10 ലക്ഷം ആളുകൾ, 20,000 വാഹനങ്ങൾ, വൻ ഗതാഗതക്കുരുക്ക്: നവംബർ 1-ലെ റാലിയിൽ രാഹുൽ ഗാന്ധിക്ക് കത്തയച്ച് ഡൽഹിയിലെ വ്യാപാരികൾ | Delhi Traders

ന്യൂഡൽഹി: ഇന്ത്യാ സഖ്യം നവംബർ 1-ന് ഡൽഹിയിൽ നടത്തുന്ന വൻ പ്രതിഷേധ റാലി ദീപാവലിക്ക് ശേഷത്തേക്ക് മാറ്റിവെക്കണമെന്ന് ആവശ്യപ്പെട്ട് ചേംബർ ഓഫ് ട്രേഡ് ആൻഡ് ഇൻഡസ്ട്രി ലോക്‌സഭാ പ്രതിപക്ഷ നേതാവ് രാഹുൽ ഗാന്ധിക്ക് കത്തയച്ചു. ദീപാവലി കച്ചവട സീസണിന്റെ ഉച്ചസ്ഥായിയിൽ രാംലീല മൈതാനത്ത് 10 ലക്ഷം ആളുകളെ അണിനിരത്തി റാലി നടത്തുന്നത് കച്ചവടത്തെ സാരമായി ബാധിക്കുമെന്നാണ് വ്യാപാരികളുടെ ആശങ്ക.(Delhi Traders Write To Rahul Gandhi Postpone November 1 INDIA Bloc Rally Diwali)

ഇത് സംബന്ധിച്ച് കോൺഗ്രസ് അധ്യക്ഷൻ മല്ലികാർജുൻ ഖാർഗെക്കും കത്തിന്റെ പകർപ്പ് അയച്ചിട്ടുണ്ട്. മുന്നണിയിലെ മറ്റ് ഘടകകക്ഷികളുമായി ചർച്ച ചെയ്ത് അനുകൂല തീരുമാനമെടുക്കണമെന്ന് സി.ടി.ഐ ചെയർമാൻ ബ്രിജേഷ് ഗോയൽ ആവശ്യപ്പെട്ടു. എന്നാൽ സമരം മാറ്റിവെക്കാനാവില്ലെന്ന സൂചനയാണ് രാഹുൽ ഗാന്ധി നൽകിയത്. പ്രധാനമന്ത്രി നരേന്ദ്ര മോദി മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ പുറത്താക്കുകയാണെങ്കിൽ “30 സെക്കൻഡിൽ” സമരം അവസാനിപ്പിക്കാമെന്ന് രാഹുൽ ഗാന്ധി സോഷ്യൽ മീഡിയയായ എക്സിൽ കുറിച്ചു.

“വോട്ടുകൾ ചോർന്നുപോയാൽ നിങ്ങളുടെ കടയോ സമ്പാദ്യമോ കുട്ടികളുടെ ഭാവിപോലുമോ സുരക്ഷിതമല്ല. സർക്കാരാണ് വഴികളും മെട്രോയും അടച്ച് തലസ്ഥാനത്തെ പൂട്ടിയിട്ടത്,” എന്ന് വ്യക്തമാക്കിയ രാഹുൽ ഗാന്ധി വ്യാപാരികളുടെ ആശങ്കകൾ മനസ്സിലാക്കുന്നുണ്ടെന്നും കൂട്ടിച്ചേർത്തു. രാംലീല മൈതാനത്തിന് ചുറ്റുമുള്ള ചാന്ദ്‌നി ചൗക്ക്, സദർ ബസാർ, ഖാരി ബവോലി, കരോൾ ബാഗ് തുടങ്ങി 20-ഓളം വൻകിട മൊത്ത-ചില്ലറ വിൽപ്പന വിപണികളെ റാലി പ്രതികൂലമായി ബാധിക്കും.

ഒക്ടോബർ 10-ന് ജന്തർ മന്തറിൽ വളരെ കുറച്ച് ആളുകൾ പങ്കെടുത്ത സമരത്തിന് പോലും സെൻട്രൽ ഡൽഹി അടച്ചിടേണ്ടി വന്നതിലൂടെ 3,000 കോടിയുടെ നഷ്ടമുണ്ടായി. 10 ലക്ഷം ആളുകളും 20,000-ത്തോളം വാഹനങ്ങളും എത്തുന്ന നവംബർ 1-ലെ റാലി കാരണം 10,000 കോടി രൂപയുടെ നഷ്ടം ഉണ്ടാകുമെന്നാണ് വ്യാപാരികൾ കണക്കാക്കുന്നത്. റാലി മാറ്റിവെക്കാൻ സാധിക്കില്ലെങ്കിൽ കച്ചവട കേന്ദ്രങ്ങളെ ബാധിക്കാത്ത രീതിയിൽ ബുരാരി ഗ്രൗണ്ട് അല്ലെങ്കിൽ ജവാഹർലാൽ നെഹ്റു സ്റ്റേഡിയം എന്നിവിടങ്ങളിലേക്ക് വേദി മാറ്റണമെന്നും വ്യാപാരികൾ നിർദ്ദേശിച്ചു. മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഇന്ത്യാ സഖ്യം നടത്തുന്ന രാജ്യവ്യാപക പ്രക്ഷോഭങ്ങളുടെ ഭാഗമായാണ് നവംബർ 1-ന് വൻ റാലി പ്രഖ്യാപിച്ചിരിക്കുന്നത്.

Story Summary

The Chamber of Trade and Industry (CTI) has written to Rahul Gandhi urging him to reschedule the INDIA bloc’s November 1 mega rally at Ramlila Maidan to after Diwali, fearing a ₹10,000 crore business loss due to traffic gridlock. However, Rahul Gandhi responded that the protests could stop in “30 seconds” if PM Modi removes Chief Election Commissioner Gyanesh Kumar.