വാഴക്കാട് റോഡരികിൽ ലോഡ് കണക്കിന് അജൈവ മാലിന്യം തള്ളി; പ്രതിഷേധവുമായി നാട്ടുകാർ | Vazhakkad Waste Dumping

റിപ്പോർട്ട് : അൻവർ ഷരീഫ് 

മലപ്പുറം: വാഴക്കാട് തിരുവാലൂർ റോഡിന് സമീപം ലോഡ് കണക്കിന് അജൈവ മാലിന്യങ്ങൾ തള്ളിയ നിലയിൽ കണ്ടെത്തി (Vazhakkad Waste Dumping). റോഡരികിൽ വലിയ തോതിൽ മാലിന്യം കുന്നുകൂടിയതോടെ പ്രതിഷേധവുമായി പ്രദേശവാസികൾ രംഗത്തെത്തി.

സമാന രീതിയിൽ ദിവസങ്ങൾക്കുമുമ്പ് മുടക്കോഴി മലയിലേക്ക് പോകുന്ന റോഡിലും ലോഡ് കണക്കിന് മാലിന്യങ്ങൾ തള്ളിയിരുന്നു. സംഭവത്തിൽ പ്രദേശവാസികൾ അധികൃതർക്ക് പരാതി നൽകിയെങ്കിലും മാലിന്യം തള്ളുന്നത് തുടരുകയാണെന്നാണ് നാട്ടുകാരുടെ ആരോപണം.

പ്രദേശത്ത് മാലിന്യം തള്ളുന്നത് നിത്യസംഭവമായി മാറിയിരിക്കുകയാണെന്നും നാട്ടുകാർ പറയുന്നു. വലിയ തോതിൽ മാലിന്യം കുന്നുകൂടുന്നത് പ്രദേശത്ത് ആരോഗ്യപ്രശ്നങ്ങൾക്കും സാംക്രമിക രോഗങ്ങൾ പടരുന്നതിനും കാരണമാകുമെന്ന ആശങ്കയിലാണ് ജനങ്ങൾ.

മാലിന്യം തള്ളുന്നവർക്കെതിരെ ശക്തമായ നടപടി സ്വീകരിക്കണമെന്നും പ്രദേശത്ത് നിരീക്ഷണം ശക്തമാക്കി ഇത്തരം സംഭവങ്ങൾ ആവർത്തിക്കുന്നത് തടയണമെന്നും തിരുവാലൂർ റസിഡൻസ് അസോസിയേഷൻ കൺവീനർ ആവശ്യപ്പെട്ടു.

Story Summary: Large quantities of non-biodegradable waste have been dumped near the Thiruvaloor Road in Vazhakad, Malappuram, triggering protests from local residents. People are concerned about the growing waste problem and the potential risk of infectious diseases.