നെടുമ്പാശേരി മിനികൂപ്പർ അപകടം: നാല് പ്രതികൾക്കും ജാമ്യമില്ല; പ്രോസിക്യൂഷൻ വാദം അംഗീകരിച്ച് അങ്കമാലി കോടതി | Nedumbassery Mini Cooper accident

കൊച്ചി: നെടുമ്പാശേരിയിൽ മൂന്ന് പേരുടെ മരണത്തിനിടയാക്കിയ മിനികൂപ്പർ കാർ അപകടക്കേസിൽ നാല് പ്രതികളുടെയും ജാമ്യാപേക്ഷ തള്ളി അങ്കമാലി മജിസ്‌ട്രേറ്റ് കോടതി. അന്വേഷണം നിർണായക ഘട്ടത്തിലാണെന്നും പ്രതികൾ മദ്യപിച്ചിരുന്നതിന് പ്രഥമദൃഷ്ട്യാ തെളിവുകളുണ്ടെന്നും പ്രോസിക്യൂഷൻ ചൂണ്ടിക്കാട്ടിയ വാദങ്ങൾ അംഗീകരിച്ചാണ് കോടതി ഉത്തരവ്. (Nedumbassery Mini Cooper accident)

ജാമ്യാപേക്ഷയിൽ ഇന്നലെ നടന്ന വാദത്തിനിടെ പ്രതിഭാഗവും പ്രോസിക്യൂഷനും ശക്തമായ വാദങ്ങളാണ് ഉന്നയിച്ചത്. അപകടത്തിൽ മരിച്ചവർ സ്കൂട്ടറിൽ മൂന്ന് പേർ യാത്ര ചെയ്തത് അപകടസാധ്യത വർധിപ്പിച്ചെന്നും കേസിൽ ഭാരതീയ ന്യായ സംഹിതയിലെ 105-ാം വകുപ്പ് ചുമത്താൻ മതിയായ തെളിവില്ലെന്നുമായിരുന്നു പ്രതിഭാഗത്തിന്റെ വാദം. സംഭവം സാധാരണ വാഹനാപകടമാണെന്നും മാധ്യമങ്ങൾ കേസിന് അമിതപ്രാധാന്യം നൽകിയെന്നുമുള്ള വാദങ്ങളും പ്രതിഭാഗം ഉന്നയിച്ചു.

സ്കൂട്ടറിൽ മൂന്ന് പേർ യാത്ര ചെയ്തതാണ് അപകടത്തിന് കാരണമെന്ന വാദത്തെ കോടതി ചോദ്യം ചെയ്തു. മൂന്ന് പേർ ഒരുമിച്ച് യാത്ര ചെയ്തതുകൊണ്ടാണോ കാർ സ്കൂട്ടറിലിടിച്ചതെന്നായിരുന്നു കോടതിയുടെ മറുചോദ്യം. അതേസമയം, കേസിലെ കുറ്റാരോപണങ്ങളുടെ ഗൗരവവും തെളിവുകളും പരിഗണിക്കണമെന്ന നിലപാടിലായിരുന്നു പ്രോസിക്യൂഷൻ. പ്രതികളുടെ രക്തവും മൂത്രവും പരിശോധിച്ചതിൽ നിന്ന് മദ്യപിച്ചിരുന്നതായി സ്ഥിരീകരിച്ചിട്ടുണ്ടെന്ന് പ്രോസിക്യൂഷൻ കോടതിയെ അറിയിച്ചു. അപകടത്തിന്റെ ആഘാതവും സാഹചര്യങ്ങളും വിലയിരുത്തുന്നതിനായി വാഹനത്തിലെ ഇലക്ട്രോണിക് ഡാറ്റ റെക്കോർഡർ പരിശോധനയ്ക്കായി അയച്ചിട്ടുണ്ടെന്നും അന്വേഷണത്തിൽ നിർണായക വിവരങ്ങൾ ലഭിക്കാനുണ്ടെന്നും വ്യക്തമാക്കി. കുറ്റത്തിന്റെ ഗൗരവവും അന്വേഷണത്തിന്റെ ഘട്ടവും കണക്കിലെടുത്ത് ജാമ്യം അനുവദിക്കരുതെന്ന പ്രോസിക്യൂഷൻ ആവശ്യം കോടതി അംഗീകരിച്ചു.

നെടുമ്പാശേരിയിൽ പുലർച്ചെയുണ്ടായ അപകടത്തിൽ സ്കൂട്ടറിൽ സഞ്ചരിച്ചിരുന്ന മൂന്ന് പേരാണ് മരിച്ചത്. സംഭവത്തിൽ കാർ ഓടിച്ചിരുന്ന സുഹൈൽ സജീവിനും വാഹനത്തിലുണ്ടായിരുന്ന മറ്റ് മൂന്ന് പേർക്കുമെതിരെയാണ് കേസെടുത്തിരിക്കുന്നത്. ജാമ്യാപേക്ഷ തള്ളിയതോടെ കേസിലെ പ്രതികൾക്ക് കോടതിയിൽ നിന്ന് തിരിച്ചടിയായി.

Summary: The Angamaly Magistrate Court has rejected the bail pleas of all four accused in the Nedumbassery Mini Cooper crash that killed three people. The court accepted the prosecution’s arguments about alleged intoxication, the seriousness of the charges and the crucial stage of the investigation.