കനത്ത മഴയെത്തുടര്‍ന്നുണ്ടായ മണ്ണിടിച്ചിലിൽ മരണമടഞ്ഞ ജോസഫിന് നാട് വിടയേകി; സംഗീതയുടെ മൃതദേഹം ബന്ധുക്കള്‍ ഏറ്റുവാങ്ങി
Current: മലയാളം
കോട്ടയം: കനത്ത മഴയെത്തുടര്‍ന്നുണ്ടായ മണ്ണിടിച്ചിലിൽ മരണമടഞ്ഞ പൂഞ്ഞാര്‍ തെക്കേക്കര ചേലകാട്ട് ജോസഫിന്‍റെ മൃതദേഹം പെരിങ്ങളം തിരുഹൃദയ പള്ളിയില്‍ സംസ്കരിച്ചു. തമഴ്നാട് തിരുവള്ളൂര്‍ സ്വദേശിനി സംഗീത അരുള്‍ലാലിന്‍റെ മൃതദേഹം ബന്ധുക്കള്‍ ഏറ്റുവാങ്ങി നാട്ടിലേക്ക് കൊണ്ടുപോയി.
പാലാ ജനല്‍ ആശുപത്രിയില്‍ ആര്‍.ഡി.ഒ ഷാഹിന രാമകൃഷ്ണന്‍റെ മേല്‍നോട്ടത്തിലാണ് ഇരുവരുടെയും പോസ്റ്റ്മോര്‍ട്ടം നടപടികള്‍ പൂര്‍ത്തീകരിച്ചത്. ജോസഫിന്‍റെ മൃതദേഹം കുടുംബാംഗങ്ങളാണ് ഏറ്റുവാങ്ങിയത്. സംഗീതയുടെ ഭര്‍ത്താവ് വെങ്കിടേഷും സുഹൃത്തുക്കളുമാണ് മൃതദേഹം ഏറ്റുവാങ്ങാനെത്തിയത്.
ഞായറാഴ്ച്ച രാത്രി വീടിനു മുകളിലേക്ക് മണ്ണിടിഞ്ഞുവീണാണ് ജോസഫ് മരിച്ചത്. ഈരാറ്റുപേട്ട-വാഗമണ്‍ റോഡില്‍ വേലത്തുശേരിക്കു സമീപം സ്കൂട്ടറില്‍ സഞ്ചരിക്കുമ്പോഴാണ് സംഗീത മണ്ണിടിച്ചിലില്‍ പെട്ടത്.
സംഗീതയുടെ മൃതദേഹവുമായി പോയ ആംബുലന്‍സിനെ കുമളി ചെക് പോസ്റ്റുവരെ മീനച്ചില്‍ ഡെപ്യൂട്ടി തഹസില്‍ദാര്‍ മജോഷ് മൈക്കിള്‍ അനുഗമിച്ചു. കുമളി ചെക് പോസ്റ്റില്‍ കമ്പം തഹസില്‍ദാര്‍ മൃതദേഹം ഏറ്റുവാങ്ങി.
ജില്ലയുടെ ചുമതലയുള്ള ജലവിഭവ-ഭവനനിര്‍മാണ വകുപ്പ് മന്ത്രി മോന്‍സ് ജോസഫ്, ആന്‍റോ ആന്‍റണി എം.പി, എം.എല്‍.എമാരായ മാണി സി. കാപ്പന്‍, എന്‍.ജെ. സെബാസ്റ്റ്യന്‍ എന്നിവര്‍ മരമണടഞ്ഞവര്‍ക്ക് അന്തിമോപചാരമര്‍പ്പിച്ചു. സംസ്ഥാന സര്‍ക്കാരിനുവേണ്ടി പാലാ ആര്‍.ഡി.ഒ ഇരുവര്‍ക്കും റീത്തു സമര്‍പ്പിച്ചു.
