അമേരിക്കയിൽ വധശിക്ഷ തത്സമയം സംപ്രേഷണം ചെയ്യാനുള്ള പെന്റഗൺ തീരുമാനം ട്രംപ് റദ്ദാക്കി: ഫോർട്ട് ഹുഡ് വെടിവെപ്പ് കേസ് പ്രതി നിദാൽ ഹസന്റെ വധശിക്ഷ ഡിസംബർ 3-ന് തന്നെ നടപ്പാക്കും; പെന്റഗൺ മേധാവി പീറ്റ് ഹെഗ്സെത്തിന്റെ നിർദ്ദേശം യു.എസ് പ്രസിഡന്റ് തള്ളിയത് ശക്തമായ ജനരോഷത്തിനും കത്തോലിക്കാ സഭാ തലവന്മാരുടെയും റിപ്പബ്ലിക്കൻ നേതാക്കളുടെയും എതിർപ്പിനും പിന്നാലെ
Current: മലയാളം
വാഷിംഗ്ടണ്‍: ഫോര്‍ട്ട് ഹുഡില്‍ 13 പേരെ വെടിവെച്ചുകൊന്ന മുന്‍ ആര്‍മി മേജര്‍ നിദാല്‍ ഹസന്റെ വധശിക്ഷ തത്സമയം സംപ്രേഷണം ചെയ്യാനുള്ള പെന്റഗണ്‍ തീരുമാനം യു.എസ് പ്രസിഡന്റ് ഡൊണാള്‍ഡ് ട്രംപ് റദ്ദാക്കി.
പ്രതിരോധ സെക്രട്ടറി പീറ്റ് ഹെഗ്സെത്തിന്റെ നിര്‍ദ്ദേശത്തിനെതിരെ റിപ്പബ്ലിക്കന്‍ നേതാക്കളില്‍ നിന്നും മതമേലധ്യക്ഷന്മാരിലും പൊതുജനങ്ങളില്‍ നിന്നും ശക്തമായ എതിര്‍പ്പുയര്‍ന്നതിനെ തുടര്‍ന്നാണ് തീരുമാനം.
ഡിസംബര്‍ 3-ന് ഫയറിംഗ് സ്‌ക്വാഡ് വഴി നടപ്പിലാക്കാന്‍ നിശ്ചയിച്ചിരിക്കുന്ന വധശിക്ഷ തത്സമയം സംപ്രേഷണം ചെയ്യുന്നത് ഭീകരര്‍ക്കുള്ള മുന്നറിയിപ്പാകുമായിരുന്നുവെങ്കിലും, ഒരാള്‍ മരിക്കുന്നത് ചിത്രങ്ങളിലൂടെയോ ദൃശ്യങ്ങളിലൂടെയോ കാണാന്‍ താല്പര്യമില്ലാത്ത ഒട്ടേറെ നല്ല മനുഷ്യരുണ്ടെന്ന് ചൂണ്ടിക്കാട്ടിയാണ് ട്രംപ് സോഷ്യല്‍ മീഡിയയിലൂടെ നിലപാട് വ്യക്തമാക്കിയത്.
വധശിക്ഷ സംപ്രേഷണം ചെയ്യില്ലെങ്കിലും നിശ്ചിത തീയതിയില്‍ തന്നെ നടപ്പിലാക്കുമെന്നും ഇരകളുടെ കുടുംബങ്ങള്‍ക്ക് അത് നേരിട്ട് കാണാന്‍ സൗകര്യമൊരുക്കുമെന്നും അദ്ദേഹം കൂട്ടിച്ചേര്‍ത്തു.
വധശിക്ഷാ സംപ്രേഷണ പദ്ധതിയെക്കുറിച്ച് തനിക്ക് മുന്‍കൂട്ടി അറിവില്ലായിരുന്നുവെന്ന് വെളിപ്പെടുത്തിയ ട്രംപ്, ഹെഗ്‌സെത്തുമായി സംസാരിച്ച ശേഷമാണ് അന്തിമ തീരുമാനമെടുത്തത്.
ഇതോടെ ട്രംപും അദ്ദേഹത്തിന്റെ ഏറ്റവും അടുത്ത അനുയായിയായ ഹെഗ്‌സെത്തും തമ്മില്‍ പരസ്യമായ അഭിപ്രായവ്യത്യാസം ഉടലെടുത്തുവെങ്കിലും, ഇരുവരും പൂര്‍ണ്ണമായും യോജിപ്പിലാണെന്ന് പെന്റഗണ്‍ പ്രസ്താവനയില്‍ വ്യക്തമാക്കി.
