റഷ്യ-ഉത്തര കൊറിയ ബന്ധം പുതിയ തലത്തിലേക്ക്; ഇരു രാജ്യങ്ങളെയും ബന്ധിപ്പിക്കുന്ന ആദ്യ പാലം തുറന്നു | Russia North Korea road bridge

റഷ്യയും ഉത്തര കൊറിയയും തമ്മിലുള്ള തന്ത്രപ്രധാന ബന്ധം കൂടുതൽ ശക്തമാകുന്നതിന്റെ സൂചനയായി ഇരു രാജ്യങ്ങളെയും ബന്ധിപ്പിക്കുന്ന ആദ്യ റോഡ് പാലം തുറന്നു. തുമെൻ നദിക്ക് കുറുകെ നിർമിച്ച ഏകദേശം ഒരു കിലോമീറ്റർ നീളമുള്ള പാലമാണ് തിങ്കളാഴ്ച ഔദ്യോഗികമായി ഗതാഗതത്തിനായി തുറന്നത് (Russia North Korea road bridge). റഷ്യൻ പ്രധാനമന്ത്രി മിഖായേൽ മിഷുസ്തിനും ഉത്തര കൊറിയൻ പ്രധാനമന്ത്രി പാക് തേ സോംഗും വീഡിയോ ലിങ്കിലൂടെ ഉദ്ഘാടന ചടങ്ങിൽ പങ്കെടുത്തു. രണ്ട് രാജ്യങ്ങളും തമ്മിലുള്ള ഗതാഗത, വ്യാപാര ബന്ധങ്ങൾ വിപുലീകരിക്കുന്നതിൽ പുതിയ പാലം നിർണായകമാകുമെന്നാണ് റഷ്യയുടെ വിലയിരുത്തൽ. രണ്ട് വരിപ്പാതയുള്ള പാലത്തിലൂടെ പ്രതിദിനം 300 വാഹനങ്ങൾ വരെ കടന്നുപോകാൻ കഴിയുമെന്ന് മിഷുസ്തിൻ പറഞ്ഞു. ചരക്ക് വാഹനങ്ങൾ ഉടൻ പാലത്തിലൂടെ സർവീസ് ആരംഭിക്കുമെന്നും ഈ വർഷം അവസാനത്തോടെ യാത്രക്കാരുടെ ഗതാഗതത്തിനും പാലം പൂർണമായി തുറന്നുകൊടുക്കുമെന്നും റഷ്യൻ സർക്കാർ അറിയിച്ചു.

വർഷങ്ങളായി ചർച്ചയിലുണ്ടായിരുന്ന പദ്ധതിക്ക് 2024-ൽ റഷ്യൻ പ്രസിഡന്റ് വ്ലാദിമിർ പുടിൻ ഉത്തര കൊറിയ സന്ദർശിച്ച സമയത്താണ് അന്തിമരൂപം ലഭിച്ചത്. 2025 ഏപ്രിലിലാണ് പാലത്തിന്റെ നിർമാണം ആരംഭിച്ചത്. റഷ്യയ്ക്കും ഉത്തര കൊറിയയ്ക്കും ഇതിനകം വ്യോമ, റെയിൽ ഗതാഗത ബന്ധങ്ങളുണ്ടെങ്കിലും ഇതുവരെ നേരിട്ടുള്ള റോഡ് ബന്ധം ഉണ്ടായിരുന്നില്ല. 1959 മുതൽ വാഹനങ്ങൾ കടത്തിവിടാൻ സമീപത്തെ റെയിൽ പാലത്തിൽ പ്രത്യേകമായി മരപ്പലകകൾ സ്ഥാപിച്ചിരുന്നതായിരുന്നു ഏക മാർഗം.

പുതിയ പാലത്തിന് ‘യാക്കോവ് നോവിച്ചെങ്കോ’ എന്ന പേരാണ് നൽകിയിരിക്കുന്നത്. ഉത്തര കൊറിയയുടെ ആദ്യ നേതാവ് കിം ഇൽ സങ്ങിന്റെ ജീവൻ രക്ഷിച്ച സോവിയറ്റ് റെഡ് ആർമി സൈനികനെന്ന നിലയിലാണ് നോവിച്ചെങ്കോയെ ഉത്തര കൊറിയ വിശേഷിപ്പിക്കുന്നത്. റഷ്യൻ പ്രധാനമന്ത്രി മിഷുസ്തിൻ പാലത്തിന്റെ ഉദ്ഘാടനം ചരിത്രപരമായ സംഭവമെന്നും പുതിയ സൗഹൃദത്തിന്റെ പ്രതീകമെന്നും വിശേഷിപ്പിച്ചു. പുതിയ ഗതാഗത അടിസ്ഥാനസൗകര്യം ഇരു രാജ്യങ്ങളുടെയും വ്യാപാരം, സാമ്പത്തികം, ശാസ്ത്ര-സാങ്കേതിക മേഖലകൾ, സാംസ്കാരിക സഹകരണം എന്നിവയ്ക്ക് കൂടുതൽ വേഗം നൽകുമെന്നും അദ്ദേഹം പറഞ്ഞു.

യുക്രെയ്ൻ യുദ്ധം ആരംഭിച്ച 2022ന് ശേഷം റഷ്യയും ഉത്തര കൊറിയയും തമ്മിലുള്ള ബന്ധം കൂടുതൽ അടുക്കുകയായിരുന്നു. റഷ്യയുടെ കുർസ്ക് മേഖലയിലേക്ക് ഉത്തര കൊറിയ സൈനികരെ അയച്ചതായും അവർ റഷ്യൻ സൈന്യത്തിനൊപ്പം പ്രവർത്തിച്ചതായും റിപ്പോർട്ടുകളുണ്ട്. പുതിയ റോഡ് പാലം ഇരു രാജ്യങ്ങൾക്കും സാമ്പത്തിക സഹകരണത്തിനും ജനങ്ങൾ തമ്മിലുള്ള കൈമാറ്റത്തിനും ടൂറിസത്തിനും വ്യാപാരത്തിനും കൂടുതൽ സാധ്യതകൾ തുറക്കുമെന്ന് ഉത്തര കൊറിയൻ ഔദ്യോഗിക മാധ്യമമായ KCNA റിപ്പോർട്ട് ചെയ്തു.

അതേസമയം, പുതിയ പാലത്തിന് സാമ്പത്തിക പ്രാധാന്യത്തിന് പുറമെ സൈനിക
പ്രാധാന്യവും ഉണ്ടാകാമെന്ന വിലയിരുത്തലുകളും പുറത്തുവരുന്നുണ്ട്. ദക്ഷിണ കൊറിയയിലെ ക്യുങ്‌നാം സർവകലാശാലയിലെ വിദഗ്ധൻ ലിം യൂൾ-ചുൽ പറയുന്നതനുസരിച്ച്, റഷ്യയ്ക്ക് ഉത്തര കൊറിയയിലേക്കും തിരിച്ചും സൈനിക സാമഗ്രികൾ, വെടിക്കോപ്പുകൾ, സൈനികർ എന്നിവയുടെ ഗതാഗതത്തിന് നേരിട്ടുള്ള റോഡ് പാത ലഭിക്കുന്നത് നിർണായകമായേക്കാം. ഇതോടെ റഷ്യ-ഉത്തര കൊറിയ തന്ത്രപ്രധാന സഹകരണം കൂടുതൽ ആഴത്തിലാകുന്നതിന്റെ മറ്റൊരു പ്രധാന അടയാളമായാണ് പുതിയ പാലത്തെ വിലയിരുത്തുന്നത്.

Summary: Russia and North Korea have opened their first road bridge across the Tumen River, marking another step in their growing strategic partnership. The bridge is expected to boost trade, transport, tourism and economic cooperation, while experts also point to its potential military significance amid the war in Ukraine.