ദീപാവലിക്ക് മുമ്പ് റെയിൽവേ ജീവനക്കാർക്ക് 78 ദിവസത്തെ ബോണസ്; പരമാവധി 17,951 രൂപ | Indian Railways bonus 2026,

ന്യൂഡൽഹി: ദീപാവലി ആഘോഷങ്ങൾക്ക് മുന്നോടിയായി റെയിൽവേ ജീവനക്കാർക്ക് 78 ദിവസത്തെ വേതനത്തിന് തുല്യമായ ഉൽപ്പാദനക്ഷമതാ ബോണസ് അനുവദിച്ച് കേന്ദ്രസർക്കാർ (Indian Railways bonus 2026,). പ്രധാനമന്ത്രിയുടെ അധ്യക്ഷതയിൽ ചേർന്ന കേന്ദ്ര മന്ത്രിസഭാ യോഗത്തിലാണ് തീരുമാനം. രാജ്യത്തെ 10 ലക്ഷത്തിലധികം റെയിൽവേ ജീവനക്കാർക്ക് ഇതിന്റെ പ്രയോജനം ലഭിക്കും. ബോണസ് വിതരണത്തിനായി 2,009.61 കോടി രൂപ ചെലവഴിക്കാനാണ് തീരുമാനം.

ഗസറ്റഡ് ഇതര വിഭാഗത്തിൽപ്പെടുന്ന ജീവനക്കാർക്കാണ് ബോണസ് അനുവദിച്ചിരിക്കുന്നത്. 78 ദിവസത്തെ വേതനത്തിന് തുല്യമായ തുകയാണെങ്കിലും ഒരാൾക്ക് ലഭിക്കുന്ന പരമാവധി ബോണസ് 17,951 രൂപയായിരിക്കും.

റെയിൽവേയുടെ പ്രവർത്തനമികവിൽ ജീവനക്കാർ നൽകിയ സംഭാവനയ്ക്കുള്ള അംഗീകാരമായാണ് ബോണസിനെ കേന്ദ്രം വിശേഷിപ്പിച്ചത്. ട്രാക്ക് മെയിന്റൈനർമാർ, ലോക്കോ പൈലറ്റുമാർ, ട്രെയിൻ മാനേജർമാർ, സ്റ്റേഷൻ മാസ്റ്റർമാർ, ടെക്നീഷ്യൻമാർ, പോയിന്റ്സ്മാൻമാർ, സൂപ്പർവൈസർമാർ തുടങ്ങി വിവിധ വിഭാഗങ്ങളിലെ ജീവനക്കാർ ബോണസിന് അർഹരാണ്.

രാജ്യത്തെ ചരക്കുനീക്കത്തിലും യാത്രക്കാരുടെ ഗതാഗതത്തിലും റെയിൽവേ കൈവരിച്ച നേട്ടങ്ങളും ബോണസ് അനുവദിക്കുന്നതിന് കാരണമായി കേന്ദ്രസർക്കാർ ചൂണ്ടിക്കാട്ടി. 2025–26 സാമ്പത്തിക വർഷത്തിൽ 1,670 ദശലക്ഷം ടൺ ചരക്ക് നീക്കിയതും ഏകദേശം 741 കോടി യാത്രക്കാരെ ലക്ഷ്യസ്ഥാനങ്ങളിലെത്തിച്ചതും റെയിൽവേയുടെ പ്രധാന നേട്ടങ്ങളായി സർക്കാർ വിലയിരുത്തി.

ദീപാവലിക്ക് മുമ്പുള്ള ബോണസ് പ്രഖ്യാപനം ജീവനക്കാർക്ക് അധിക സാമ്പത്തിക സഹായമാകുമെന്നാണ് പ്രതീക്ഷ.

Story Summary : The Union Cabinet has approved a productivity-linked bonus equivalent to 78 days’ wages for eligible non-gazetted railway employees ahead of Diwali. More than one million employees are expected to benefit, with a total outlay of ₹2,009.61 crore. The maximum bonus payable to an individual employee is ₹17,951.