മന്ത്രി ബിന്ദു കൃഷ്ണയുടെ സ്റ്റാഫിന് രമ്യ ഹരിദാസിന്റെ ഡ്രൈവർ ജോലി; കോൺഗ്രസിൽ ഭിന്നത രൂക്ഷമെന്ന് റിപ്പോർട്ട് | Ramya Haridas Staff Controversy

തിരുവനന്തപുരം: മന്ത്രി ബിന്ദു കൃഷ്ണയുടെ പേഴ്‌സണൽ സ്റ്റാഫിൽ ഉൾപ്പെട്ടവർ രമ്യ ഹരിദാസ് എംഎൽഎയ്ക്കുവേണ്ടി ജോലി ചെയ്യുന്നതായി റിപ്പോർട്ട്. മന്ത്രിയുടെ പേഴ്‌സണൽ സ്റ്റാഫ് അംഗമായ സുരേഷ് കുമാർ എംഎൽഎയുടെ ഡ്രൈവറായി പ്രവർത്തിക്കുന്നത്. നിയമസഭയിലേക്കും തിരിച്ചും എംഎൽഎയെ കൊണ്ടുപോയത് സുരേഷ് കുമാറാണെന്നാണ് റിപ്പോർട്ട്. മോട്ടോർ തൊഴിലാളി ക്ഷേമനിധി ബോർഡിലെ ജീവനക്കാരനായ അശ്വന്ത് എംഎൽഎയുടെ ഓഫീസിൽ ജോലി ചെയ്യുന്നതായും റിപ്പോർട്ടിലുണ്ട്. (Ramya Haridas Staff Controversy)

രമ്യ ഹരിദാസിന്റെ പ്രവർത്തനരീതിയിൽ അതൃപ്തിയുണ്ടെന്നും മണ്ഡലം തലത്തിൽ ജനവികാരം ഉയരുന്നുണ്ടെന്നും ചൂണ്ടിക്കാട്ടി എംഎൽഎയുടെ പ്രവർത്തനങ്ങളിൽ പാർട്ടി നിയന്ത്രണം വേണമെന്നാണ് ചില മണ്ഡലം കമ്മിറ്റികളുടെ നിർദേശമെന്നാണ് റിപ്പോർട്ട്. ജില്ലാ, പ്രാദേശിക നേതാക്കളെ എംഎൽഎ അവഗണിക്കുന്നുവെന്ന് ആരോപിച്ച് കെപിസിസിക്കും പരാതി നൽകിയിട്ടുണ്ട്. ചിറയിൻകീഴ് കോൺഗ്രസിലെ ഭിന്നതയും രൂക്ഷമായതായാണ് റിപ്പോർട്ട്. വ്യക്തിപരമായ കാരണങ്ങൾ ചൂണ്ടിക്കാട്ടി എംഎൽഎയുടെ പേഴ്‌സണൽ സ്റ്റാഫ് അംഗമായ വിമൽ കഴിഞ്ഞ ദിവസം രാജിവച്ചിരുന്നു. എന്നാൽ, എംഎൽഎയുമായുള്ള അഭിപ്രായവ്യത്യാസവും ഒരുമിച്ച് പ്രവർത്തിക്കാൻ കഴിയാത്ത സാഹചര്യവുമാണ് രാജിക്ക് പിന്നിലെന്നും സൂചനയുണ്ട്.

നേരത്തെ യൂത്ത് കോൺഗ്രസ് നേതാവ് പാളയം പ്രദീപിനെ പേഴ്‌സണൽ അസിസ്റ്റന്റായി നിയമിക്കാനുള്ള നീക്കവും കോൺഗ്രസിനുള്ളിൽ വിമർശനത്തിന് ഇടയാക്കിയിരുന്നു. സ്റ്റാഫ് നിയമനങ്ങളുമായി ബന്ധപ്പെട്ട വിവാദങ്ങളും പാർട്ടിക്കുള്ളിലെ തർക്കങ്ങളും ഇതോടെ വീണ്ടും ചർച്ചയായിരിക്കുകയാണ്.

Summary: A report alleges that staff members listed under Kerala Minister Bindu Krishna are working for MLA Ramya Haridas, including a ministerial staff member reportedly serving as the MLA’s driver. The report also points to internal disagreements within the Congress and complaints about the MLA’s working style. The allegations have prompted renewed discussion about staff arrangements and party-level tensions