ഒഴുക്കിൽ നിരവധി വീടുകളും വാഹനങ്ങളും പാലങ്ങളും ഒലിച്ചുപോയതായാണ് വിവരം.

ദുരന്തത്തിന് പിന്നാലെ നേപ്പാൾ സൈന്യവും പൊലീസും ചേർന്ന് രക്ഷാപ്രവർത്തനം ആരംഭിച്ചു. കാണാതായവർക്കായി ഹെലികോപ്റ്ററുകളും ഡ്രോണുകളും ഉപയോഗിച്ച് വ്യാപകമായ തെരച്ചിലാണ് നടത്തുന്നത്.

സ്ഥിതിഗതികൾ വിലയിരുത്തുന്നതിനും രക്ഷാപ്രവർത്തനങ്ങൾ ഏകോപിപ്പിക്കുന്നതിനുമായി നേപ്പാൾ പ്രധാനമന്ത്രി ബലേന്ദ്ര ഷാ അടിയന്തര യോഗം വിളിച്ചുചേർത്തു. ദുരന്തത്തിന്റെ വ്യാപ്തിയും കാണാതായവരുടെ വിവരങ്ങളും അധികൃതർ ശേഖരിച്ചുവരികയാണ്.

അതേസമയം, നേപ്പാളുമായി അതിർത്തി പങ്കിടുന്ന ബിഹാറിലെ താഴ്ന്ന പ്രദേശങ്ങളിലും ജാഗ്രത ശക്തമാക്കി. നദിക്കരകളിൽ താമസിക്കുന്നവർ സുരക്ഷിത സ്ഥാനങ്ങളിലേക്ക് മാറണമെന്ന് അധികൃതർ നിർദേശം നൽകി. പ്രളയസാഹചര്യം കണക്കിലെടുത്ത് അതിർത്തി പ്രദേശങ്ങളിലും നിരീക്ഷണം ശക്തമാക്കിയിട്ടുണ്ട്.

Story Summary:
A flash flood in Nepal near the Tibet border has killed eight people, while 384 people, including 105 Indians, are reported missing. Rescue operations involving the army, police, helicopters and drones are underway, while authorities in Bihar have issued a high-alert advisory for vulnerable areas.