സൂറത്തിൽ നരേന്ദ്ര മോദിയുടെ പേരിൽ ഫിഷ് മാർക്കറ്റ്: ബോർഡ് സ്ഥാപിച്ചതിൽ വിവാദം, പ്രതിഷേധവുമായി കച്ചവടക്കാർ

അഹമ്മദാബാദ്: ഗുജറാത്തിലെ സൂററ്റിൽ പുതുതായി നിർമ്മിച്ച മൊത്തവ്യാപാര ഫിഷ് മാർക്കറ്റിന് പ്രധാനമന്ത്രി നരേന്ദ്ര മോദിയുടെ പേര് നൽകിയതിനെച്ചൊല്ലി വൻ വിവാദം. നാൻപുര-ലക്കഡ്കോട്ട് മേഖലയിൽ സൂററ്റ് മുൻസിപ്പൽ കോർപ്പറേഷൻ നിർമ്മിച്ച മാർക്കറ്റിന്റെ പ്രവേശന കവാടത്തിൽ ‘ശ്രീ നരേന്ദ്ര മോദി ഹോൾസെയിൽ ഫിഷ് മാർക്കറ്റ്’ എന്നെഴുതിയ വലിയ ബോർഡും പ്രധാനമന്ത്രിയുടെ ചിത്രവും സ്ഥാപിച്ചതാണ് പ്രതിഷേധത്തിന് കാരണമായത്.(Surat Fish Market Named After PM Modi Triggers Controversy Over Civic Approval)

സൂററ്റ് മുൻസിപ്പൽ കോർപ്പറേഷന്റെ ഔദ്യോഗിക രേഖകളിലോ ബജറ്റിലോ ഇത്തരമൊരു പേര് നൽകാൻ ഔദ്യോഗിക പ്രമേയമോ തീരുമാനമോ പാസാക്കിയിട്ടില്ലെന്ന് അധികൃതർ വ്യക്തമാക്കി. ഇതിനിടയിലാണ് കച്ചവടക്കാരുടെ ഒരു വിഭാഗം പേരിടലിനെതിരെ ശക്തമായി രംഗത്തെത്തിയത്. പ്രധാനമന്ത്രി പൂർണ്ണ സസ്യഭുക്കാണെന്നും ഒരിക്കലും മത്സ്യവിഭവങ്ങൾ കഴിക്കാറില്ലെന്നും ചൂണ്ടിക്കാട്ടിയ കഹാർ-മച്ചി സമുദായ നേതാവ് സുരേന്ദ്ര ലസ്കരി, ഒരു അസൈവ വ്യാപാര കേന്ദ്രത്തിന് പ്രധാനമന്ത്രിയുടെ പേര് നൽകുന്നത് അനുചിതമാണെന്ന് വിമർശിച്ചു.

പാരമ്പര്യമായി ഈ തൊഴിലിൽ ഏർപ്പെട്ടിരിക്കുന്ന മീൻപിടുത്തക്കാരുടെ സമുദായത്തിന്റെ പേരാണ് വിപണിക്ക് നൽകേണ്ടതെന്നും അദ്ദേഹം ആവശ്യപ്പെട്ടു. എന്നാൽ, പ്രധാനമന്ത്രി മത്സ്യസമ്പദ യോജന ഉൾപ്പെടെയുള്ള പദ്ധതികളിലൂടെയും പ്രത്യേക കേന്ദ്ര മന്ത്രാലയം വഴിയും മത്സ്യബന്ധന മേഖലയ്ക്ക് പ്രധാനമന്ത്രി നൽകിയ സംഭാവനകൾക്കുള്ള ആദര സൂചകമായാണ് ഈ പേര് നൽകിയതെന്ന് സൂററ്റ് ഫിഷ് മർച്ചന്റ് അസോസിയേഷൻ പ്രസിഡന്റ് കൽപേഷ് നവ്സാരിവാല വാദിച്ചു. 3 കോടി രൂപ കേന്ദ്ര ഗ്രാന്റോടെയും കോർപ്പറേഷൻ ഫണ്ട് ഉപയോഗിച്ചുമാണ് മാർക്കറ്റ് പൂർത്തിയാക്കിയത്. അതേസമയം, അനുമതിയില്ലാതെ സ്ഥാപിച്ച ബോർഡ് മാറ്റാൻ കോർപ്പറേഷൻ സംഘം എത്തിയെങ്കിലും കച്ചവടക്കാർ തന്നെ ബോർഡ് മാറ്റാമെന്ന് ഉറപ്പുനൽകിയതായി എക്സിക്യൂട്ടീവ് എഞ്ചിനീയർ ആർ. ഡി. ഗഞ്ചാവാല വ്യക്തമാക്കി.

Story Summary

A controversy erupted in Surat after a newly constructed municipal wholesale fish market was named ‘Shree Narendra Modi Wholesale Fish Market’ without formal approval from the Surat Municipal Corporation. A section of local traders opposed the move, arguing that associating the Prime Minister’s name with a seafood facility is inappropriate as PM Modi is a strict vegetarian.