സെൻഹൈസറിന്റെ പുതിയ പ്രീമിയം ഓഡിയോ ഉപകരണങ്ങൾ ഇന്ത്യൻ വിപണിയിൽ; മൊമെന്റം 5 വയർലെസിനും ട്രൂ വയർലെസ് 5നും തുടക്കം | Sennheiser Momentum 5

കൊച്ചി: പ്രമുഖ ഓഡിയോ ബ്രാൻഡായ സെൻഹൈസർ പുതിയ തലമുറയിലെ പ്രീമിയം ഓഡിയോ ഉപകരണങ്ങളായ ‘മൊമെന്റം 5 വയർലെസ്’ ഹെഡ്ഫോണും ‘മൊമെന്റം ട്രൂ വയർലെസ് 5’ ഇയർബഡും ഇന്ത്യൻ വിപണിയിൽ അവതരിപ്പിച്ചു (Sennheiser Momentum 5). യഥാക്രമം 39,990 രൂപയും 29,990 രൂപയുമാണ് ഉൽപ്പന്നങ്ങളുടെ വില.

പ്രീ-ഓർഡർ ചെയ്യുന്ന ഉപഭോക്താക്കൾക്ക് 5,990 രൂപ വിലമതിക്കുന്ന സെൻഹൈസർ BTD 600 ബ്ലൂടൂത്ത് ഡോംഗിൾ സൗജന്യമായി ലഭിക്കും. ഒക്ടോബർ ഒന്ന് മുതൽ ഓൺലൈൻ, ഓഫ്‌ലൈൻ സ്റ്റോറുകൾ വഴി പുതിയ മോഡലുകൾ രാജ്യത്തുടനീളം വിൽപ്പനയ്ക്കെത്തും.

മൊമെന്റം 5 വയർലെസ് ഹെഡ്ഫോണിൽ HD 600-ൽ നിന്ന് പ്രചോദനം ഉൾക്കൊണ്ട 42 എംഎം ഡ്രൈവറുകൾ, Dolby Atmos Spatial Tracking, എട്ട് മൈക്രോഫോണുകളുള്ള മെച്ചപ്പെടുത്തിയ Hybrid ANC സംവിധാനം എന്നിവ ഉൾപ്പെടുത്തിയിട്ടുണ്ട്. ഒറ്റ ചാർജിൽ 57 മണിക്കൂർ വരെ ബാറ്ററി ബാക്കപ്പും ഹെഡ്ഫോണിന്റെ പ്രധാന സവിശേഷതയാണ്.

മറുവശത്ത്, മൊമെന്റം ട്രൂ വയർലെസ് 5 ഇയർബഡിൽ 24-bit/96kHz ഹൈ-റെസ് ഓഡിയോ, Bluetooth 6.0, Adaptive Hybrid ANC, AI Speech Enhancement തുടങ്ങിയ ഫീച്ചറുകളാണ് നൽകിയിരിക്കുന്നത്.

ഇരു മോഡലുകളിലും ഉപയോക്താക്കൾക്ക് സ്വയം മാറ്റിസ്ഥാപിക്കാനാകുന്ന ബാറ്ററികളാണ് സെൻഹൈസർ നൽകിയിരിക്കുന്നത്. ഉൽപ്പന്നങ്ങളുടെ ആയുസ് വർധിപ്പിക്കുന്നതിനൊപ്പം ദീർഘകാല ഉപയോഗം പ്രോത്സാഹിപ്പിക്കുകയെന്ന ലക്ഷ്യവും ഇതിലൂടെ കമ്പനി മുന്നോട്ടുവയ്ക്കുന്നു.

ഉയർന്ന നിലവാരമുള്ള ശബ്ദാനുഭവത്തിനൊപ്പം പരിസ്ഥിതി ഉത്തരവാദിത്തവും ഉറപ്പാക്കുന്ന രീതിയിലാണ് പുതിയ മൊമെന്റം സീരീസ് രൂപകൽപ്പന ചെയ്തിരിക്കുന്നതെന്ന് കമ്പനി അറിയിച്ചു. എർഗോണമിക് ഡിസൈൻ, പ്ലാസ്റ്റിക് രഹിത പാക്കേജിംഗ്, ക്വിക്ക് ചാർജിംഗ് സൗകര്യം എന്നിവയും പുതിയ ഉപകരണങ്ങളുടെ പ്രത്യേകതകളാണ്.

ദീർഘകാല ഉപയോഗം ലക്ഷ്യമിട്ടുള്ള രൂപകൽപ്പനയും പ്രീമിയം ഓഡിയോ സാങ്കേതികവിദ്യകളും സംയോജിപ്പിച്ചാണ് പുതിയ മൊമെന്റം മോഡലുകൾ വിപണിയിലെത്തുന്നതെന്നും കമ്പനി വ്യക്തമാക്കി.

Story Summary:
Sennheiser has launched the Momentum 5 Wireless headphones and Momentum True Wireless 5 earbuds in India. Priced at ₹39,990 and ₹29,990 respectively, both models feature advanced audio technologies, replaceable batteries and premium connectivity options.