ഡൽഹിയെ ആകെ പ്രക്ഷുബ്ധമാക്കി ‘ഇന്ത്യ’ സഖ്യം: ആകാശവാണി ഭവന് മുൻപിൽ കുത്തിയിരുന്ന് ധർണ്ണ നടത്തി രാഹുൽ ഗാന്ധിയും പ്രിയങ്ക ഗാന്ധിയും, അഭിഷേക് ബാനർജിയടക്കം കസ്റ്റഡിയിൽ, സ്ഥലത്തെത്തി DCP | India Bloc
ന്യൂഡൽഹി: ഇലക്ഷൻ കമ്മീഷനിൽ നിന്നുള്ള വിവാദപരമായ എസ്.ഐ.ആർ (SIR) ഉത്തരവുകളുമായി ബന്ധപ്പെട്ട് മുഖ്യ തെരഞ്ഞെടുപ്പ് കമ്മീഷണർ (CEC) ഗ്യാനേഷ് കുമാറിന്റെ രാജി ആവശ്യപ്പെട്ട് പ്രതിപക്ഷ സഖ്യമായ ‘ഇന്ത്യ’ മുന്നണി എം.പിമാർ ഡൽഹിയിൽ നടത്തുന്ന വൻ പ്രതിഷേധ മാർച്ച് പോലീസ് തടഞ്ഞു. പാർലമെന്റ് മന്ദിരത്തിൽ നിന്ന് തെരഞ്ഞെടുപ്പ് കമ്മീഷൻ ആസ്ഥാനത്തേക്ക് (നിർവാചൻ സദൻ) നീങ്ങിയ പ്രകടനത്തെ പോലീസ് ആകാശവാണി ഭവന് മുന്നിൽ ബാരിക്കേഡുകൾ ഉയർത്തി തടയുകയായിരുന്നു.(India Bloc March Election Commission Gyanesh Kumar Resignation Demand Rahul Priyanka Sit In Delhi)
കോൺഗ്രസ് നേതാക്കളായ രാഹുൽ ഗാന്ധി, പ്രിയങ്ക ഗാന്ധി വധ്ര, സമാജ്വാദി പാർട്ടി അധ്യക്ഷൻ അഖിലേഷ് യാദവ്, തൃണമൂൽ കോൺഗ്രസ് നേതാക്കളായ അഭിഷേക് ബാനർജി, ഡെറക് ഓബ്രിയൻ, ബിജു ജനതാദൾ നേതാക്കൾ തുടങ്ങി നിരവധി പ്രമുഖ പ്രതിപക്ഷ അംഗങ്ങൾ മാർച്ചിൽ പങ്കെടുത്തു. പോലീസിന് മുന്നിൽ വച്ച് അഖിലേഷ് യാദവ്, ഡെറക് ഓബ്രിയൻ, അഭിഷേക് ബാനർജി തുടങ്ങിയ നേതാക്കളെ കസ്റ്റഡിയിലെടുത്ത് ബസ്സിൽ മാറ്റി. ഇതോടെ രാഹുൽ ഗാന്ധിയും പ്രിയങ്കയും ദിഗ്വിജയ് സിംഗ്, ദീപേന്ദർ ഹൂഡ തുടങ്ങിയ മുതിർന്ന നേതാക്കളോടൊപ്പം ആകാശവാണി ഭവൻ്റെ ഗേറ്റ് 4-ന് സമീപം കുത്തിയിരുന്ന് റോഡ് ഉപരോധിച്ചു.
“വോട്ട് ചോർ, ഗദ്ദി ഛോഡ്” (വോട്ട് മോഷ്ടാവേ പദവി ഒഴിയൂ) എന്ന് മുദ്രാവാക്യം വിളിച്ചുകൊണ്ട് ചില പ്രതിഷേധക്കാർ ബാരിക്കേഡുകൾക്ക് മുകളിൽ കയറി. ഇതിനിടെ ജീവനക്കാരെ കാണാനായി രാഹുൽ ഗാന്ധിയും പ്രിയങ്ക ഗാന്ധിയും ആകാശവാണി ഭവനിലേക്ക് പ്രവേശിക്കാൻ ശ്രമിച്ചെങ്കിലും സുരക്ഷാ ഉദ്യോഗസ്ഥർ ഗേറ്റ് അടച്ചുപൂട്ടി തടഞ്ഞു. ഇത് സർക്കാർ സ്വത്താണെന്നും ഇവിടെ നിന്ന് ഒഴിയണമെന്നും പോലീസ് ആവശ്യപ്പെട്ടിട്ടുണ്ട്.
വോട്ടർ പട്ടികയിൽ അനധികൃതമായി മാറ്റങ്ങൾ വരുത്തിയെന്ന ആരോപണവും എസ്.ഐ.ആർ പ്രക്രിയയെച്ചൊല്ലിയുള്ള തർക്കങ്ങളുമാണ് പ്രതിഷേധത്തിന് കാരണം. പത്തു മാസത്തിനിടെ 14 തവണ എസ്.ഐ.ആർ സംബന്ധിച്ച ഉത്തരവുകളിൽ മറ്റു രണ്ട് ഇലക്ഷൻ കമ്മീഷണർമാരായ സുഖ്ബീർ സിംഗ് സന്ധുവും വിവേക് ജോഷിയും വിയോജിപ്പറിയിച്ചിരുന്നുവെന്ന മാധ്യമ റിപ്പോർട്ടുകൾ മുൻനിർത്തിയാണ് പ്രതിപക്ഷം ഗ്യാനേഷ് കുമാറിന്റെ രാജി ആവശ്യപ്പെടുന്നത്. എന്നാൽ കമ്മീഷനിൽ ഭിന്നതയില്ലെന്നും എല്ലാ തീരുമാനങ്ങളും ഏകകണ്ഠമായിരുന്നുവെന്നുമാണ് തെരഞ്ഞെടുപ്പ് കമ്മീഷന്റെ വാദം.
Story Summary
INDIA Bloc MPs led by Rahul Gandhi and Priyanka Gandhi Vadra staged a high-voltage protest march towards the Election Commission headquarters demanding Chief Election Commissioner Gyanesh Kumar’s resignation over the SIR controversy. Delhi Police stopped the march near Akashvani Bhavan, leading to brief detentions of prominent leaders like Akhilesh Yadav and Abhishek Banerjee, while Rahul and Priyanka sat on a dharna right near Akashvani Bhavan.




