ഓൺലൈൻ അധിക്ഷേപങ്ങളും സിനിമാലോകത്തെ സമ്മർദവും തളർത്തി; തെറാപ്പി തേടിയ അനുഭവം തുറന്നുപറഞ്ഞ് താപ്‌സി പന്നു | Taapsee Pannu online trolling experience
Current: മലയാളം
ഓൺലൈൻ ട്രോളിങ്ങും സിനിമാലോകത്തെ സമ്മർദങ്ങളും മാനസികമായി തളർത്തിയെന്ന് തുറന്നുപറഞ്ഞ് നടി താപ്‌സി പന്നു. മറ്റുള്ളവരുടെ വിമർശനങ്ങൾക്ക് അമിതപ്രാധാന്യം നൽകുകയും എല്ലാവരെയും സന്തോഷിപ്പിക്കാൻ ശ്രമിക്കുകയും ചെയ്തതാണ് ഒരുഘട്ടത്തിൽ തന്നെ വൈകാരികമായി തളർത്തിയതെന്ന് താരം വെളിപ്പെടുത്തി. മാനസികാരോഗ്യം സംരക്ഷിക്കുന്നതിനായി സമൂഹമാധ്യമങ്ങളിൽനിന്ന് അകന്നുനിൽക്കാനും തെറാപ്പിയുടെ സഹായം തേടാനും തീരുമാനിച്ചതിനെക്കുറിച്ചും ലോക മാനസികാരോഗ്യ ദിനത്തോടനുബന്ധിച്ച് ഹിന്ദുസ്ഥാൻ ടൈംസിന് നൽകിയ അഭിമുഖത്തിൽ താപ്‌സി സംസാരിച്ചു. ( Taapsee Pannu online trolling experience)
മാനസികാരോഗ്യത്തെക്കുറിച്ചുള്ള തന്റെ കാഴ്ചപ്പാട് കാലക്രമേണ മാറിയെന്ന് താരം പറഞ്ഞു. ക്ലിനിക്കൽ വിഷാദം പോലുള്ള ഗുരുതരമായ അവസ്ഥകളിലൂടെയോ വികാരങ്ങൾ പ്രകടിപ്പിക്കാൻ കഴിയാത്ത സാഹചര്യങ്ങളിലൂടെയോ കടന്നുപോകുന്നവർക്കാണ് തെറാപ്പി ആവശ്യമെന്നായിരുന്നു ആദ്യകാലത്തെ ധാരണ. എന്നാൽ ഇപ്പോഴത്തെ സാഹചര്യത്തിൽ ജീവിക്കാനും ജീവിതത്തിലുള്ള കാര്യങ്ങളിൽ സമാധാനം കണ്ടെത്താനും കഴിയുന്നതും മാനസികാരോഗ്യത്തിന്റെ ഭാഗമാണെന്ന് പിന്നീട് തിരിച്ചറിഞ്ഞതായി താപ്‌സി വ്യക്തമാക്കി. സിനിമാലോകത്ത് ഒരാളുടെ കരിയറും സ്ഥാനവും പലപ്പോഴും മറ്റുള്ളവരുടെ അഭിപ്രായങ്ങളെയും വിലയിരുത്തലുകളെയും ആശ്രയിച്ചിരിക്കുന്നതിനാൽ വിമർശനങ്ങളെ അവഗണിക്കുക എളുപ്പമല്ലെന്നും താരം പറഞ്ഞു. സമൂഹമാധ്യമങ്ങളിൽ സജീവമായിരുന്ന ആദ്യകാലത്ത് എല്ലാവരെയും തൃപ്തിപ്പെടുത്താനുള്ള അസാധ്യമായ ശ്രമമാണ് നടത്തിയിരുന്നത്. ഇത് തന്നെ മാനസികമായി തളർത്തിയെന്നും ആ യാഥാർഥ്യം അംഗീകരിക്കാൻ വർഷങ്ങളെടുത്തെന്നും താപ്‌സി വെളിപ്പെടുത്തി.
ട്രോളർമാരെ സന്തോഷിപ്പിക്കാൻ സമയം ചെലവഴിക്കുന്നതിനുപകരം അഭിനേത്രി എന്ന നിലയിലും വ്യക്തി എന്ന നിലയിലും സ്വയം മെച്ചപ്പെടുത്തുന്നതിൽ ശ്രദ്ധിക്കേണ്ടിയിരുന്നുവെന്ന് ഇപ്പോൾ തോന്നുന്നതായും താരം പറഞ്ഞു. വിമർശനങ്ങളെ നേരിടാൻ പഠിച്ചെങ്കിലും ഓൺലൈൻ അധിക്ഷേപങ്ങൾ ഇപ്പോഴും തന്നെ ബാധിക്കാറുണ്ടെന്ന് താപ്‌സി സമ്മതിച്ചു. സ്വന്തം വ്യക്തിത്വത്തോട് സത്യസന്ധത പുലർത്താൻ കഴിയാത്ത സാഹചര്യം ഒഴിവാക്കുന്നതിനായാണ് ഒരു ഘട്ടത്തിൽ സമൂഹമാധ്യമങ്ങളിൽനിന്ന് വിട്ടുനിന്നതെന്നും വ്യക്തമാക്കി.
കോവിഡ് മഹാമാരിക്കാലത്താണ് താപ്‌സി തെറാപ്പിയുടെ സഹായം തേടിയത്. ജോലിയുമായി ബന്ധപ്പെട്ട മാനസിക സമ്മർദങ്ങളിൽനിന്ന് മാറിനിൽക്കാൻ മുമ്പ് യാത്രകളെയും ഇടവേളകളെയും ആശ്രയിച്ചിരുന്നെങ്കിലും ലോക്ഡൗൺ അതിനുള്ള അവസരങ്ങൾ ഇല്ലാതാക്കി. വൈകാരികമായി തളർത്തുന്ന കഥാപാത്രങ്ങൾ നൽകിയ മാനസിക സമ്മർദവും ഇതോടൊപ്പം നേരിടേണ്ടിവന്നു. മുമ്പ് ഒഴിവാക്കാൻ ശ്രമിച്ച വികാരങ്ങളെ അഭിമുഖീകരിക്കേണ്ടിവന്നതോടെയാണ് തെറാപ്പി സെഷനുകളിലേക്ക് കടന്നതെന്നും താരം പറഞ്ഞു.
Summary: Taapsee Pannu has opened up about the emotional exhaustion caused by online trolling and the pressures of working in the film industry. She said she stepped away from social media to protect her mental well-being and sought therapy during the Covid-19 pandemic. The experience changed her understanding of mental health and the importance of finding inner peace.
