ഇറാഖിൽ നിന്ന് യുഎസ് സൈന്യം പിന്മാറുന്നു; പുതിയ സുരക്ഷാ സാഹചര്യത്തിൽ കടുത്ത വെല്ലുവിളികൾ | Iraq US troops withdrawal

ബാഗ്ദാദ്: രണ്ട് പതിറ്റാണ്ടിലേറെ നീണ്ട യുഎസ് സൈനിക സാന്നിധ്യത്തിന് വിരാമമിട്ട് ഇറാഖിൽ നിന്ന് അമേരിക്കൻ സൈന്യം പിന്മാറുകയാണ്. സെപ്റ്റംബർ 30നാണ് യുഎസ് നേതൃത്വത്തിലുള്ള സഖ്യത്തിന്റെ ഇറാഖിലെ സൈനിക ദൗത്യം അവസാനിപ്പിക്കുന്നത്. ഇതിന്റെ ഭാഗമായി സെപ്റ്റംബർ 30 മുതൽ ഒക്ടോബർ 3 വരെ ഇറാഖ് ‘സോവറൻറ്റി ഡേയ്സ്’ എന്ന പേരിൽ നാല് ദിവസത്തെ ഔദ്യോഗിക അവധി പ്രഖ്യാപിച്ചിട്ടുണ്ട്. (Iraq US troops withdrawal)

ഐഎസ്‌ഐഎസ് (ISIL) വിരുദ്ധ പോരാട്ടത്തിൽ വർഷങ്ങളായി ഇറാഖിന് പിന്തുണ നൽകിയിരുന്ന യുഎസ് സൈനികരുടെ പിന്മാറ്റം രാജ്യത്തിന്റെ സുരക്ഷാ സംവിധാനത്തിൽ പുതിയ ഘട്ടത്തിനാണ് തുടക്കമിടുന്നത്. ഇറാഖിന്റെ സുരക്ഷാ സേനയ്ക്ക് ഇപ്പോൾ കൂടുതൽ ഉത്തരവാദിത്തം ഏറ്റെടുക്കേണ്ടിവരും. അതേസമയം, രാജ്യത്ത് പ്രവർത്തിക്കുന്ന ഇറാൻ അനുകൂല സായുധസംഘങ്ങൾ, ഐഎസ്‌ഐഎസ് സ്ലീപ്പർ സെല്ലുകൾ, അതിർത്തിക്കപ്പുറത്തെ സംഘർഷങ്ങൾ എന്നിവ സുരക്ഷാ വെല്ലുവിളികളായി തുടരുകയാണ്. പ്രധാനമന്ത്രി അലി അൽ-സൈദി രാജ്യത്തെ ആയുധങ്ങളുടെ നിയന്ത്രണം ഭരണഘടനാപരമായ സ്ഥാപനങ്ങളുടെ കൈകളിലായിരിക്കണമെന്ന് വ്യക്തമാക്കിയിട്ടുണ്ട്. ഇറാൻ അനുകൂല മിലീഷ്യകളെ സർക്കാർ സുരക്ഷാ സംവിധാനത്തിലേക്ക് ഉൾപ്പെടുത്തുകയോ നിരായുധരാക്കുകയോ ചെയ്യാനുള്ള നീക്കവും തുടരുകയാണ്. നേരത്തെ സെപ്റ്റംബർ 30 വരെ പൂർത്തിയാക്കാൻ ലക്ഷ്യമിട്ടിരുന്ന നടപടികൾ 2027 ജൂൺ 30 വരെ നീട്ടിയിട്ടുണ്ട്. ചില ശക്തമായ മിലീഷ്യാ വിഭാഗങ്ങൾ നിരായുധീകരണത്തോട് ഇപ്പോഴും എതിർപ്പ് പ്രകടിപ്പിക്കുന്നുണ്ട്.

യുഎസ് സൈനിക സാന്നിധ്യം അവസാനിക്കുന്നതോടെ ഇറാഖിന്റെ സുരക്ഷാ സംവിധാനത്തിലെ ചില ദൗർബല്യങ്ങളും ചർച്ചയാകുന്നുണ്ട്. പ്രത്യേകിച്ച് വ്യോമ പ്രതിരോധ സംവിധാനങ്ങളുടെ പരിമിതി ആശങ്ക ഉയർത്തുന്ന വിഷയമാണ്. ഇറാഖിലെ കുർദിഷ് മേഖലയിലും യുഎസ് സൈനിക പിന്മാറ്റത്തെ തുടർന്ന് സുരക്ഷാ ആശങ്കകൾ ഉയർന്നിട്ടുണ്ട്. ഈ വർഷം ഇറാനും ഇറാൻ അനുകൂല സംഘങ്ങളും നടത്തിയ ഡ്രോൺ, മിസൈൽ ആക്രമണങ്ങളെ നേരിടുന്നതിൽ യുഎസ് പ്രതിരോധ സംവിധാനങ്ങൾ സഹായിച്ചിരുന്നതായി കുർദിഷ് അധികൃതർ ചൂണ്ടിക്കാട്ടുന്നു.

അതേസമയം, യുഎസ്-ഇറാഖ് ബന്ധം സൈനിക സഹകരണത്തിൽ നിന്ന് സാമ്പത്തിക, നയതന്ത്ര, വികസന സഹകരണത്തിലേക്ക് മാറ്റാനാണ് ബാഗ്ദാദ് ലക്ഷ്യമിടുന്നത്. എണ്ണ, പെട്രോകെമിക്കൽ മേഖലകളിലെ നിക്ഷേപവും മറ്റ് സാമ്പത്തിക സഹകരണങ്ങളും മുന്നോട്ടുകൊണ്ടുപോകാനുള്ള ശ്രമങ്ങൾ തുടരുകയാണ്. എന്നാൽ മേഖലയിൽ സംഘർഷങ്ങൾ തുടരുന്ന സാഹചര്യത്തിൽ ഈ സാമ്പത്തിക പങ്കാളിത്തം എത്രത്തോളം വേഗത്തിൽ മുന്നേറും എന്നതും നിർണായകമാണ്. യുഎസ് സൈനിക പിന്മാറ്റത്തോടെ ഇറാഖിന്റെ പരമാധികാരം കൂടുതൽ ശക്തിപ്പെടുത്താനുള്ള അവസരമാണ് ലഭിക്കുന്നതെന്ന് സർക്കാർ വ്യക്തമാക്കുമ്പോഴും, മിലീഷ്യകളുടെ സ്വാധീനം, ഐഎസ്‌ഐഎസ് ഭീഷണി, ഇറാൻ-യുഎസ് സംഘർഷത്തിന്റെ പ്രത്യാഘാതങ്ങൾ തുടങ്ങിയവ പുതിയ സുരക്ഷാ സാഹചര്യത്തെ സങ്കീർണമാക്കുന്നു. അതിനാൽ യുഎസ് പിന്മാറ്റത്തിന് ശേഷമുള്ള ഇറാഖിന്റെ അടുത്ത ഘട്ടം രാജ്യത്തിന്റെ ആഭ്യന്തര സുരക്ഷാ സംവിധാനത്തിനും വിദേശബന്ധങ്ങൾക്കും നിർണായകമാകും.

Summary: The United States has completed its military withdrawal from Iraq after more than two decades, ending the coalition’s military mission against ISIL. Iraq now faces the challenge of managing its security independently while dealing with armed militias, ISIL sleeper cells and regional tensions.