നേപ്പാൾ മിന്നൽപ്രളയം; ദുരിതാശ്വാസ പ്രവർത്തനങ്ങളിൽ ഇന്ത്യ ഒപ്പമുണ്ടാകുമെന്ന് പ്രധാനമന്ത്രി നരേന്ദ്ര മോദി!

കനത്ത നാശം വിതച്ച നേപ്പാൾ മിന്നൽപ്രളയത്തിൽ 17 പേരുടെ മരണം ഔദ്യോഗികമായി സ്ഥിരീകരിച്ചു. ദുരന്തബാധിത മേഖലകളിൽ നടത്തിയ തിരച്ചിലിൽ ഇതുവരെ 17 മൃതദേഹങ്ങൾ കണ്ടെടുത്തതായി നേപ്പാൾ പോലീസ് അറിയിച്ചു. ടിബറ്റൻ അതിർത്തിയോട് ചേർന്നുള്ള റസുവ ജില്ലയിലുണ്ടായ മിന്നൽപ്രളയത്തിൽ ഇന്ത്യക്കാർ ഉൾപ്പെടെ നാന്നൂറോളം പേരെയാണ് കാണാതായിരിക്കുന്നത്.

ബുധനാഴ്ച പുലർച്ചെയുണ്ടായ മിന്നൽപ്രളയത്തിൽ നിരവധി ഗ്രാമങ്ങളും നൂറുകണക്കിന് ചരക്കുവാഹനങ്ങളും മലവെള്ളപ്പാച്ചലിൽ ഒലിച്ചുപോയി. കൂടാതെ, നേപ്പാളിലെ ഒരു ഡസനോളം ജലവൈദ്യുത പദ്ധതികളും പൂർണ്ണമായും തകരാറിലായിട്ടുണ്ട്. ഗണ്ഡക്, കോസി തുടങ്ങിയ പ്രധാന നദികളിലൂടെ വെള്ളം കുതിച്ചെത്തുന്ന സാഹചര്യത്തിൽ ഉത്തർപ്രദേശ്, ബിഹാർ സംസ്ഥാനങ്ങളിൽ അതീവ ജാഗ്രതാ നിർദ്ദേശം നൽകിയിട്ടുണ്ട്. സാഹചര്യം വിലയിരുത്താൻ കേന്ദ്ര ആഭ്യന്തര മന്ത്രി അമിത് ഷാ ഇരു സംസ്ഥാനങ്ങളിലെയും മുഖ്യമന്ത്രിമാരുമായി അടിയന്തര ചർച്ചകൾ നടത്തി മുന്നൊരുക്കങ്ങൾ ശക്തമാക്കിയിട്ടുണ്ട്.

Also Read: ജയിലിനുള്ളിൽ പീഡനം, ജീവനിൽ ഭയം! സുപ്രീം കോടതിയെ പോലും വെല്ലുവിളിച്ച് പാക് സർക്കാർ; ഇമ്രാൻ ഖാന്റെ മകന്റെ ഞെട്ടിക്കുന്ന വെളിപ്പെടുത്തൽ

അപകടത്തിന്റെ പശ്ചാത്തലത്തിൽ നേപ്പാൾ പ്രധാനമന്ത്രി ബാലേന്ദ്ര ഷായുമായി പ്രധാനമന്ത്രി നരേന്ദ്ര മോദി ഫോണിൽ സംസാരിച്ച് അനുശോചനം രേഖപ്പെടുത്തി. പ്രതിസന്ധി ഘട്ടത്തിൽ നേപ്പാൾ ജനതയ്ക്കൊപ്പം ഇന്ത്യ ഉറച്ചുനിൽക്കുമെന്നും, രക്ഷാപ്രവർത്തനങ്ങൾക്കും ദുരിതാശ്വാസ പ്രവർത്തനങ്ങൾക്കും ആവശ്യമായ എല്ലാവിധ മാനുഷിക സഹായങ്ങളും നൽകാൻ തയ്യാറാണെന്നും പ്രധാനമന്ത്രി വ്യക്തമാക്കി. വിവരങ്ങൾക്കായി നേപ്പാളിലെ ഇന്ത്യൻ എംബസി പ്രത്യേക ഹെൽപ്പ്‌ലൈൻ നമ്പറുകളും സജ്ജീകരിച്ചിട്ടുണ്ട്.

The post നേപ്പാൾ മിന്നൽപ്രളയം; ദുരിതാശ്വാസ പ്രവർത്തനങ്ങളിൽ ഇന്ത്യ ഒപ്പമുണ്ടാകുമെന്ന് പ്രധാനമന്ത്രി നരേന്ദ്ര മോദി! appeared first on Express Kerala.