ഇഡ്ഡലിക്കുള്ളിൽ ബട്ടർ ചിക്കൻ; പുതിയ ഫ്യൂഷൻ വിഭവത്തിനെതിരെ സോഷ്യൽ മീഡിയയിൽ വിമർശനം | Butter chicken stuffed idli

പരമ്പരാഗത ദക്ഷിണേന്ത്യൻ വിഭവമായ ഇഡ്ഡലിക്കുള്ളിൽ ബട്ടർ ചിക്കൻ നിറച്ച വിഭവം സമൂഹമാധ്യമങ്ങളിൽ ചർച്ചയാകുന്നു. ഭക്ഷണ വിതരണ സ്റ്റാർട്ടപ്പായ സ്വിഷ് അവതരിപ്പിച്ച ഈ ഫ്യൂഷൻ വിഭവത്തിനെതിരെ നിരവധി പേരാണ് രംഗത്തെത്തിയത്. ചിലർ ഇതിനെ ‘പാചകത്തിലെ കുറ്റകൃത്യം’ എന്ന് വിശേഷിപ്പിച്ചപ്പോൾ, പരീക്ഷണത്തെ പിന്തുണച്ചവരും രുചികരമാണെന്ന് അഭിപ്രായപ്പെട്ടവരുമുണ്ട്. (Butter chicken stuffed idli)

Minimum 20 years jail @justswishin https://t.co/rM1aBtCbuW

— Vansh (@yougotvansh) October 21, 2026

വാൻഷ് എന്ന എക്സ് ഉപയോക്താവാണ് വിഭവത്തിന്റെ ചിത്രം പങ്കുവച്ച് ചർച്ചയ്ക്ക് തുടക്കമിട്ടത്. കമ്പനിയെ ടാഗ് ചെയ്തുകൊണ്ട്, ഇത്തരമൊരു വിഭവം അവതരിപ്പിച്ചതിന് കുറഞ്ഞത് 20 വർഷത്തെ തടവെങ്കിലും നൽകണമെന്നായിരുന്നു പരിഹാസരൂപത്തിലുള്ള പ്രതികരണം. മൃദുവായ ഇഡ്ഡലിക്കുള്ളിൽ മസാലകളും വെണ്ണയും ചേർത്ത ബട്ടർ ചിക്കൻ നിറയ്ക്കുന്ന ആശയം പലരെയും അത്ഭുതപ്പെടുത്തി. ഇഡ്ഡലിയുടെ പരമ്പരാഗത രുചിയും സ്വഭാവവും ഇത്തരത്തിൽ മാറ്റരുതെന്ന് ചിലർ അഭിപ്രായപ്പെട്ടു. ‘ഇഡ്ഡലിയെ വെറുതെ വിടൂ’ എന്ന തരത്തിലുള്ള പ്രതികരണങ്ങൾക്കൊപ്പം വിഭവത്തെ വെടിവച്ച് ശിക്ഷിക്കണമെന്നുവരെ തമാശയായി കുറിച്ചവരുണ്ട്. എന്നാൽ, പരീക്ഷിക്കാതെ വിഭവത്തെ വിമർശിക്കുന്നത് ശരിയല്ലെന്നും ചിക്കൻ നിറച്ച ബാവോ ബണ്ണിനോട് സാമ്യമുള്ള ഈ വിഭവം രുചികരമായിരിക്കാമെന്നും ചിലർ വാദിച്ചു. സ്റ്റഫ് ചെയ്ത ഇഡ്ഡലി നേരത്തേ കഴിച്ചിട്ടുള്ളവർ ഇത് നല്ല രുചിയുള്ളതാണെന്നും അഭിപ്രായപ്പെട്ടു. പരമ്പരാഗത വിഭവങ്ങളിൽ പുതിയ പരീക്ഷണങ്ങൾ നടത്തുന്നതിനെച്ചൊല്ലിയുള്ള ചർച്ചകൾക്ക് ഈ വിഭവവും വഴിയൊരുക്കിയിരിക്കുകയാണ്.

Summary: A butter chicken-stuffed idli introduced by food delivery startup Swish has sparked debate on social media. While critics called the fusion dish a culinary crime and objected to changing a traditional South Indian staple, some users defended the experiment and said it looked delicious.