‘ഹേരാ ഫേരി 3’ ഒരിക്കലും സംഭവിച്ചേക്കില്ല; പ്രോജക്ടിൽ സങ്കീർണതകൾ ഏറെയെന്ന് പ്രിയദർശൻ | Priyadarshan on Hera Pheri 3

പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന ബോളിവുഡ് കോമഡി ചിത്രം ‘ഹേരാ ഫേരി 3’ യാഥാർഥ്യമാകുമോ എന്ന കാര്യത്തിൽ സംശയം പ്രകടിപ്പിച്ച് സംവിധായകൻ പ്രിയദർശൻ (Priyadarshan on Hera Pheri 3). ചിത്രവുമായി ബന്ധപ്പെട്ട് നിരവധി സങ്കീർണതകളുണ്ടെന്നും മൂന്നാം ഭാഗം ഒരിക്കലും സംഭവിച്ചേക്കില്ലെന്നുമാണ് സംവിധായകന്റെ പ്രതികരണം.

‘ഹിന്ദുസ്ഥാൻ ടൈംസി’ന് നൽകിയ അഭിമുഖത്തിലാണ് പ്രിയദർശൻ ഇക്കാര്യം വ്യക്തമാക്കിയത്. ‘ഹേരാ ഫേരി 3’ യാഥാർഥ്യമാകുമോ എന്ന ചോദ്യത്തിന്, “അതിൽ നിരവധി സങ്കീർണതകളുണ്ട്, ഒരുപാട് സങ്കീർണതകൾ. അതിനെക്കുറിച്ച് സംസാരിക്കാൻ തന്നെ അധ്യായങ്ങൾ വേണ്ടിവരും” എന്നായിരുന്നു അദ്ദേഹത്തിന്റെ മറുപടി. ചിത്രത്തിൽനിന്ന് പിന്മാറാനുള്ള തീരുമാനത്തെക്കുറിച്ചുള്ള ചോദ്യത്തിനിടെയായിരുന്നു പ്രതികരണം. മൂന്നാം ഭാഗം പുറത്തിറങ്ങുമോ എന്ന ചോദ്യത്തിന്, “അത് ഒരിക്കലും സംഭവിക്കുമെന്ന് ഞാൻ കരുതുന്നില്ല” എന്നും അദ്ദേഹം പറഞ്ഞു.

അക്ഷയ് കുമാർ, പരേഷ് റാവൽ, സുനിൽ ഷെട്ടി എന്നിവർ പ്രധാന വേഷങ്ങളിലെത്തിയ ‘ഹേരാ ഫേരി’ പരമ്പരയുടെ അടുത്ത ഭാഗത്തെക്കുറിച്ച് ഏറെക്കാലമായി അനിശ്ചിതത്വം തുടരുകയാണ്. ആദ്യ രണ്ട് ചിത്രങ്ങളും സംവിധാനം ചെയ്ത പ്രിയദർശന്റെ പുതിയ പ്രതികരണം ആരാധകരുടെ പ്രതീക്ഷകൾക്ക് തിരിച്ചടിയായേക്കും. വിജയിച്ച ചിത്രങ്ങളുടെ തുടർച്ചകൾ ഒരുക്കുന്നതിനെക്കുറിച്ചുള്ള തന്റെ നിലപാടും പ്രിയദർശൻ അഭിമുഖത്തിൽ വിശദീകരിച്ചു. രണ്ടാം ഭാഗം ആദ്യ ചിത്രത്തേക്കാൾ മികച്ചതായിരിക്കണം എന്നാണ് അദ്ദേഹത്തിന്റെ അഭിപ്രായം. ‘ടെർമിനേറ്റർ’ പരമ്പരയിലെ രണ്ടാം ചിത്രം ആദ്യത്തേതിനേക്കാൾ മികച്ചതായിരുന്നുവെന്നും അദ്ദേഹം ചൂണ്ടിക്കാട്ടി. അത്രയും മികച്ച കഥയില്ലെങ്കിൽ തുടർഭാഗം ഒരുക്കുന്നതിൽ അർഥമില്ലെന്നും അദ്ദേഹം പറഞ്ഞു.

ആദ്യ ചിത്രത്തിന്റെ ജനപ്രീതി മാത്രം മുതലെടുത്താണ് പല തുടർഭാഗങ്ങളും ഒരുക്കുന്നതെന്നും പ്രിയദർശൻ വിമർശിച്ചു. “അവർ ഒരു സിനിമയല്ല നിർമ്മിക്കുന്നത്, ഒരു പ്രോജക്ടാണ് തയ്യാറാക്കുന്നത്. അത്തരം പ്രോജക്ടുകളിൽ എനിക്ക് താൽപര്യമില്ല” എന്നായിരുന്നു അദ്ദേഹത്തിന്റെ വാക്കുകൾ. എന്നാൽ ‘ഹേരാ ഫേരി 3’യുമായി ബന്ധപ്പെട്ട സങ്കീർണതകൾ എന്തൊക്കെയാണെന്ന് അദ്ദേഹം വിശദീകരിച്ചിട്ടില്ല.

Summary: Director Priyadarshan has expressed doubts about whether Hera Pheri 3 will ever be made, citing numerous unresolved complications. He also said sequels should have a stronger story than the original rather than relying solely on the first film’s popularity.