ലുലു ബഗ്ദാദിയയിൽ ‘ഫർഹത് വതൻ’; അറേബ്യൻ സംഗീതരാവിന് ജിദ്ദ ഒരുങ്ങുന്നു

ജിദ്ദ: സൗദി ദേശീയ ദിനാഘോഷങ്ങളുടെ ഭാഗമായി ലുലു ഹൈപ്പർമാർക്കറ്റ് ബഗ്ദാദിയയും ബംഗീഷും മാപ്പിള ടീമും സംയുക്തമായി സംഘടിപ്പിക്കുന്ന ‘ഫർഹത് വതൻ’ അറേബ്യൻ മ്യൂസിക്കൽ നൈറ്റ് സെപ്റ്റംബർ 24 വ്യാഴാഴ്ച വൈകുന്നേരം 4 മണി മുതൽ രാത്രി 12 മണി വരെ ലുലു ഹൈപ്പർമാർക്കറ്റ് ബഗ്ദാദിയയിൽ നടക്കും. 

അറബ് സംസ്കാരത്തിന്റെ പൈതൃകവും സംഗീതത്തിന്റെ മാധുര്യവും ആധുനിക വേദിയുടെ ആവേശവും ഒരുമിക്കുന്ന ഈ സംഗീതസായാഹ്നത്തിൽ പ്രശസ്ത വനിതാ ഗായിക ദിക്രിയുടെ പ്രത്യേക സംഗീതാവതരണം പ്രധാന ആകർഷണമാകും. 

ജിദ്ദയിലെ ശ്രദ്ധേയ ഗായകൻ ഷബീറും സംഘവും വേദിയിലെത്തുന്നതോടെ സംഗീതരാവ് കൂടുതൽ ആവേശകരമാകും. മനോഹരമായ അറബിക് ഗാനങ്ങൾക്കൊപ്പം അറേബ്യൻ ലൈവ് ഫ്യൂഷൻ സംഗീതവും വിവിധ സംഗീതാവതരണങ്ങളും പരിപാടിയുടെ പ്രത്യേകതയായിരിക്കും. 

സംഗീതവിരുന്നിനൊപ്പം പുതിയ കലാപ്രതിഭകളെ കണ്ടെത്തുന്നതിനായി ടാലന്റ് ഹണ്ട് മത്സരങ്ങളും സംഘടിപ്പിച്ചിട്ടുണ്ട്. അറബിക് സോംഗ്, സൂപ്പർ സിംഗിംഗ്, കളറിംഗ്, പെയിന്റിംഗ്, ഡ്രോയിംഗ്, മെഹന്തി, ഫേസ് പെയിന്റിംഗ് തുടങ്ങി വിവിധ മത്സരങ്ങൾ പരിപാടിയുടെ ഭാഗമായി നടക്കും. മത്സരങ്ങളിൽ പങ്കെടുക്കാൻ ആഗ്രഹിക്കുന്നവർക്ക് സെപ്റ്റംബർ 24ന് വൈകുന്നേരം 4 മണിക്ക് ലുലു ഹൈപ്പർമാർക്കറ്റ് ബഗ്ദാദിയയിൽ നേരിട്ട് രജിസ്റ്റർ ചെയ്യാം. 

അറബ് സംഗീതത്തിന്റെ ഹൃദയസ്പർശിയായ ഈണങ്ങളും ജിദ്ദയിലെ ഗായകരുടെ ശബ്ദമാധുരിയും കലാപ്രതിഭകളുടെ പ്രകടനങ്ങളും ഒരേ വേദിയിൽ സംഗമിക്കുന്ന ‘ഫർഹത് വതൻ’ സംഗീതത്തിന്റെയും സംസ്കാരത്തിന്റെയും സൗഹൃദത്തിന്റെയും മനോഹര ആഘോഷമായി മാറും. സംഗീതത്തിന്റെ ഈണങ്ങളിൽ ഹൃദയങ്ങൾ ഒന്നിക്കുകയും അറബ് പൈതൃകത്തിന്റെ വർണങ്ങൾ വേദിയിൽ വിരിയുകയും ചെയ്യുന്ന ഈ ആഘോഷരാവിലേക്ക് കുടുംബസമേതം എല്ലാവരെയും സംഘാടകർ സ്വാഗതം ചെയ്തു.