ഇന്ത്യയിൽ നിർമിച്ച ആദ്യ ഇലക്ട്രിക് ജിഎൽസി എസ്‌യുവിയുമായി മെഴ്‌സിഡസ് ബെൻസ്; വില 78.50 ലക്ഷം രൂപ | Mercedes-Benz electric GLC
Current: മലയാളം
കൊച്ചി: ഇന്ത്യയിൽ നിർമിച്ച പുതിയ ഇലക്ട്രിക് ജിഎൽസി എസ്‌യുവി പുറത്തിറക്കി മെഴ്‌സിഡസ് ബെൻസ് (Mercedes-Benz electric GLC). മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസും ഉപമുഖ്യമന്ത്രി സുനേത്ര പവാറും ചേർന്നാണ് വാഹനം അവതരിപ്പിച്ചത്. പൂനെയിലെ ചക്കാനിലുള്ള മെഴ്‌സിഡസ് ബെൻസ് നിർമാണശാലയിൽ വാഹനത്തിന്റെ പ്രാദേശിക ഉൽപ്പാദനത്തിനും കമ്പനി ഔദ്യോഗികമായി തുടക്കമിട്ടു.
മെഴ്‌സിഡസ് ബെൻസ് എജിയുടെ സൂപ്പർവൈസറി ബോർഡ് ചെയർമാൻ മാർട്ടിൻ ബ്രൂഡർമുള്ളർ, ബോർഡ് ഓഫ് മാനേജ്‌മെന്റ് ചെയർമാൻ ഒല കല്ലേനിയസ്, ചീഫ് ടെക്‌നോളജി ഓഫീസറും ബോർഡ് ഓഫ് മാനേജ്‌മെന്റ് അംഗവുമായ ഡോ. ജോർഗ് ബർസർ, മെഴ്‌സിഡസ് ബെൻസ് ഇന്ത്യ മാനേജിങ് ഡയറക്ടറും സിഇഒയുമായ സന്തോഷ് അയ്യർ, എക്‌സിക്യൂട്ടീവ് ഡയറക്ടറും ഓപ്പറേഷൻസ് മേധാവിയുമായ വ്യങ്കടേഷ് കുൽക്കർണി തുടങ്ങിയവരും ചടങ്ങിൽ പങ്കെടുത്തു.
ഒറ്റ ചാർജിൽ 711 കിലോമീറ്റർ വരെ
കമ്പനിയുടെ പുതിയ തലമുറ ഇലക്ട്രിക് വാഹന പ്ലാറ്റ്‌ഫോമായ എംബി.ഇഎ-എം അടിസ്ഥാനമാക്കി ഇന്ത്യയിൽ നിർമിക്കുന്ന ആദ്യ മെഴ്‌സിഡസ് ബെൻസ് എസ്‌യുവിയാണ് ഇലക്ട്രിക് ജിഎൽസി. ഒറ്റ ചാർജിൽ 711 കിലോമീറ്റർ വരെ സഞ്ചരിക്കാനാകുമെന്നാണ് കമ്പനിയുടെ അവകാശവാദം. ഇന്ത്യയിലെ എക്‌സ്‌ഷോറൂം വില 78.50 ലക്ഷം രൂപയാണ്.
ബുക്കിങ് ആരംഭിച്ച് 36 മണിക്കൂറിനുള്ളിൽ 550ലധികം ഓർഡറുകൾ ലഭിച്ചതായി കമ്പനി അറിയിച്ചു. 2026 നവംബർ പകുതിയോടെ വാഹനത്തിന്റെ വിതരണം ആരംഭിക്കാനാണ് ലക്ഷ്യമിടുന്നത്.
4.3 സെക്കൻഡിൽ 100 കിലോമീറ്റർ വേഗത
ഡ്യുവൽ മോട്ടോർ സംവിധാനമുള്ള വാഹനത്തിന് 360 കിലോവാട്ട് കരുത്തും 800 എൻഎം ടോർക്കുമുണ്ട്. നിശ്ചലാവസ്ഥയിൽനിന്ന് മണിക്കൂറിൽ 100 കിലോമീറ്റർ വേഗത കൈവരിക്കാൻ 4.3 സെക്കൻഡ് മതിയാകും. 94 കിലോവാട്ട് അവർ ശേഷിയുള്ള ബാറ്ററിയാണ് വാഹനത്തിലുള്ളത്.
800 വോൾട്ട് സാങ്കേതികവിദ്യയുള്ള വാഹനത്തിൽ 330 കിലോവാട്ട് ഡിസി ഫാസ്റ്റ് ചാർജിങ് സൗകര്യവുമുണ്ട്. അനുയോജ്യമായ ചാർജർ ഉപയോഗിച്ച് 10 മിനിറ്റ് ചാർജ് ചെയ്താൽ 303 കിലോമീറ്റർ വരെ സഞ്ചരിക്കാനാകുമെന്ന് കമ്പനി വ്യക്തമാക്കുന്നു.
ഹൈപ്പർസ്‌ക്രീനും പനോരമിക് റൂഫും
39.1 ഇഞ്ച് എംബിയുഎക്സ് ഹൈപ്പർസ്‌ക്രീൻ, 942 പിക്സലുകളുള്ള പ്രകാശിത ഗ്രിൽ, നക്ഷത്രങ്ങൾ പ്രകാശിക്കുന്ന സ്കൈ കൺട്രോൾ പനോരമിക് റൂഫ് എന്നിവയാണ് വാഹനത്തിലെ പ്രധാന സവിശേഷതകൾ. പുനരുപയോഗം ചെയ്ത വസ്തുക്കളും കാർബൺ പുറന്തള്ളൽ കുറയ്ക്കാൻ സഹായിക്കുന്ന ഘടകങ്ങളും വാഹനത്തിന്റെ നിർമാണത്തിൽ ഉൾപ്പെടുത്തിയിട്ടുണ്ടെന്നും കമ്പനി അറിയിച്ചു.
ഒരേ നിർമാണശാലയിൽ ഇലക്ട്രിക്, പെട്രോൾ-ഡീസൽ വാഹനങ്ങൾ
ചക്കാനിലെ നിർമാണശാലയിൽ മെഴ്‌സിഡസ് ബെൻസിന്റെ പരമ്പരാഗത ആന്തരിക ദഹന എൻജിൻ (ഐസിഇ) വാഹനങ്ങൾ നിർമിക്കുന്ന അതേ ഉൽപ്പാദന നിരയിലാണ് ഇലക്ട്രിക് ജിഎൽസിയും നിർമിക്കുന്നത്. ഇതോടെ ഐസിഇ വാഹനങ്ങളും ബാറ്ററി അധിഷ്ഠിത ഇലക്ട്രിക് വാഹനങ്ങളും ഒരേ നിർമാണശാലയിൽ ഒരുമിച്ച് ഉൽപ്പാദിപ്പിക്കുന്ന നേട്ടം കമ്പനി സ്വന്തമാക്കിയതായി അറിയിച്ചു.
ഇതുവരെ ഇന്ത്യയിൽ 2.40 ലക്ഷത്തിലധികം വാഹനങ്ങൾ മെഴ്‌സിഡസ് ബെൻസ് വിറ്റഴിച്ചിട്ടുണ്ട്. ഇവയിൽ ഭൂരിഭാഗവും ഇന്ത്യയിലെ നിർമാണശാലയിലാണ് ഉൽപ്പാദിപ്പിച്ചത്. ചക്കാൻ നിർമാണശാലയിൽ ഇതുവരെ 3,200 കോടി രൂപ നിക്ഷേപിച്ച കമ്പനി, 2026ൽ പുതിയ ഉൽപ്പന്നങ്ങളുടെ നിർമാണം, ഉൽപ്പാദന പ്രവർത്തനങ്ങൾ, നിർമാണ പ്രക്രിയകളുടെ ഡിജിറ്റൽവൽക്കരണം എന്നിവയ്ക്കായി 200 കോടി രൂപയുടെ അധിക നിക്ഷേപവും നടത്തിയിട്ടുണ്ട്.
ഇലക്ട്രിക് വാഹന ഉപഭോക്താക്കൾക്കായി സൗജന്യ എസി വാൾബോക്സിന് പകരമായി എംബി.ചാർജ് പബ്ലിക് ചാർജിങ് ക്രെഡിറ്റുകളും കമ്പനി അവതരിപ്പിക്കുന്നുണ്ട്.
Story Summary:
Mercedes-Benz has launched its locally manufactured electric GLC SUV in India, with Maharashtra Chief Minister Devendra Fadnavis and Deputy Chief Minister Sunetra Pawar unveiling the vehicle. Priced at ₹78.50 lakh (ex-showroom), the SUV offers a claimed range of up to 711 km and features 800-volt charging technology. Production has begun at the company’s Chakan facility in Pune, with deliveries scheduled to start in mid-November 2026.
