സ്പോട്ടിഫൈ ഇന്ത്യയിൽ ഒന്നാമതായി ‘അർസ് കിയാ ഹെ’; ചരിത്രനേട്ടവുമായി കോക്ക് സ്റ്റുഡിയോ ഭാരത് | Spotify Top Songs
Current: മലയാളം
കൊച്ചി: അനുവ് ജെയിനും ലോസ്റ്റ് സ്റ്റോറീസും ചേർന്ന് കോക്ക് സ്റ്റുഡിയോ ഭാരതിനായി ഒരുക്കിയ ‘അർസ് കിയാ ഹെ’ സ്പോട്ടിഫൈ ഇന്ത്യയുടെ ടോപ്പ് സോങ്സ് പട്ടികയിൽ ഒന്നാം സ്ഥാനത്തെത്തി (Spotify Top Songs). ഈ നേട്ടം കൈവരിക്കുന്ന ആദ്യ കോക്ക് സ്റ്റുഡിയോ ഭാരത് ഗാനമെന്ന റെക്കോർഡും ഇതോടെ ‘അർസ് കിയാ ഹെ’ സ്വന്തമാക്കി.
2025 ഓഗസ്റ്റിൽ പുറത്തിറങ്ങിയ ഗാനം ഒരു വർഷത്തിലേറെയായി സ്പോട്ടിഫൈ ഇന്ത്യയുടെ പ്രതിദിന ചാർട്ടിൽ ഇടംപിടിച്ചുവരികയാണ്. ആഗോള ടോപ്പ് സോങ്സ് പട്ടികയിലും ഗാനം 71-ാം സ്ഥാനത്തെത്തിയിട്ടുണ്ട്.
അനുവ് ജെയിനിന്റെ ഗാനരചനയും സംഗീതവും ലോസ്റ്റ് സ്റ്റോറീസിന്റെ ഇലക്ട്രോണിക്-ഫ്യൂഷൻ ശൈലിയും ഋഷബ് ജോഷിയുടെ പങ്കാളിത്തവും ചേർന്നാണ് ‘അർസ് കിയാ ഹെ’ ഒരുക്കിയത്. കോക്ക് സ്റ്റുഡിയോ ഭാരതിന്റെ സംഗീതപരമായ വൈവിധ്യവും വ്യത്യസ്ത കലാകാരന്മാരുടെ സർഗാത്മകതയും സമന്വയിപ്പിക്കുന്നതാണ് ഗാനത്തിന്റെ പ്രത്യേകത.
പുറത്തിറങ്ങിയതിന് ശേഷം ഇതുവരെ 484 ദശലക്ഷത്തിലധികം ഓഡിയോ സ്ട്രീമുകളും 260 ദശലക്ഷം യൂട്യൂബ് കാഴ്ചകളും ഗാനം നേടിയതായി അധികൃതർ അറിയിച്ചു. 17.7 ദശലക്ഷത്തിലധികം ഉപയോക്താക്കൾ ഗാനം ഉൾപ്പെടുത്തി വിവിധ തരത്തിലുള്ള ഉള്ളടക്കങ്ങളും സൃഷ്ടിച്ചിട്ടുണ്ട്. അഹമ്മദാബാദ്, പൂനെ, മുംബൈ, ഡൽഹി, കൊൽക്കത്ത, ഗുവാഹത്തി തുടങ്ങിയ നഗരങ്ങളിലും ഗാനത്തിന് മികച്ച സ്വീകാര്യത ലഭിച്ചതായി കമ്പനി വ്യക്തമാക്കി.
ഒരു വർഷത്തിലേറെ പിന്നിട്ടിട്ടും പുതിയ ശ്രോതാക്കളെ ആകർഷിച്ച് സ്പോട്ടിഫൈ ഇന്ത്യയിൽ ഒന്നാം സ്ഥാനത്തെത്തിയത് പ്രതീക്ഷിക്കാത്ത നേട്ടമാണെന്ന് ഗായകനും ഗാനരചയിതാവുമായ അനുവ് ജെയിൻ പ്രതികരിച്ചു. ഗാനം ആളുകളുടെ ജീവിതത്തിന്റെ ഭാഗമാകണമെന്ന ആഗ്രഹത്തോടെയാണ് ഒരുക്കിയതെന്നും അദ്ദേഹം പറഞ്ഞു.
ഇന്ത്യയിലെ വിവിധ സംഗീതശാഖകളെയും പ്രാദേശിക ശൈലികളെയും കലാകാരന്മാരെയും ഒരുമിപ്പിക്കുന്ന കോക്ക് സ്റ്റുഡിയോ ഭാരത് സീസൺ 4-നും ‘അർസ് കിയാ ഹെ’യുടെ നേട്ടം കൂടുതൽ ശ്രദ്ധ നേടിക്കൊടുത്തിട്ടുണ്ട്. ‘ഏ അജ്‌നബി’, ‘ബുല്ലേയ വേ’, ‘കച്ചൗഡി ഗലി’, ‘ഹൂർ’, ‘ഹിവ്ഡെ റോ ഹാർ’ തുടങ്ങിയ ഗാനങ്ങളും വിവിധ സ്ട്രീമിങ്, വീഡിയോ, സോഷ്യൽ മീഡിയ പ്ലാറ്റ്‌ഫോമുകളിൽ ശ്രദ്ധ നേടിയതായി അധികൃതർ അറിയിച്ചു.
Story Summary:
‘Arz Kiya Hai’ by Anuv Jain and Lost Stories has reached No. 1 on Spotify India’s Top Songs chart, becoming the first Coke Studio Bharat song to achieve the feat. Released in August 2025, the track has crossed 484 million audio streams and 260 million YouTube views.
