ഡൽഹിയിൽ പ്രഭാതങ്ങളിൽ വായുമലിനീകരണം അതീവ രൂക്ഷം; എക്യൂഐ 200 കടന്ന് കുതിക്കുന്നു, വായുനിലവാരം തകരാൻ കാരണം ‘ടെമ്പറേച്ചർ ഇൻവേർഷൻ’ എന്ന് വിലയിരുത്തൽ
Current: മലയാളം
ഡല്‍ഹി: ഡല്‍ഹി-എന്‍.സി.ആര്‍ മേഖലയില്‍ വായുമലിനീകരണം വന്‍തോതില്‍ വര്‍ദ്ധിക്കുന്നതിന്റെയും പ്രഭാത സമയങ്ങളില്‍ വായുനിലവാരം 200ന് മുകളിലേക്ക് ഉയര്‍ന്ന് അതീവ ഗുരുതരമാകുന്നതിന്റെയും കാരണങ്ങള്‍ വ്യക്തമാക്കി പരിസ്ഥിതി നിരീക്ഷണ റിപ്പോര്‍ട്ടുകള്‍.
രാത്രികാലങ്ങളില്‍ അന്തരീക്ഷത്തില്‍ രൂപപ്പെടുന്ന മലിനീകരണം പുലര്‍ച്ചെയോടെ ഉച്ചസ്ഥായിയിലെത്തുകയും, പകല്‍ മുന്നോട്ട് പോകുന്തോറും കുറഞ്ഞു വരികയും ചെയ്യുന്ന പ്രതിഭാസമാണ് ഡല്‍ഹിയില്‍ ദൃശ്യമാകുന്നത്.
ഒക്ടോബര്‍ 18 മുതല്‍ 20 വരെയുള്ള വായുനിലവാര കണക്കുകള്‍ പരിശോധിക്കുമ്പോള്‍, ഏതാനും മണിക്കൂറുകള്‍ക്കുള്ളില്‍ അന്തരീക്ഷത്തിലുണ്ടാകുന്ന കാലാവസ്ഥാ മാറ്റങ്ങള്‍ വായുവിനെ എത്രത്തോളം ദോഷകരമായി ബാധിക്കുന്നുവെന്ന് വ്യക്തമാകുന്നു.
ഒക്ടോബര്‍ 18-ന് ഉച്ചയ്ക്ക് ശേഷം 125-130 നിലയിലായിരുന്ന എക്യൂഐ ഒക്ടോബര്‍ 19 രാവിലെ 7.31-ഓടെ 191 ലേക്കും, തൊട്ടടുത്ത ദിവസം രാവിലെ 210-215 ലേക്കും കുതിച്ചുയരുകയായിരുന്നു.
ഡല്‍ഹിയില്‍ ഉല്‍പ്പാദിപ്പിക്കപ്പെടുന്ന മലിനീകരണ തോത് മാത്രമല്ല, അന്തരീക്ഷത്തിന് അത് എത്രത്തോളം വേഗത്തില്‍ പുറന്തള്ളാന്‍ സാധിക്കുന്നു എന്നതിനെ ആശ്രയിച്ചാണ് ഈ പ്രതിസന്ധി രൂപപ്പെടുന്നത്. പുലര്‍ച്ചെ വായുനിലവാരം ക്രമാതീതമായി തകരാന്‍ പ്രധാന കാരണം ‘ടെമ്പറേച്ചര്‍ ഇന്‍വേര്‍ഷന്‍’ എന്ന പ്രതിഭാസമാണ്.
സാധാരണ നിലയില്‍ ഭൂമിക്ക് സമീപമുള്ള ചൂടുള്ള വായു ഉയര്‍ന്ന തലങ്ങളിലേക്ക് ഉയരുകയും മലിനീകരണ കണികകളെ അന്തരീക്ഷത്തില്‍ പടര്‍ത്താന്‍ സഹായിക്കുകയും ചെയ്യും.
എന്നാല്‍ ഒക്ടോബര്‍ മാസത്തോടെ രാത്രികാലങ്ങളില്‍ തണുപ്പ് കൂടുമ്പോള്‍, ഭൂമിക്ക് മുകളില്‍ തണുത്ത വായുവും അതിന് മുകളിലായി ചൂടുള്ള വായുവിന്റെ പാളിയും രൂപപ്പെടുന്നു. ഇത് വായുവിന്റെ ലംബമായ ചലനത്തെ തടയുകയും വാഹനം, വ്യവസായം, മാലിന്യങ്ങള്‍ കത്തിക്കല്‍ എന്നിവയില്‍ നിന്നുള്ള മലിനീകരണ ശ്വാസവായുവില്‍ തങ്ങിനില്‍ക്കാന്‍ ഇടയാക്കുകയും ചെയ്യുന്നു.
