ഉത്തരാഖണ്ഡിൽ 13 മഞ്ഞുതടാകങ്ങൾ അപകടസാധ്യതയുള്ളവയായി കണ്ടെത്തി: സുരക്ഷയും നിരീക്ഷണവും ശക്തമാക്കാൻ നിർദേശിച്ച് മുഖ്യമന്ത്രി | Uttarakhand CM

ഡെറാഡൂൺ: ഉത്തരാഖണ്ഡിലെ ഉയർന്ന മലയോര മേഖലകളിൽ സ്ഥിതി ചെയ്യുന്ന 13 മഞ്ഞുതടാകങ്ങൾ കനത്ത അപകടസാധ്യതയുള്ളവയായി കണ്ടെത്തിയതിനെ തുടർന്ന് മുൻകരുതൽ നടപടികളും സുരക്ഷയും ശക്തമാക്കാൻ നിർദേശം നൽകി മുഖ്യമന്ത്രി പുഷ്കർ സിങ് ധാമി. ഈ തടാകങ്ങളിൽ നിരന്തരമായ ശാസ്ത്രീയ നിരീക്ഷണം നടത്താനും സംസ്ഥാനത്ത് ആധുനിക മുൻകൂട്ടി മുന്നറിയിപ്പ് നൽകുന്ന സംവിധാനങ്ങൾ സ്ഥാപിക്കാനും ഉദ്യോഗസ്ഥരോട് ആവശ്യപ്പെട്ടു.(Uttarakhand CM Pushkar Singh Dhami Orders Strict Monitoring Of 13 Sensitive Glacial Lakes)

സംസ്ഥാന ദുരന്തനിവാരണ സെക്രട്ടറി വിനോദ് കുമാർ സുമന് നൽകിയ നിർദേശത്തിൽ, ഈ തടാകങ്ങളുടെ ജലനിരപ്പ്, വലിപ്പത്തിലുണ്ടാകുന്ന മാറ്റങ്ങൾ, സമീപപ്രദേശങ്ങളിലെ ഭൂപ്രകൃതി എന്നിവ കൃത്യമായ ഇടവേളകളിൽ വിലയിരുത്തണമെന്ന് മുഖ്യമന്ത്രി വ്യക്തമാക്കി. അപകട സാധ്യതയ ഉണ്ടായാൽ ജനങ്ങളെ സമയബന്ധിതമായി വിവരമറിയിക്കാൻ ആധുനിക സെൻസറുകളും കമ്മ്യൂണിക്കേഷൻ സംവിധാനങ്ങളും ഒരുക്കും.

നേപ്പാളിൽ ഉണ്ടായ മിന്നൽപ്രളയത്തിന്റെ പശ്ചാത്തലത്തിൽ കൂടിയാണ് ഉത്തരാഖണ്ഡിൽ തയ്യാറെടുപ്പുകൾ ഊർജിതമാക്കിയത്. അടിയന്തര സാഹചര്യമുണ്ടായാൽ ആളുകളെ മാറ്റാനുള്ള സുരക്ഷിത പാതകളും പ്രാദേശിക മുന്നറിയിപ്പ് സംവിധാനങ്ങളും സജ്ജമാക്കാൻ ജില്ലാ മജിസ്‌ട്രേറ്റുമാർക്ക് നിർദേശം നൽകിയിട്ടുണ്ട്.

കണ്ടെത്തിയ 13 തടാകങ്ങളിൽ 4 എണ്ണത്തിന്റെ പ്രാഥമിക പഠനങ്ങൾ പൂർത്തിയായതായി ദുരന്തനിവാരണ സെക്രട്ടറി വിനോദ് കുമാർ സുമൻ അറിയിച്ചു. ചമോലി ജില്ലയിലെ സരസ്വതി താൽ, ഉത്തരകാശിയിലെ കേദാർതാൽ എന്നിവ പരിശോധിക്കാൻ വിദഗ്ധ സംഘത്തെ ഉടൻ അയക്കുമെന്നും ജനങ്ങൾക്കിടയിൽ ബോധവൽക്കരണം ശക്തമാക്കുമെന്നും അദ്ദേഹം കൂട്ടിച്ചേർത്തു.

Story Summary

Uttarakhand Chief Minister Pushkar Singh Dhami has instructed officials to step up monitoring and enhance safety measures around 13 sensitive glacial lakes in the state. Following the recent flash floods in Nepal, the government has ordered the installation of state-of-the-art early warning systems, regular scientific studies, and improved evacuation preparedness in vulnerable mountain areas.