Skip to content
November 19, 2026
⌕

ലൈംഗികാതിക്രമ കേസിൽ ബ്രിജ് ഭൂഷൺ ശരൺ സിംഗിനെ വെറുതെവിട്ട വിചാരണക്കോടതി വിധി ചോദ്യം ചെയ്ത് നാല് വനിതാ ഗുസ്തി താരങ്ങൾ ഡൽഹി കോടതിയിൽ: കോടതി വിധി മുൻവിധികളോടെയുള്ളതും പഴയ ചിന്താഗതികൾ വച്ചുപുലർത്തുന്നതുമെന്ന് ഹർജിയിൽ രൂക്ഷവിമർശനം; വിചാരണക്കോടതി ആശ്രയിച്ചത് ഊഹാപോഹങ്ങളെയാണെന്ന് അഭിഭാഷക റെബേക്ക ജോൺ

September 26, 2026
Share this post to

ഡല്‍ഹി: റെസ്ലിംഗ് ഫെഡറേഷന്‍ ഓഫ് ഇന്ത്യ മുന്‍ അധ്യക്ഷന്‍ ബ്രിജ് ഭൂഷണ്‍ ശരണ്‍ സിംഗിനെ ലൈംഗികാതിക്രമ കേസില്‍ വെറുതെവിട്ട വിചാരണക്കോടതി വിധി ചോദ്യം ചെയ്ത് നാല് വനിതാ ഗുസ്തി താരങ്ങള്‍ ഡല്‍ഹി കോടതിയില്‍ റിവിഷന്‍ ഹര്‍ജി നല്‍കി. 


ഓഗസ്റ്റ് 3-ന് പുറപ്പെടുവിച്ച വിചാരണക്കോടതി വിധി പഴയതും മുന്‍വിധികളോടെയുള്ളതുമാണെന്ന് മുതിര്‍ന്ന അഭിഭാഷക റെബേക്ക ജോണ്‍ മുഖേന റൂസ് അവന്യൂ സ്‌പെഷ്യല്‍ കോടതിയില്‍ സമര്‍പ്പിച്ച ഹര്‍ജിയില്‍ ചൂണ്ടിക്കാട്ടുന്നു. 


തെളിവുകള്‍ കൃത്യമായി പരിശോധിക്കാതെ ഊഹാപോഹങ്ങളുടെ അടിസ്ഥാനത്തിലാണ് ഉത്തരവെന്നും ലൈംഗികാതിക്രമത്തിന് ഇരയാകുന്നവരുടെ പെരുമാറ്റത്തെക്കുറിച്ച് പരമ്പരാഗതമായ തെറ്റായ ധാരണകളെയാണ് വിചാരണക്കോടതി ആശ്രയിച്ചതെന്നും ഹര്‍ജിയില്‍ ആരോപിക്കുന്നു. 

തൊഴിലിടങ്ങളില്‍ അതിക്രമം നേരിടുന്ന സ്ത്രീകള്‍ തങ്ങളുടെ തൊഴില്‍ സംരക്ഷിക്കുന്നതിനായി മൗനം പാലിക്കുന്നത് എന്തുകൊണ്ടാണെന്ന് മനസ്സിലാക്കുന്നതില്‍ കോടതിക്ക് വീഴ്ച പറ്റിയെന്നും ഹര്‍ജിക്കാര്‍ വ്യക്തമാക്കി.


കേസില്‍ മതിയായ തെളിവുകളില്ലെന്ന് ചൂണ്ടിക്കാട്ടി ഓഗസ്റ്റ് 3-നാണ് മജിസ്ട്രേറ്റ് കോടതി ബ്രിജ് ഭൂഷണെയും ഡബ്ല്യു.എഫ്.ഐ മുന്‍ അസിസ്റ്റന്റ് സെക്രട്ടറി വിനോദ് തോമറിനെയും വെറുതെവിട്ടത്. ആരോപണങ്ങള്‍ വ്യാജവും രാഷ്ട്രീയ പ്രേരിതവുമായ ഗൂഢാലോചനയുടെ ഭാഗമാണെന്നായിരുന്നു അഡീഷണല്‍ ചീഫ് ജുഡീഷ്യല്‍ മജിസ്ട്രേറ്റ് അശ്വിനി പന്‍വാറിന്റെ നിരീക്ഷണം. 


സാക്ഷിമൊഴികളിലെ വൈരുധ്യങ്ങളും രേഖാമൂലമുള്ള തെളിവുകളുടെ അഭാവവും ചൂണ്ടിക്കാട്ടിയായിരുന്നു അന്നത്തെ ഉത്തരവ്. എന്നാല്‍ ഈ വിധിക്കെതിരെ സമര്‍പ്പിക്കപ്പെട്ട പുതിയ റിവിഷന്‍ ഹര്‍ജി സെപ്റ്റംബര്‍ 26-ന് സ്‌പെഷ്യല്‍ ജഡ്ജ് ദിഗ്വിജയ് സിംഗിന്റെ മുന്നില്‍ വാദം കേള്‍ക്കാന്‍ നിശ്ചയിച്ചിട്ടുണ്ട്.

 

Get more updates from Pudukad News on Google