ഗ്രാമീണ ഇന്ത്യയിൽ ഡിജിറ്റൽ പേയ്‌മെന്റ് വ്യാപനം; 20,000 ജീവനക്കാരെ നിയമിക്കാൻ ഫോൺപേ | PhonePe
Current: മലയാളം
കൊച്ചി: ഗ്രാമീണ ഇന്ത്യയിലെ ഡിജിറ്റൽ പേയ്‌മെന്റ് സേവനങ്ങളുടെ വ്യാപനം കൂടുതൽ ശക്തമാക്കാൻ പുതിയ പദ്ധതികളുമായി ഫോൺപേ. അടുത്ത 12 മാസത്തിനിടെ 20,000ത്തിലധികം ഫ്രണ്ട്‌ലൈൻ സെയിൽസ് ജീവനക്കാരെ നിയമിക്കാനാണ് കമ്പനി ലക്ഷ്യമിടുന്നത്. ഇതിന് പുറമെ 50 ലക്ഷത്തിലധികം പേയ്‌മെന്റ് ഉപകരണങ്ങൾ രാജ്യത്തുടനീളം വിന്യസിക്കാനും പദ്ധതിയുണ്ട്.
സ്മാർട്ട് സ്പീക്കറുകൾ, പോയിന്റ് ഓഫ് സെയിൽ (POS) ഉപകരണങ്ങൾ തുടങ്ങിയവ ഉൾപ്പെടുന്നതാണ് പുതിയതായി വിന്യസിക്കുന്ന പേയ്‌മെന്റ് സംവിധാനങ്ങൾ. ഇതിൽ പകുതിയിലധികം ഉപകരണങ്ങൾ ഗ്രാമീണ മേഖലകളിൽ സ്ഥാപിക്കാനാണ് ഫോൺപേ ലക്ഷ്യമിടുന്നത്.
ടയർ-6 നഗരങ്ങളിലേക്കും ഗ്രാമപ്രദേശങ്ങളിലേക്കും ഡിജിറ്റൽ പേയ്‌മെന്റ് സംവിധാനങ്ങളുടെ ലഭ്യത വ്യാപിപ്പിച്ച് ചെറുകിട വ്യാപാരികൾക്ക് കൂടുതൽ സൗകര്യമൊരുക്കുകയാണ് കമ്പനിയുടെ ലക്ഷ്യം. ചെറുകിട വ്യാപാരികളുടെ ശൃംഖല വിപുലീകരിക്കുന്നതിനായി മെർച്ചന്റ് ഡിസ്കൗണ്ട് റേറ്റ് (MDR) സംവിധാനവും പ്രത്യേക ഫണ്ടും നിക്ഷേപങ്ങൾക്ക് സഹായകമാകുമെന്ന് ഫോൺപേ വ്യക്തമാക്കി.
പുതിയ തൊഴിൽ ചട്ടങ്ങൾ ഓൺ-റോൾ ജീവനക്കാരെ വേഗത്തിൽ നിയമിക്കുന്നതിനും നിയമന നടപടികൾ കൂടുതൽ ലളിതമാക്കുന്നതിനും സഹായിക്കുന്നുണ്ടെന്നും കമ്പനി അറിയിച്ചു.
ഗ്രാമീണ മേഖലകളിൽ ഡിജിറ്റൽ പേയ്‌മെന്റ് അടിസ്ഥാനസൗകര്യങ്ങൾ കൂടുതൽ ശക്തമാക്കുന്നതിനൊപ്പം പ്രാദേശിക തലത്തിൽ കൂടുതൽ തൊഴിലവസരങ്ങൾ സൃഷ്ടിക്കാനും പുതിയ വിപുലീകരണത്തിലൂടെ ഫോൺപേ ലക്ഷ്യമിടുന്നു.
Story Summary:
PhonePe plans to hire more than 20,000 frontline sales employees and deploy over 5 million payment devices across India over the next 12 months. More than half of the new devices, including smart speakers and POS machines, will be deployed in rural areas to expand digital payments.
