ഫ്‌ളൈ ദുബായ് വിമാനത്തിലെ ആക്രമണശ്രമം തകർത്തത് ഇന്ത്യൻ വംശജനായ ക്യാപ്റ്റൻ. കുത്തേറ്റ നിലയിലും കോക്പിറ്റിൽ പൊരുതിനിന്ന് രക്ഷകനായി. 180-ലധികം യാത്രക്കാരുടെ ജീവൻ കാത്തു. അക്രമിയായ ഒമാനി കോ-പൈലറ്റിനെ കീഴ്പ്പെടുത്തിയത് ഇസ്രയേലി യാത്രക്കാരും ഓഫ് ഡ്യൂട്ടി പൈലറ്റുമാരും ചേർന്ന്. പ്രതിക്ക് വിമാനത്തിൽ കയറാൻ അനുമതി ലഭിച്ചതിൽ ഇസ്രയേലിന്റെ സമഗ്രാന്വേഷണം
Current: മലയാളം
ടെൽ അവീവ്: ദുബായിൽ നിന്ന് ഇസ്രയേൽ തലസ്ഥാനമായ ടെൽ അവീവിലേക്ക് പറന്ന ഫ്ലൈ ദുബായ് യാത്രാവിമാനത്തിൽ അരങ്ങേറിയ ആക്രമണ ശ്രമവും വൻ വിമാനദുരന്തവും ഒഴിവാക്കിയത് ഇന്ത്യൻ വംശജനായ ക്യാപ്റ്റന്റെ അസാമാന്യ ധീരത.
വിമാനം തകർക്കാൻ ശ്രമിച്ച ഒമാൻ സ്വദേശിയായ സഹപൈലറ്റുമായി കോക്പിറ്റിനുള്ളിൽ ജീവൻമരണ പോരാട്ടം നടത്തുകയും, നെഞ്ചിലും ശരീരത്തിലും ആഴത്തിൽ കുത്തേറ്റ അവസ്ഥയിലും വിമാനത്തിന്റെ നിയന്ത്രണം അക്രമിയുടെ കൈകളിലെത്താതെ ചെറുത്തുതോൽപ്പിക്കുകയും ചെയ്ത ക്യാപ്റ്റൻ ഇന്ത്യൻ വംശജനായ എമിറാത്തി പൗരനാണ്. പൈലറ്റുമാർ റഷ്യൻ, യുക്രൈനിയൻ പൗരന്മാരാണെന്ന പ്രാഥമിക അഭ്യൂഹങ്ങൾ വ്യോമയാന വൃത്തങ്ങളും തള്ളിക്കളഞ്ഞു.
ദുബായിൽ നിന്ന് പറന്നുയർന്ന വിമാനം ഇസ്രയേൽ അതിർത്തിയിലേക്ക് അടുക്കവേ ബുധനാഴ്ചയായിരുന്നു നടുക്കുന്ന സംഭവവികാസങ്ങൾ. മുൻകൂട്ടി തയ്യാറാക്കിയ പദ്ധതി പ്രകാരം ഒമാൻ പൗരനായ കോ-പൈലറ്റ് കൈയിൽ കരുതിയ മൂർച്ചയേറിയ കത്തി ഉപയോഗിച്ച് ക്യാപ്റ്റനെ ക്രൂരമായി കുത്തുകയായിരുന്നു.
വിമാനത്തിന്റെ നിയന്ത്രണം പൂർണ്ണമായി കൈക്കലാക്കി വിമാനം അതിവേഗം താഴേക്ക് പതിപ്പിച്ച് തകർക്കാനായിരുന്നു ഇയാളുടെ നീക്കം. എന്നാൽ ഗുരുതരമായി പരിക്കേറ്റിട്ടും ക്യാപ്റ്റൻ സഹപൈലറ്റിനെ ശക്തമായി പ്രതിരോധിച്ചു.
വിമാനം ആകാശത്ത് നിന്ന് കുത്തനെ താഴേക്ക് പതിക്കുന്ന ഭയാനകമായ നിമിഷങ്ങൾക്കിടയിലും ക്യാപ്റ്റൻ നടത്തിയ ചെറുത്തുനിൽപ്പാണ് ഭൂരിഭാഗവും ഇസ്രയേലികളായ 180-ലധികം യാത്രക്കാരുടെ ജീവൻ രക്ഷിച്ചത്.
വിമാനം പെട്ടെന്ന് വൻതോതിൽ താഴേക്ക് പതിച്ചതോടെ അസ്വാഭാവികത മനസ്സിലാക്കിയ മുൻനിരയിലെ ചില ഇസ്രയേലി യാത്രക്കാർ കോക്പിറ്റിന്റെ വാതിൽ തകർത്ത് അകത്തുകയറി ഒമാനി കോ-പൈലറ്റിനെ നേരിടുകയായിരുന്നുവെന്ന് രക്ഷപ്പെട്ട യാത്രക്കാരൻ ‘ജെറുസലേം പോസ്റ്റിനോട്’ വെളിപ്പെടുത്തി.
തുടർന്ന് അക്രമിയെ കോക്പിറ്റിൽ നിന്ന് വലിച്ചിഴച്ച് പുറത്താക്കുകയും, വിമാനത്തിൽ യാത്രക്കാരായി ഉണ്ടായിരുന്ന ഓഫ് ഡ്യൂട്ടി പൈലറ്റുമാർ കോക്പിറ്റിൽ പ്രവേശിച്ച് തകർച്ചയുടെ വക്കിൽ നിന്ന് വിമാനത്തിന്റെ നിയന്ത്രണം തിരിച്ചുപിടിക്കുകയുമായിരുന്നു.
രക്തത്തിൽ കുളിച്ചുകിടന്ന ക്യാപ്റ്റന് വിമാനത്തിലുണ്ടായിരുന്ന ഒരു ഇസ്രയേലി ദന്തഡോക്ടർ അടിയന്തര പ്രഥമശുശ്രൂഷ നൽകിയതാണ് അദ്ദേഹത്തിന്റെ ജീവൻ നിലനിർത്തിയത്. യാത്രക്കാരും ഓഫ് ഡ്യൂട്ടി പൈലറ്റുമാരും ഒത്തുചേർന്ന് അക്രമിയെ ബന്ധിക്കുകയും വിമാനം സൗദി അറേബ്യയിലെ തബൂക്കിൽ സുരക്ഷിതമായി ലാൻഡ് ചെയ്യിക്കുകയും ചെയ്തു.
ഫ്ലൈ ദുബായിൽ ഒരു വർഷത്തിൽ താഴെ മാത്രം പ്രവൃത്തിപരിചയമുള്ളയാളാണ് ആക്രമണം നടത്തിയ ഒമാനി പൈലറ്റ്. ഇസ്രയേൽ വ്യോമാതിർത്തിയിലേക്ക് പ്രവേശിക്കുന്ന സർവീസുകളിൽ അറബ്-ഗൾഫ് പൗരന്മാരായ ജീവനക്കാർക്ക് കർശനമായ വ്യക്തിഗത സുരക്ഷാ പരിശോധനകൾ നിലനിൽക്കെ,
ഇയാൾക്ക് ഈ വിമാനത്തിൽ ഡ്യൂട്ടി ലഭിച്ചത് എങ്ങനെയെന്നതിൽ ഇസ്രയേൽ സുരക്ഷാ ഏജൻസികൾ അതീവ ഗൗരവത്തോടെയുള്ള അന്വേഷണം ആരംഭിച്ചു. ഇയാൾക്ക് മറ്റേതെങ്കിലും രാജ്യത്തിന്റെ ഇരട്ട പൗരത്വം ഉണ്ടായിരുന്നോ എന്നും രഹസ്യാന്വേഷണ വിഭാഗം പരിശോധിക്കുന്നുണ്ട്.
പരിക്കേറ്റ ഇന്ത്യൻ വംശജനായ ക്യാപ്റ്റനെയും അക്രമിയായ ഒമാനി പൈലറ്റിനെയും തബൂക്കിലെ സൈനിക ആശുപത്രിയിൽ പ്രവേശിപ്പിച്ചിരിക്കുകയാണ്.
ഇത് പൈലറ്റുമാർ തമ്മിലുള്ള വ്യക്തിപരമായ തർക്കമല്ലെന്നും, വിമാനം ജനവാസ കേന്ദ്രങ്ങളിലോ നഗരങ്ങളിലോ ഇടിച്ചിറക്കി വൻ നാശനഷ്ടമുണ്ടാക്കാൻ ലക്ഷ്യമിട്ട 9/11 മോഡൽ ഭീകരാക്രമണ ശ്രമമാണെന്നും ഉന്നത ഇസ്രയേലി സുരക്ഷാ ഉദ്യോഗസ്ഥർ സ്ഥിരീകരിച്ചു.
