Skip to content
November 19, 2026
⌕

തൃശൂർ കായികമേള അപകടം; വീഴ്ച ഉദ്യോഗസ്ഥ തലത്തിലെന്ന് മന്ത്രി ഒ.ജെ. ജനീഷ്, നടപടി ഉറപ്പെന്ന് പ്രഖ്യാപനം | Thrissur school sports meet

October 5, 2026
Share this post to
Thrissur school sports meet

തൃശൂർ: സംസ്ഥാന സ്കൂൾ കായികമേളയ്ക്കിടെ അപകടമുണ്ടായ തൃശൂർ അക്വാട്ടിക് കോംപ്ലക്‌സ് കായിക മന്ത്രി ഒ.ജെ. ജനീഷ് സന്ദർശിച്ചു (Thrissur school sports meet). അപകടം നടന്ന് അഞ്ചാം ദിവസമാണ് മന്ത്രി സ്ഥലത്തെത്തിയത്. സംഭവത്തിൽ ഉദ്യോഗസ്ഥ തലത്തിൽ വീഴ്ചയുണ്ടായെന്നും ഉത്തരവാദികൾക്കെതിരെ ഉറപ്പായും നടപടി സ്വീകരിക്കുമെന്നും മന്ത്രി വ്യക്തമാക്കി.

ചെറിയ മത്സരങ്ങൾ നടക്കുന്ന വേദികളിൽ വലിയ രീതിയിലുള്ള സംഘാടന സംവിധാനം സാധാരണയായി ഉണ്ടാകാറില്ലെന്നാണ് മന്ത്രിയുടെ വിശദീകരണം. ഡിഡിഇ യോഗം വിളിച്ചപ്പോൾ അധ്യാപക സംഘടനകൾ സംഘാടനത്തിന്റെ ഉത്തരവാദിത്തം ഏറ്റെടുത്തിരുന്നു. വിവിധ കമ്മിറ്റികളുടെ ചുമതലയും അധ്യാപക സംഘടനകളുടെ പ്രതിനിധികൾക്കായിരുന്നു.

ഗ്രൗണ്ട് ആൻഡ് എക്യുപ്‌മെന്റ് കമ്മിറ്റിയുടെ ചെയർമാനും കൺവീനറുമായിരുന്നത് സ്പോർട്സ് കോഓർഡിനേറ്റർമാരായ അധ്യാപകരായിരുന്നു. വേദിയിലെ പന്തലിന്റെ ചുമതല ഈ കമ്മിറ്റിക്കാണ് നൽകിയിരുന്നതെന്നാണ് മനസിലാക്കുന്നതെന്നും പന്തൽ ഏൽപ്പിച്ചതിലുണ്ടായ വീഴ്ചയാണ് പ്രധാന പ്രശ്നമെന്നും മന്ത്രി പറഞ്ഞു.

അപകടസ്ഥലം പരിശോധിച്ചപ്പോൾ നിർമ്മാണത്തിലെ പിഴവ് വ്യക്തമായതായി മന്ത്രി വ്യക്തമാക്കി. സംഭവത്തിന്റെ ഉത്തരവാദിത്തം ഉദ്യോഗസ്ഥ തലത്തിലാണെന്നും വീഴ്ച വരുത്തിയവർക്കെതിരെ നടപടി ഉണ്ടാകുമെന്നും അദ്ദേഹം ആവർത്തിച്ചു.

അതേസമയം, ജനപ്രതിനിധികളെ സംഘാടനവുമായി ബന്ധപ്പെട്ട കാര്യങ്ങളിൽ ഉദ്യോഗസ്ഥർ അറിയിച്ചിരുന്നില്ലെന്നും മന്ത്രി പറഞ്ഞു. തൃശൂരിൽ കായികമേളയുടെ നാല് ഇനങ്ങൾ മാത്രമാണ് നടന്നിരുന്നതെന്നും അതിനാൽ പ്രത്യേക സംഘാടക സമിതി ആവശ്യമില്ലെന്നുമാണ് മന്ത്രിയുടെ വിശദീകരണം.

എന്നാൽ, മത്സരങ്ങളെക്കുറിച്ച് നേരത്തെ അറിവുണ്ടായിരുന്നുവെന്ന് മന്ത്രി തന്നെ വ്യക്തമാക്കി. കോഴിക്കോട് നടന്ന വിപുലമായ സംഘാടക സമിതി യോഗത്തിൽ താനും പങ്കെടുത്തിരുന്നു. മത്സരങ്ങൾക്കായി ഗ്രൗണ്ടുകളും മറ്റ് അനുബന്ധ സൗകര്യങ്ങളും ആവശ്യപ്പെട്ട് സംഘാടകർ മന്ത്രിയുടെ ഓഫീസുമായി ബന്ധപ്പെട്ടിരുന്നതായും അദ്ദേഹം സ്ഥിരീകരിച്ചു.

ഒക്ടോബർ 1ന് ശക്തമായ കാറ്റിലും മഴയിലും അക്വാട്ടിക് കോംപ്ലക്‌സിൽ സ്ഥാപിച്ചിരുന്ന ഷീറ്റുകൾ ഇളകി വീണതിനെ തുടർന്നാണ് അപകടമുണ്ടായത്. നിരവധി വിദ്യാർഥികൾക്ക് പരിക്കേറ്റിരുന്നു. സംഭവത്തിന് പിന്നാലെ നീന്തൽ മത്സരങ്ങൾ താൽക്കാലികമായി നിർത്തിവെച്ചിരുന്നു.

Story Summary:
Sports Minister O.J. Jeneesh visited the Thrissur Aquatic Complex following the accident during the state school sports meet. He said the incident involved lapses at the official level and assured action against those responsible, while questions have also been raised over the event’s organisation and venue arrangements.

Get more updates from Pudukad News on Google