ടൈഗറിനെ ആക്രമിക്കാന്‍ ആയുധം എത്തിച്ച സംഘത്തില്‍ സ്ത്രീകളും; ടൈഗറിന്റെ നീക്കങ്ങള്‍ അറിഞ്ഞത് ആരാധകരുടെ സോഷ്യല്‍ മീഡിയ പോസ്റ്റില്‍ നിന്ന്. ലോറന്‍സ് ബിഷ്ണോയ് സംഘത്തിന്റെ യഥാര്‍ഥ ലക്ഷ്യം സല്‍മാന്‍ ഖാന്‍ ആയിരുന്നുവെന്നും പുതിയ വെളിപ്പെടുത്തൽ
Current: മലയാളം
മുംബൈ: ബോളിവുഡ് താരം ടൈഗര്‍ ഷറോഫിന് നേരെ നടന്ന വെടിവെപ്പ് കേസില്‍ നിര്‍ണായക വിവരങ്ങളുമായി മുംബൈ പൊലീസും ഡല്‍ഹി പൊലീസും.
ലോറന്‍സ് ബിഷ്ണോയ് സംഘത്തിന്റെ യഥാര്‍ഥ ലക്ഷ്യം സല്‍മാന്‍ ഖാന്‍ ആയിരുന്നുവെന്നും, എന്നാല്‍ കനത്ത സുരക്ഷ കാരണം പദ്ധതി മാറ്റിയ സംഘം പിന്നീട് ടൈഗര്‍ ഷറോഫിനെ എളുപ്പമുള്ള ലക്ഷ്യമായി തെരഞ്ഞെടുക്കുകയായിരുന്നുവെന്നും പൊലീസ് വൃത്തങ്ങള്‍ വ്യക്തമാക്കി.
ഇതിനിടയില്‍, കേസില്‍ പങ്കാളികളായ രണ്ട് സ്ത്രീകള്‍ ഉള്‍പ്പെടെ നാല് പേരെക്കൂടി ഡല്‍ഹി പൊലീസ് സ്‌പെഷല്‍ സെല്‍ അറസ്റ്റ് ചെയ്തു.
സല്‍മാന്‍ ഖാന്റെ ബാന്ദ്രയിലെ വസതിക്ക് പുറത്തുള്ള കനത്ത സുരക്ഷ കാരണം ആക്രമണം നടത്താന്‍ സാധിക്കാതെ വന്നതോടെയാണ് ബിഷ്ണോയ് സംഘം ലക്ഷ്യം മാറ്റിയത്. സല്‍മാന്‍ ഖാനുമായി അടുത്ത ബന്ധമുള്ളവരെയും സിനിമാ മേഖലയിലുള്ളവരെയും ലക്ഷ്യമിടാനായിരുന്നു സംഘത്തിന്റെ നീക്കം.
സല്‍മാന്‍ ഖാന്റെ വീടിന് മുന്നില്‍ നിരീക്ഷണം നടത്തിയെങ്കിലും സുരക്ഷാ വീഴ്ചകളില്ലാത്തതിനാല്‍ ആക്രമണം അസാധ്യമാണെന്ന് പ്രതികള്‍ തിരിച്ചറിഞ്ഞു.
ഇതിനിടയില്‍ ടൈഗര്‍ ഷറോഫിന് ഔദ്യോഗിക പൊലീസ് സുരക്ഷ ഇല്ലെന്നും, അദ്ദേഹം എല്ലാ ഞായറാഴ്ചയും ജുഹുവിലെ മൈതാനത്ത് ഫുട്‌ബോള്‍ കളിക്കാന്‍ എത്താറുണ്ടെന്നും ആരാധകര്‍ സമൂഹമാധ്യമങ്ങളില്‍ പങ്കുവെച്ച പോസ്റ്റുകളില്‍ നിന്ന് പ്രതികള്‍ മനസ്സിലാക്കുകയായിരുന്നു.
ഞായറാഴ്ച വൈകുന്നേരം ജുഹുവിലെ പുഷ്പ നര്‍സി ഗ്രൗണ്ടിന് പുറത്തുവെച്ചാണ് ടൈഗര്‍ ഷറോഫിന്റെ കാറിന് നേരെ പ്രതികള്‍ വെടിയുതിര്‍ത്തത്. ഭാഗ്യവശാല്‍ ടൈഗറിന് നേരെ വെടിയുതിര്‍ക്കാന്‍ ശ്രമിച്ച പ്രതിയുടെ തോക്ക് ജാം ആയതിനാലും, തക്കസമയത്ത് കാര്‍ നീങ്ങിയതിനാലും താരം ദുരന്തത്തില്‍ നിന്ന് രക്ഷപ്പെടുകയായിരുന്നു. ആക്രമണത്തില്‍ നടന്റെ ഡ്രൈവര്‍ക്കും സമീപത്തുണ്ടായിരുന്ന ഒരു വ്‌ലോഗര്‍ക്കും പരിക്കേറ്റിരുന്നു.
കേസുമായി ബന്ധപ്പെട്ട് ഡല്‍ഹിയിലും ഹരിയാനയിലുമായി രണ്ട് സ്ത്രീകള്‍ ഉള്‍പ്പെടെ നാല് പേരെ ഡല്‍ഹി പൊലീസ് സ്‌പെഷ്യല്‍ സെല്‍ പിടുകൂടി. കുനാല്‍, സുമിത്, രാധ, ബബിത എന്നിവരാണ് അറസ്റ്റിലായത്.
ഇതില്‍ രാധയും ബബിതയും ന്യൂഡല്‍ഹി റെയില്‍വേ സ്റ്റേഷനില്‍ വെച്ചും, കുനാലും സുമിതും ഹരിയാനയിലെ സോനിപത്തില്‍ വെച്ചുമാണ് പിടിയിലായത്. പ്രതികള്‍ക്ക് തോക്കുകളും വെടിയുണ്ടകളും തരപ്പെടുത്തി നല്‍കിയതും, മുംബൈയിലെത്തിക്കാന്‍ സഹായിച്ചതും ഇവരാണ്.
അമൃത്സറില്‍ നിന്ന് തോക്കുകള്‍ സംഘടിപ്പിച്ച ശേഷം, രാധയും ബബിതയും ട്രെയില്‍ മുംബൈയിലെ ദാദര്‍ സ്റ്റേഷനില്‍ എത്തിയാണ് പ്രതികള്‍ക്ക് ആയുധങ്ങള്‍ കൈമാറിയത്. ആയുധങ്ങള്‍ കൈമാറിയ ശേഷം ഇവര്‍ അതേദിവസം തന്നെ ഹരിദ്വാര്‍ എക്‌സ്പ്രസില്‍ ഡല്‍ഹിയിലേക്ക് മടങ്ങുകയും ചെയ്തു. പിടിയിലായവരെ തുടര്‍നടപടികള്‍ക്കായി മുംബൈ പൊലീസിന് കൈമാറിയിട്ടുണ്ട്.
ഷൂട്ടര്‍മാരായ ഹൃതിക് എന്ന റോഷന്‍ (22), റേഷന്‍ (18), ഫൂല്‍ സിംഗ് (18) എന്നിവരെ നേരത്തെ രാജസ്ഥാനിലെ കോട്ടയില്‍ നിന്ന് പോലീസ് അറസ്റ്റ് ചെയ്തിരുന്നു. നേപ്പാളിലേക്ക് കടക്കാനുള്ള ശ്രമത്തിനിടയിലാണ് ഇവര്‍ പിടിയിലായത്.
ബിഷ്ണോയ് സംഘാംഗമായ അനില്‍ പണ്ഡിറ്റാണ് ഈ ആക്രമണത്തിന് പിന്നില്‍ പ്രവര്‍ത്തിച്ചതെന്നും, സല്‍മാന്‍ ഖാനൊപ്പം പ്രവര്‍ത്തിക്കുന്നവര്‍ക്കും തങ്ങളുടെ നിര്‍ദ്ദേശങ്ങള്‍ അനുസരിക്കാത്തവര്‍ക്കും ഉള്ള മുന്നറിയിപ്പാണ് ഈ ആക്രമണമെന്നും സംഘം സമൂഹമാധ്യമങ്ങളിലൂടെ അവകാശപ്പെട്ടിരുന്നു.
