ഇസ്രയേലിൽ തിരഞ്ഞെടുപ്പ് തുടങ്ങി; ഒക്ടോബർ 7 ആക്രമണം ഓർമിപ്പിച്ച് ഐസൻകോട്ട്, ശക്തനായ നേതാവിന്റെ പ്രതിച്ഛായയിൽ നെതന്യാഹു | Israel general election

ഇസ്രയേലിൽ പൊതുതിരഞ്ഞെടുപ്പിനുള്ള വോട്ടെടുപ്പ് ആരംഭിച്ചു. 73,31,981 വോട്ടർമാരാണ് ഇത്തവണ സമ്മതിദാനാവകാശം വിനിയോഗിക്കുന്നത്. പ്രാദേശിക സമയം ചൊവ്വാഴ്ച രാത്രി പത്തുമണിവരെ വോട്ടെടുപ്പ് തുടരും. പ്രധാനമന്ത്രി ബെഞ്ചമിൻ നെതന്യാഹുവിനെ അധികാരത്തിൽനിന്ന് മാറ്റുകയെന്ന ലക്ഷ്യത്തോടെ രംഗത്തുള്ള പ്രതിപക്ഷ നേതാവ് ഗാദി ഐസൻകോട്ട്, 2023 ഒക്ടോബർ ഏഴിന് ഹമാസ് നടത്തിയ ആക്രമണം ഓർമിപ്പിച്ചാണ് വോട്ടർമാരോട് പിന്തുണ തേടിയത്. (Israel general election)

ഒക്ടോബർ ഏഴിലെ സുരക്ഷാവീഴ്ചകളുടെ ഉത്തരവാദിത്തം നിർണയിക്കാൻ സ്വതന്ത്ര അന്വേഷണ കമ്മീഷൻ വേണമെന്നാണ് ഐസൻകോട്ടിന്റെ നേതൃത്വത്തിലുള്ള പ്രതിപക്ഷത്തിന്റെ പ്രധാന ആവശ്യങ്ങളിലൊന്ന്. നെതന്യാഹു സർക്കാർ അധികാരമൊഴിയണമെന്നും ഇസ്രയേലിന്റെ സുരക്ഷയ്ക്ക് മുൻഗണന നൽകുന്ന പുതിയ ഭരണകൂടം വരണമെന്നും അദ്ദേഹം എക്സിലൂടെ പങ്കുവെച്ച സന്ദേശത്തിൽ ആവശ്യപ്പെട്ടു. നെതന്യാഹുവിന്റെ സുരക്ഷാനയങ്ങൾ രാജ്യത്തിന് അപകടകരമാണെന്ന വാദവും ഐസൻകോട്ടിന്റെ പ്രചാരണത്തിൽ പ്രധാനമാണ്.

യിസ്രയേൽ ബെറ്റെയ്നു പാർട്ടി നേതാവ് അവിഗ്ദോർ ലിബർമാനും നെതന്യാഹുവിനെതിരായ നിലപാടാണ് മുന്നോട്ടുവെച്ചത്. എല്ലാവർക്കും സൈനികസേവനമോ സിവിൽ സർവീസോ നിർബന്ധമാക്കുക, നിയമത്തിന് മുന്നിൽ തുല്യത ഉറപ്പാക്കുക, സിവിൽ വിവാഹത്തിന് അനുമതി നൽകുക, വിദ്യാഭ്യാസത്തിൽ പൊതുവായ അടിസ്ഥാന പാഠ്യപദ്ധതി നടപ്പാക്കുക തുടങ്ങിയ ആവശ്യങ്ങളും അദ്ദേഹം ഉന്നയിച്ചു. ഡെമോക്രാറ്റ്സ് പാർട്ടി നേതാവ് യെയർ ഗോലാനും ഒക്ടോബർ ഏഴിലെ ആക്രമണത്തെക്കുറിച്ച് സ്വതന്ത്ര അന്വേഷണം വേണമെന്ന് ആവശ്യപ്പെട്ടു. അന്വേഷണ കമ്മീഷൻ രൂപീകരിക്കുന്നതിനെ നെതന്യാഹു സർക്കാർ എതിർക്കുകയാണെന്നാണ് പ്രതിപക്ഷത്തിന്റെ ആരോപണം.

അതേസമയം, തന്റെ ഭരണപരിചയവും ശക്തമായ നേതൃത്വവും ഉയർത്തിക്കാട്ടിയാണ് നെതന്യാഹുവിന്റെ പ്രചാരണം. ഐസൻകോട്ടിന്റെയും ലിബർമാന്റെയും നേതൃത്വത്തിലുള്ള പ്രതിപക്ഷം അറബ് പാർട്ടികളുടെ പിന്തുണയോടെ ഇടതുപക്ഷ സർക്കാർ രൂപീകരിക്കുമെന്ന മുന്നറിയിപ്പാണ് അദ്ദേഹം വോട്ടർമാർക്ക് നൽകിയത്. ലിക്കുഡ് പാർട്ടിക്ക് മാത്രം വോട്ട് ചെയ്യണമെന്ന് നെതന്യാഹു അവസാനഘട്ട സന്ദേശത്തിൽ ആവശ്യപ്പെട്ടു. വോട്ടെണ്ണലിനുശേഷം പ്രസിഡന്റ് ഐസക് ഹെർസോഗ് തിരഞ്ഞെടുക്കപ്പെട്ട പാർട്ടികളുടെ നേതാക്കളുമായി കൂടിയാലോചിച്ച് സർക്കാർ രൂപീകരിക്കാൻ ഏറ്റവും കൂടുതൽ സാധ്യതയുള്ള നിയമസഭാംഗത്തെ ക്ഷണിക്കും. ആദ്യഘട്ടത്തിൽ 28 ദിവസമാണ് സമയം ലഭിക്കുക; ആവശ്യമെങ്കിൽ 14 ദിവസത്തെ അധികസമയവും അനുവദിക്കാം. ആദ്യ ശ്രമം പരാജയപ്പെട്ടാൽ മറ്റൊരു നേതാവിന് അവസരം ലഭിക്കും. ഒടുവിൽ 120 അംഗങ്ങളുള്ള നെസറ്റിൽ ഭൂരിപക്ഷ പിന്തുണ ഉറപ്പാക്കാൻ കഴിയാത്തപക്ഷം ഇസ്രയേൽ വീണ്ടും തിരഞ്ഞെടുപ്പിലേക്ക് നീങ്ങേണ്ടിവരും. പുതിയ സർക്കാർ അധികാരമേൽക്കുന്നതുവരെ നെതന്യാഹു കാവൽ പ്രധാനമന്ത്രിയായി തുടരും.

Summary: Israel has begun voting in a closely watched general election, with opposition leader Gadi Eisenkot urging voters to remember the October 7, 2023, Hamas attack and demanding an independent inquiry into security failures. Benjamin Netanyahu is campaigning on a strong-leadership message, while opposition figures call for a change of government and reforms.