മൂന്നര വർഷമായിട്ടും തൃശ്ശൂർ പൂരം അട്ടിമറി കേസ് എങ്ങുമെത്തിയില്ല; അന്വേഷണ റിപ്പോർട്ടിൽ തുടർനടപടികളില്ല | Thrissur Pooram sabotage case

തൃശ്ശൂർ: തൃശ്ശൂർ പൂരം അട്ടിമറിയുമായി ബന്ധപ്പെട്ട കേസ് മൂന്നര വർഷം പിന്നിട്ടിട്ടും തുടർനടപടികളില്ലാതെ അനിശ്ചിതത്വത്തിൽ. സംഭവത്തിൽ ഏഴുപേരെ പ്രതിചേർത്ത പ്രത്യേക അന്വേഷണ സംഘം ആറുമാസം മുമ്പ് ക്രൈംബ്രാഞ്ച് മേധാവിക്ക് റിപ്പോർട്ട് സമർപ്പിച്ചെങ്കിലും ഇതുവരെ നടപടിയുണ്ടായിട്ടില്ലെന്നാണ് റിപ്പോർട്ട് (Thrissur Pooram sabotage case). അന്വേഷണ റിപ്പോർട്ട് സർക്കാരിന്റെയോ കോടതിയുടെയോ പരിഗണനയിൽ എത്തിയിട്ടില്ലെന്നും വിവരമുണ്ട്.

തിരുവമ്പാടി ദേവസ്വത്തിലെ പ്രമുഖ ഭാരവാഹികൾക്കാണ് പൂരം അട്ടിമറിയിൽ പ്രധാന പങ്കുള്ളതെന്നാണ് അന്വേഷണ സംഘത്തിന്റെ കണ്ടെത്തലെന്നാണ് റിപ്പോർട്ട്. പ്രതിപ്പട്ടികയിലുള്ളവർ കോൺഗ്രസ്, സിപിഎം, ബിജെപി എന്നീ രാഷ്ട്രീയ പാർട്ടികളുമായി അടുത്ത ബന്ധമുള്ളവരാണെന്നും റിപ്പോർട്ടിൽ പറയുന്നു. ഇരുവിഭാഗങ്ങൾക്കിടയിൽ സ്പർധയുണ്ടാക്കാൻ ശ്രമിച്ചെന്ന ഗുരുതരമായ വകുപ്പും പ്രതികൾക്കെതിരെ ചുമത്തിയിട്ടുണ്ട്. അതേസമയം, രാഷ്ട്രീയവും പ്രാദേശികവുമായ സമ്മർദങ്ങളെ തുടർന്ന് അന്വേഷണ റിപ്പോർട്ടിൽ തുടർനടപടികൾ വൈകുകയാണെന്ന ആരോപണവും ഉയരുന്നുണ്ട്. റിപ്പോർട്ടിൽ നടപടി സ്വീകരിക്കുന്നതിന് പകരം തുടരന്വേഷണത്തിന് നീക്കം നടക്കുന്നതായും സൂചനയുണ്ട്. എന്നാൽ, ഇക്കാര്യങ്ങളിൽ ഔദ്യോഗിക സ്ഥിരീകരണം ലഭ്യമായിട്ടില്ല.

കേരളത്തിൽ വലിയ രാഷ്ട്രീയ വിവാദമായ പൂരം അട്ടിമറി കേസിൽ അന്വേഷണ റിപ്പോർട്ടിന്മേൽ തുടർനടപടികൾ എപ്പോൾ ഉണ്ടാകുമെന്നതിലാണ് ഇനി ശ്രദ്ധ. കേസ് നീണ്ടുപോകുന്നത് അന്വേഷണത്തിന്റെ ഭാവിയെക്കുറിച്ചുള്ള ചോദ്യങ്ങളും ഉയർത്തുന്നുണ്ട്.

Summary: The Thrissur Pooram sabotage case remains unresolved more than three years after the incident, despite a Special Investigation Team reportedly naming seven accused. The report, submitted to the Crime Branch chief six months ago, has allegedly seen no further action, raising questions about the next steps in the investigation.