ഇൻസ്റ്റഗ്രാമിൽ നിന്ന് 1.75 കോടി ഉപയോക്താക്കളുടെ വിവരങ്ങൾ ചോർന്നുവെന്ന വാർത്തകൾ നിഷേധിച്ച് മെറ്റ. ഉപയോക്താക്കളുടെ യൂസർനെയിം, ഫോൺ നമ്പർ, ഇമെയിൽ വിലാസം എന്നിവയുൾപ്പെടെയുള്ള വ്യക്തിഗത വിവരങ്ങൾ ഡാർക്ക് വെബിൽ എത്തിയെന്ന് സൈബർ സുരക്ഷാ കമ്പനിയായ മാൽവെയർബൈറ്റ്സ് റിപ്പോർട്ട് ചെയ്തിരുന്നു. എന്നാൽ ഈ ആരോപണങ്ങൾ പൂർണ്ണമായും അടിസ്ഥാനരഹിതമാണെന്നും ഡാറ്റാ ലീക്ക് ഉണ്ടായിട്ടില്ലെന്നുമാണ് കാലിഫോർണിയ ആസ്ഥാനമായ മെറ്റയുടെ വിശദീകരണം.
ഇൻസ്റ്റഗ്രാമിലെ സുരക്ഷാ വീഴ്ചയെക്കുറിച്ചുള്ള ആശങ്കകൾ വർധിപ്പിച്ചുകൊണ്ട്, 17.5 ദശലക്ഷം ഉപയോക്താക്കളുടെ വിവരങ്ങൾ ഡാർക്ക് വെബിൽ വിൽപ്പനയ്ക്ക് വെച്ചിട്ടുണ്ടെന്നാണ് സൈബർ സുരക്ഷാ കമ്പനിയായ മാൽവെയർബൈറ്റ്സിൻ്റെ റിപ്പോർട്ട്. ഈ വിവരങ്ങൾ ഉപയോഗിച്ച് ഹാക്കർമാർ അക്കൗണ്ടുകൾ കൈക്കലാക്കുമോ എന്നും, ഫിഷിംഗ്, സോഷ്യൽ എഞ്ചിനീയറിംഗ് തുടങ്ങിയ സൈബർ ആക്രമണങ്ങൾക്ക് ഇത് കാരണമാകുമോ എന്നുമുള്ള ഭീതി ലോകവ്യാപകമായി പടർന്നിരിക്കുകയാണ്. മെറ്റ ഔദ്യോഗികമായി സ്ഥിരീകരിച്ചിട്ടില്ലെങ്കിലും, 2024-ൽ ഇന്സ്റ്റഗ്രാം എപിഐ (API) എക്സ്പോഷർ വഴിയുണ്ടായ ഡാറ്റാ ചോർച്ചയാകാം ഇതെന്ന് വിദഗ്ധർ സംശയിക്കുന്നു.
Also Read: നിങ്ങൾ ജീവനോടെയുണ്ടോ?” ചൈനയിൽ തരംഗമായി ‘Are You Dead?’ ആപ്പ്
ഇൻസ്റ്റഗ്രാം ഉപയോക്താക്കൾ ആവശ്യപ്പെടാതെ തന്നെ തുടർച്ചയായി പാസ്വേഡ് റീസെറ്റിംഗ് ഇമെയിലുകൾ ലഭിച്ചത് പ്ലാറ്റ്ഫോമിന്റെ സുരക്ഷയെക്കുറിച്ച് വലിയ ആശങ്കകൾക്ക് വഴിവെച്ചു. ഹാക്കർമാർ വ്യാപകമായി അക്കൗണ്ടുകളിൽ നുഴഞ്ഞുകയറാൻ ശ്രമിക്കുന്നതിന്റെ ലക്ഷണമാണിതെന്ന് കരുതിയ ഉപയോക്താക്കൾക്കിടയിൽ ഇത് പരിഭ്രാന്തി സൃഷ്ടിച്ചു. അക്കൗണ്ട് ഉടമകൾ അറിയാതെ ഇത്തരത്തിൽ ഇമെയിലുകൾ വന്നത് ഇൻസ്റ്റഗ്രാം നേരിടുന്ന സുരക്ഷാ ഭീഷണിയാണെന്ന തരത്തിലുള്ള ചർച്ചകളും ഇതോടെ സജീവമായി.
എന്നാൽ, ഈ വിഷയത്തിൽ ഔദ്യോഗിക വിശദീകരണവുമായി മെറ്റ രംഗത്തെത്തി. ഇൻസ്റ്റഗ്രാമിന് പുറത്തുള്ളവർക്ക് പാസ്വേഡ് റീസെറ്റിംഗ് ഇമെയിലുകൾ അയക്കാൻ സാധിക്കുന്ന ഒരു സാങ്കേതിക പിഴവ് കണ്ടെത്തി പരിഹരിച്ചതായും, ഇതിൽ ആശങ്കപ്പെടേണ്ടതില്ലെന്നും അധികൃതർ അറിയിച്ചു. സിസ്റ്റങ്ങളിലേക്ക് അനധികൃതമായി ആരും പ്രവേശിച്ചിട്ടില്ലെന്നും ഡാറ്റാ ചോർച്ച ഉണ്ടായിട്ടില്ലെന്നും വ്യക്തമാക്കിയ കമ്പനി, ലഭിച്ച ഇമെയിലുകൾ അവഗണിക്കാൻ ഉപയോക്താക്കളോട് നിർദ്ദേശിച്ചു. ഉപയോക്താക്കൾക്കുണ്ടായ ബുദ്ധിമുട്ടിൽ ക്ഷമ ചോദിച്ച മെറ്റ, എല്ലാ അക്കൗണ്ടുകളും സുരക്ഷിതമാണെന്ന് ഉറപ്പുനൽകുകയും ചെയ്തു.
The post ഇൻസ്റ്റഗ്രാം ഡാറ്റാ ചോർച്ച! വാർത്തകൾ തള്ളി മെറ്റ; പാസ്വേഡ് റീസെറ്റ് മെയിലുകളിൽ വിശദീകരണവുമായി കമ്പനി appeared first on Express Kerala.
