സനൽ കുമാർ ശശിധരനെതിരെ മഞ്ജു വാര്യർ മാനനഷ്ടക്കേസ് നൽകി; അപകീർത്തികരമായ പോസ്റ്റുകൾ നീക്കണമെന്ന് ആവശ്യം | Manju Warrier Sanal Kumar Sasidharan
Current: മലയാളം
കൊച്ചി: സംവിധായകൻ സനൽ കുമാർ ശശിധരനെതിരെ നടി മഞ്ജു വാര്യർ മാനനഷ്ടക്കേസ് ഫയൽ ചെയ്തു (Manju Warrier Sanal Kumar Sasidharan). എറണാകുളം മുൻസിഫ് കോടതിയിലാണ് ഹർജി നൽകിയത്. തനിക്കെതിരെ നിരന്തരം അപകീർത്തികരമായ പ്രതികരണങ്ങളും കുറിപ്പുകളും പ്രചാരണങ്ങളും നടത്തുന്നുവെന്ന് ചൂണ്ടിക്കാട്ടിയാണ് മഞ്ജു വാര്യർ കോടതിയെ സമീപിച്ചത്.
സനൽ കുമാർ ശശിധരൻ സാമൂഹിക മാധ്യമങ്ങളിലൂടെ പങ്കുവച്ച അപകീർത്തികരമായ കുറിപ്പുകളും പോസ്റ്റുകളും അടിയന്തരമായി പിൻവലിക്കാൻ നിർദേശം നൽകണമെന്നാണ് ഹർജിയിലെ പ്രധാന ആവശ്യം. മഞ്ജു വാര്യർക്കുവേണ്ടി അഡ്വ. ശാന്തി മായാദേവിയാണ് ഹാജരാകുന്നത്. സനൽ കുമാർ ശശിധരൻ, ഓൺലൈൻ മാധ്യമപ്രവർത്തകൻ ഷാജൻ സ്‌കറിയ, മെറ്റ എന്നിവരെയും ഹർജിയിൽ ഉൾപ്പെടുത്തിയിട്ടുണ്ടെന്നാണ് റിപ്പോർട്ടുകൾ. മറ്റ് ചില ഓൺലൈൻ മാധ്യമങ്ങൾക്കെതിരെയും പരാതിയുണ്ട്.
മഞ്ജു വാര്യർക്കെതിരെ അപകീർത്തികരമായ പരാമർശങ്ങൾ നടത്തുന്നതിന് സനൽ കുമാർ ശശിധരനും ഷാജൻ സ്‌കറിയക്കും എറണാകുളം മുൻസിഫ് കോടതി താൽക്കാലിക വിലക്ക് ഏർപ്പെടുത്തിയതായും റിപ്പോർട്ടുകളുണ്ട്. നിലവിലുള്ള സോഷ്യൽ മീഡിയ പോസ്റ്റുകൾ നീക്കം ചെയ്യുന്നതുമായി ബന്ധപ്പെട്ട് മെറ്റയ്ക്ക് കോടതി നോട്ടീസ് നൽകിയിട്ടുണ്ട്. ഇരുവരോടും കോടതിയിൽ ഹാജരായി വിശദീകരണം നൽകാനും നിർദേശിച്ചിട്ടുണ്ട്.
മഞ്ജു വാര്യർ ചില റാക്കറ്റുകളുടെ നിയന്ത്രണത്തിലാണെന്നും ഇക്കാര്യത്തിൽ അന്വേഷണം വേണമെന്നും ആരോപിച്ച് സനൽ കുമാർ ശശിധരൻ തിരുവനന്തപുരത്ത് സെക്രട്ടേറിയറ്റിന് മുന്നിൽ സമരം നടത്തിവരികയാണ്. ഹേമ കമ്മിറ്റി റിപ്പോർട്ടുമായി ബന്ധപ്പെട്ട വിഷയങ്ങളിലും തനിക്കെതിരായ കേസിന് പിന്നിലെ ഗൂഢാലോചന അന്വേഷിക്കണമെന്നും അദ്ദേഹം ആവശ്യപ്പെട്ടിട്ടുണ്ട്. സമരത്തിനിടെ തനിക്ക് ലഭിച്ച സംസ്ഥാന ചലച്ചിത്ര പുരസ്കാരങ്ങൾ പ്രദർശിപ്പിച്ചുകൊണ്ടാണ് അദ്ദേഹം പ്രതിഷേധിക്കുന്നത്.
സനൽ കുമാർ ശശിധരന്റെ ആരോപണങ്ങൾക്കെതിരെ മഞ്ജു വാര്യർ നിയമനടപടി സ്വീകരിച്ചതിന് പിന്നാലെയാണ് കേസ് കോടതിയിലെത്തിയത്. വിഷയവുമായി ബന്ധപ്പെട്ട് മഞ്ജു വാര്യർ ചില ഫോൺ സംഭാഷണങ്ങളുടെ ഓഡിയോ ക്ലിപ്പുകൾ കോടതിയിൽ സമർപ്പിച്ചതായി നടി മാലാ പാർവതി നേരത്തെ പറഞ്ഞിരുന്നു.
Story Summary:
Actress Manju Warrier has filed a defamation suit against filmmaker Sanal Kumar Sasidharan before the Ernakulam Munsiff Court. She has sought the removal of allegedly defamatory social media posts, while the court has reportedly issued interim directions concerning certain remarks and posts.
